Úkuecha 7
7
Estebanu k'éri tánkorhentskuarhu kuáp'ekorhesti
1Ka k'éri táta kurhamarhespti:
–¿Jeteru ísïski?
2Ka Estebanu mókukuntaspti: “Kurhats'ïni je erachicha ka achamasïcha, Diósï enka k'éri t'íntskueka, juchari táte Abranini xarhakuspti enka Mesopotamia irekani jápka, jiák'ani enka nótki Arani nirani jápka irekorheni, 3ka arhispti: Chéti iretarhu uéaku ka jurak'ua chéti k'umanchekuarhu anapuechani ka imani echeri jimpori niuaka enkakini ji exeraaka. 4Ka ima Kaldeuechani uéakukuantaaspti ka Arani irent'aspti, ka enka tátjempa uarhipka, Diósï jima uératini íni echerini jimpo juáspti enkats'ï iásï cha irekorheni jaka. 5Ka ixu méntku nósani echeri íntskuspti, ni imani enka atastani jápka. K'óru aiakuspti eska sïrukua jémpani íntskupirinka enka ima uarhipirinkia nák'iruka ima nótki ma sapini kámempka. 6Diósï arhispti eska sïrukua jémpa máteru nani uérakua anapueni irekapirinka, ka eskaksï jántspetaapirinka ka eskaksï ma irepeta uéxurhini nósesi káapirinka. 7Ka Diósï uantaspti: Ji arhinharhikuaka imani iretani enkats'ï jántspekuni jamani jauaka; ka tátsekuats'ï uéakukuantauaka ka ixuts'ïni marhuacheaka. 8Ka pakatperakua ma arhiaspti eskaksï ts'iuekuarhu sïkuiri p'ikuts'ïtapirinka, ka Abrani Isakini kánkorhespti ka iúmu tanimu jurhiatekua jimpo ts'iuekuarhu sïkuiri p'ikuts'ïkukuspti. Ka Isaki Jakobuntu mák'ueni kámaspti, ka Jakobu témpeni tsimani uáp'echani enkaksï judio anapu achepka. 9Jakobu uáp'echaksï, erachi jémpaniksï Joseni epurhesïrempti ka Ejiptu anapuechanksï atarakuantaspti; k'óru Diósï Jose jinkuni jarhaspti, 10ka ampe enka xáni úkua jinkuni nitamanchakorhempka Diósï jarhuataspti, ka kóntentaspti ka mímixerani enka Faraonini jinkuni jápka, irecha Ejiptu anapu jinkuni enka Joseni juramuti úpka Ejiptu ka irecho.”
11“Ka jiák'ani ísï Ejiptu ka Kanani kánekua k'arhinkua japuspti, ka juchari táte tua anapuechaksï t'irekua nómperakorhexapti. 12Enka Jakobu mítepka eska Ejiptu tríju kánekua japuspka, ma xanhari axaaspti juchari tua anapu tátechani. 13Ka enkaksï tsimani úni jamani nípka, Jose aiankuantaspti erachi jémpechani eskaksï márkuespka, ka Faraoni mítespti Joseri márku jémpechani. 14Tátsekua Jose, tátjempa Jakobuni p'it'ak'orheaspti iámentu imo anapuechani jinkuni, enkaksï tanimu ekuatse témpeni iúmuepka. 15Ka Jakobu Ejiptu kétsemaspti ka jima uarhispti ka ístuksï juchari táte tua anapuecha jima uarhispti. 16Ka iámentuksï Sikemi pánhantaspti jatsinhantani, imani jántskuarhu enka Abrani Amori uáp'echani píakuantaapka.”
17“Enka jurhiatekua antaparheni jápkia enka Diósï Abranini aiakupka, Israeli anapuechaksï Ejiptu t'uíni uánesptia, 18ka Ejiptu máteru nema irechesptia ka ima Joseni no mítespti. 19Ka ima irecha juchari iretani, juchari tua anapuecha k'arhaaspti ka nósesi káaspti ka juramukuaspti eskaksï charhakuechani tsîtaapirinka, eskaksï uarhiraapirinka, ka ísïksï nóteru uánenia. 20Ima jurhitekuechani Moisesi antap'enuspti, ka Diósï kánekua xénhchasïrempti, ka tanimu kutsï tátjempa ka amampa jinkuni t'arhexespti. 21Ka tátsekuaksï jurak'uspti, ka Faraoni uáp'a tarhataspti ka ísï t'arhexerakorhespti eska ampe uáp'eni. 22Moisesi Ejiptu anapuecheri mímixekua jurhentanhaspti, ka achamasï mésti enka sési mítekupka néna uantani ka néna jamani.”
