Úkuecha 6
6
Iúmu tsimani jarhop'irichaksï erakunhasti
1Imani jurhiatekuechani, enkaksï jakak'uticha uánepani jápkia, gríegu uantarichaksï uénaspti ebreuechani arhiani eskaksï uarhiti tsînticha gríeguecha, nóksï mák'ueni intsïnhasïrempka mántani pauani jarhop'eratani. 2Jiák'anksï témpeni tsimani Jesusiri uantakua páricha tánpentaspti ka arhip'esptiksï:
–Nósesi jauati eskani jucha jurak'uaka Diósïri uantakuani, ka ampe két'atachenksïni jamani. 3Jiranhaa je iúmu tsimani erachi enkachi íni ánchekorhetani míntauaka enkaksï sési míntsinharhikueuaka ka enkaksï uinirini jauaka Espiritu Sántuni ka mímixenksï. 4Ka jucha no jurak'unt'aaka uantamukukorheni ka Diósïri uantakuani aiankpeni.
5Iámentuechaksï ísï sési exespti ka Estebanunksï eraantaspti, acheti kánekua jakak'uti ma enka Espiritu Sántuni uinirhekorhetini jápka, ka Felipeni ka Prókoroni ka Nikanorini ka Timonini ka Parmenasïni ka Nikolasïni Antiokia anapuni enka judioueni jakak'unt'apka. 6Ka ínksï Jesusiri uantakua párichani jinkuni páaspti, ka imaksï kómarhip'ekuaspti ka p'áts'ïkuasptiksï.
7Acheri uantakua kánekua mítekorhepaxapti, ka Jerusalenksï jakak'uticha uánexapti; ka ístuksï uánekua tátecha jakak'ukuani chúxapaxapti.
Na enkaksï Estebanuni jupikaka
8Estebanu, Diósïri kóntentskua ka uinhapekua uinirini, k'éri míntechani ampe úasïrempti k'uiripuni japarini. 9Ka kúnkorhekuntasptiksï tánkorhekuarhu anapuecha enkaksï “Libertu” arhikatepka, ka Sirene anapuecha, ka Alejandria anapuecha, ka Silisia ka Ásia anapuecha Estebanu jinkuni arhirperani. 10Ka k'óruksï no úsïrempti Estebanuni antani enka mímixekua ka Espiritu jinkuni uantempka. 11Ka achetichanksï máru sïpatekuarhu maiamuaspti eskaksï uantapirinka eskaksï Estebanuni kurhach'aspka na enka Moisesini ka Diósïni nósesi arhini jápka. 12Ka iretarhuksï manatpespti, ka achamasïchani ka juramukua jurhentpirichantuksï manataaspti, ka Estebanunksï jupikaspti ka k'éri tánkorhekuarhuksï páspti. 13Ka páasptiksï máru enkaksï chkuántiraparini arhiparhatani jápka:
–I acheti útakuntaxati k'éri tiósïoni ka juramukuantu útakuxati. 14Jucha kurhach'akorheska enka inte uantaka, eska Jesusi Nasareti anapu íni k'éri tiósïoni xerent'aaka, ka eska mót'akuaka p'intekuechani enkats'ïni Moisesi jurak'ucheaka.
15Iámentu ima enkaksï k'éri tánkorhentskuarhu uaxakatini jápka, Estebanunksï eratespti ka ima ánjeli méni jánharhint'aspti.
Currently Selected:
Úkuecha 6: BI-PURHE
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