23Ka enka tsimani ekuatse uéxurhini jatiripkia, erachi jémpa Israeli uáp'echani p'urhempenhchaaspti. 24Enka exepka na enka Ejiptu anapu ma, Israeli anapuni ma nósesi kántani jápka atani, ichaakuspti kuáp'entani, ka Ejiptu anapuni uántikuspti. 25Jimpoka Moisesi ísï p'ikuarhenhexapka, enak'iksï erachi jémpa Israeli uáp'echa jánhaskani japi eska Diósï Moisesini jimpo euap'eantaapirinka, k'óruksï ima nósani ísï erankuntaxapti. 26Ka pauantekua, Moisesi antarheraaspti tsimani Israeli anapuechani enkaksï uarhiperani jápka, ka inchaakukuaspti uékani jarharetaani ka arhiaspti: Cháts'ï márkueska, ¿Antits'ïsï ísï kámperak'i?. 27Ka ima enka nósesi kámani jápka máteruni, Moisesini p'ákchakuspti ka arhini: ¿Anti nékini arhiski eskari juchari juramutiuaka ka arhits'ïni ampechisï nósesi úni jaki? 28¿Anti jíntenturini uántikua, ísï eskari uitsintekua Ejiptu anapuni na uántikuka? 29Moisesi ísï kurhaarini sïpakorhespti ka Madiani niraspti irekani, ka jima tsimani uáp'echani kánkorheaspti. 30Ka tsimani ekuatse uéxurhini jimpo, ánjeli ma xarhakuspti Sinai juátarhu, jima enka nónema irekaka, tsïtunirhu ma enka tixarani jápka. 31Ka Moisesi kánekua ísku pakareraspti ísï exerini, ka enka antarherani jápka sési exeni, Acha jimak'u kurhaakorhespti: 32Jíska chéti tua anapuecheri Diósï, Abraniri Diósï, ka Isakiri Diósï ka Jakobueri. Ka Moisesi manaraparini nóteru tékaasïrempti eraani. 33Ka Acha arhispti: “P'iuaa chéti kuarhachichani, jimpoka ini echeri enkari atastatini jaka ji arhutakata jatsiska. 34Ji exeskia jucheti iretani, na enka Ejiptu xáni nósesi nitamakorheni jaka, kurhaaskia na enkaksï jirejiremeni jaka, ka kétseska p'ímutant'a'ani. Iásï juíni, Ejiptukini axaaka.”
35“Ka Moisesiniksï, imani enkaksï no jiókorhepka ka arhisptiksï: ‘¿Nékini juramutini ka arhinharhikpitini péraski?’, Diósï imani axaspti eska juramuti ka p'ímutantspiri ánjeli jimpo enka tsïtunirhu xarhakupka. 36Ka ima úspti eskaksï jurak'unhapirinka, k'éri ampe ka mínta ampe úparini Ejiptu tsimani ekuatse uéxurhini, ka ístu japunta charhapemerhu ka jima enka nónema irekaka. 37Ísti Moisesi enka Israeli anapuechani arhiapka: ‘Diósï chári erachini ma imeri uantari úati, ísï eska jínteni ka imantsï kurhach'aaka’. 38Ísti Moisesi, enka ireta jinkuni tánkorhent'atini jápka jima enka nónema jámka, ka enka ánjeli Sinai juátarhu uantap'empka ka juchari tátechani aiankuantaani, ka enka tsípikueri uantakuechani p'iuaka ka juchantsïntsïni aiankuantaasti.
39Ínksïsí juchari tátecha no úekapti kurhantirakuni, ískuksï xéspti, ka sánteruksï Ejiptu k'uanhatsenhchant'axapti. 40Ka Aroniniksï arhisti: Úcheats'ïni diósïchani enkats'ïni juchantsïni urhechepaaka, jimpokani jucha no míteska ampexamu úkorhencha Moisesi enkats'ïni Ejiptu petant'a'ka. 41Ka jiák'anksï úakasï sapichuni ma úspti, ka jimaksï imani eratakuani kéts'ïtakuspti, ka k'uínchekuaksï ma úkuntaspti imani ampe enkaksï úk'unt'apka. 42Ka Diósï kéntikukuaspti, ka jurak'uaspti eskaksï jóskuechani ampe k'éri ampe arhiapirinka. Ísï eska na karakata jaka Diósïri uantaricheri karakatecharhu;
‘Israeli anapuecha,
¿Anti cháts'ïni tsimani ekuatse uéxurhini
kéts'ïtacheski jima enka no irenhaka?
43Sánteruts'ïsï Molokiri kuákuani ka
Refaniri jóskuantsï pát'akorheaska,
imani eratakatechani enkats'ï úk'ukorheaka
enkats'ï k'éri ampe eratak'a.
Ísï jimpoksïni ji Babilonia jima
sánteru chúaka.’
44Juchari tátechaksï jima enka nónema irekaka jima jatsispti tiósta aiatsperakuerini, ísï eska na juramupka ima enka Moisesini arhipka eska ísï jásï ma úpirinka na enka jásï ma exepka. 45Juchari tátecha enkaksï tióstani jurak'umenhapka, Josue jinkunksï pát'aspti inchaakutspeni jima enka Diósï petaatpepka juchari tátechani japarini, ka jimak'ani jamperi enka Dabipka. 46Ima enka Diósï xáni jaiapanhentapka, ka Dabi Diósïni sésekua kurhakuspti tiósïo ma úni nani enka Jakobueri sïrukua úpirinka k'éri ampe arhini. 47Ka Salomonisï tiósïoni úkupti. 48Nák'iruka auantarhu anapu Diósï no k'umachekua k'uiripu jimpo úkatarhu irekaka. Eska na uantaka Diósïri uantari:
49‘Auanta jucheti k'éri uaxantskuesti
ka parhakpeni jucheti jatantukua.
Acha uantaxati,
¿Anti na jásï máts'ïnisï k'umanchekua úchea?
¿Nanisïni ji mintsikorhea?
50¿Anti no jucheti ják'i úski iámentu íni ampe?’
51¡Inchats'ïmasïnkats'ï! ¡Nóts'ï p'ikuarhenhesïnka ka nóts'ï kurhasïnka eskaksï no judiuecha! Cháts'ï méntkisï Espiritu Sántuni no jiókorhesïnka. Mák'uentsï jarhaska eskaksï chári tua anapuecha. 52¿Chári tátechaksï náki Diósïri uantarini no atakuekaski? Uántikuastiksï imani enkaksï uantant'a'ka Kaxumpitiri jukuani, imani enkats'ï cha iásï intsïnharhitpeka ka uantikuntsï. 53Cháts'ï no kurhantirakusïnka Juramukuani imani enkats'ï ánjelichani jimpo p'ika.”
Estebanuksï uántikusti
54Íni ampeksï kurhaarini, kurhunhexaptiksï xáni ikiani ka sïnichaksï kirisïmeantaspti Estebanuni ikiakuni. 55Ka Estebanu Espiritu Sántuni uinirhikorhetini, eranchespti ka exespti Diósïri t'íntskuani, ka Jesusini enka Diósïni jurhinkantani jakupka. 56Ka uantaspti:
–Exexaka auanta mitakorhetini jarhani ka acheti Uáp'ani enka Diósïni jurhik'antani jakuka.
57Ka Estebanu uinhachaspti ka iámentuechaksï míntikorhespti ka sáp'arherasptiksï. 58Iretarhuksï petaatant'a'spti ka tsakapkuerasptiksï. Ka ima enkaksï chkuántiraparini ampe arhiparhatani jápka, takusï ampeksï tumpini ma k'uanintutaspti enka Sáulu arhinhempka.
59Ka enkaksï tsakapu k'uanirani jápka, Estebanu uantamukukorhexapti: “Acha Jesusi, p'íkuntsï jucheti espirituni.” 60Ka tinkuixurhitini uinhachaspti: “¡Acha, ásï ampe k'amanharhirantaa!”
Ka ísï uantarini uarhispti.
Currently Selected:
Úkuecha 7: BI-PURHE
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
