Úkuecha 5
5
Ananiasïksï Safira jinkuni k'amanharhint'asti
1Ka acheti ma enka Ananiasï arhinhempka ka imeri uarhiti Safira arhinhasïrempti, echeriksï ma atarant'aspti, 2ka tumina enkaksï maiamunhapka, p'ikurhukusptiksï. Ka enka xáni pákarani jápka Jesusiri uantakua párichanksï pákuaspti. 3Ka Pédru arhispti:
–Ananiasï, ¿Antirisï jurak'utakorhe eskakini nóampakiti mintsitani manatachepirinka, ka ísïri Espiritu Sántuni chkuántirakuni enkari tuminani enkari echeri jimpo maiamunhaka sáni arhutakorheka? 4¿Anti echeri no chétispki? Ka enkari atarantaka, ¿Tumina no chétiski? ¿Antirisï mintsitarhu íni ampe pérakorhe? ¡Nóri k'uiripunisï chkuántirakuka, Diósïntisï chkuántirakuka!
5Ananiasï íni uantakuechani kurharini uarhipaspti. Ka ima enkaksï xáni íni ampe kurhapka uárhixaptiksï xáni chéni. 6Ka tumpichaksï jauaraspti, takusïksï irhiirhitaspti ka pántasptiksï jatsintani.
7No ióntaspti Ananiasïri uarhiti inchant'ani no mítetini ampe enka úkorhepka. 8Ka Pédru arhispti:
–Arhirini, ¿Sési jimpots'ï cha xáni jimpo atarantaski echerini eskats'ïni na arhika?
Ka ima uarhiti mókukuntaspti:
–Jo, xáni jimpo.
9Ka Pédru arhispti:
–¿Antits'ïsï cha pákatpera Acheri Espirituni ts'ék'u? Exea, janunkuaxatiksïa inte enkaksï chéti achetini pántaka jatsintani ka iásïksïni t'únkeni pántaatia.
10Safirat'u jimak'u uarhispti Pédruni japarini. Enkaksï tumpicha niántapka t'uini uarhirixaptia, ka uámpa jinkunksï pántaspti játsintani. 11Iámentu enkaksï tánkorhent'atini jápka, ka ístuksï ima enkaksï íni ampe kurhach'pepka uárhisïremptiksï xáni chéni.
Uánekua míntecha ka milagruecha
12Ka Jesusiri uantakua párichaksï iretarhu uánekua Diósïri míntechani ka milagruechani úasïrempti. Ka iámentuechaksï Salomuniri jách'ukurini mák'u mintsita jinkuni tánkorhent'atini jarhasïrempti. 13Ka máteruechaksï no tékaasïrempti imecha jinkunini nák'iruka iretarhu imecheri ampe sési ampe uantanhempka. 14Ka sánteruksï uánexapti acheticha ka ístu uarhiticha enkaksï Achani mintsikempka. 15Xáni ísï enkaksï p'amenchatichani jámperi xánharu pétauauempka k'uirakuarhu péraani, ka enka Pédru jimesï nitamapirinka eska parhich'akuapirinka náuek'i k'umantak'u. 16Ka Jerusaleni ísku anapuechaksï jamperi nirasïrempti p'amenchatichani páani, ka imechani enkaksï espiritu nósesi járhaticha jupiantauempka, iámentuksï ampakeranhantasïrempti.
Jesusiri uantakua párichanksï uékaspti jupiani
17K'éri táta ka saduseuecha enkaksï ima jinkuni jápka, Jesusiri uantakua párichanksï epurheaxapti, 18ka jupiasptiksï ka k'ataperakuarhuksï incharaaspti. 19K'óru chúrekua Acheri ánjeli ma k'ataperakuarhu mítakuaspti, ka enka na petant'a'apka arhiaspti: 20“Ni je tiósïo ka tsípikueri aiankperakuechani uantantsï je.” 21Imaksï íni ampe kurhaarini, k'éri tiósïoksï tsípku inchaspti ka p'íarasptiksï jurhentpeni.
Ka niárasptiksï k'éri táta ka ima enkaksï ima jinkunipka, ka k'éri tánkorhekuanksï ka ístu iámentu achamasï Israeli anapuechanksï uantap'antaaspti, ka Jesusiri uantakua párichanksï k'ataperakuarhu petarkorheaspti. 22P'urhek'utichaksï k'ataperakuarhu niáratini nóksï xéantaaspti, ka k'uanhap'atsesptiksï uantant'a'ni 23uantaparinksï:
–K'ataperakuarhu uapanhakorhetixati ka p'urhek'utichaksï anhamukusti, ka enkachi mítaka nónemanchi xéntaska.
24Ísï kurharinksï k'éri táta ka tiósïo anapu p'urhek'uticheri urhets'ïkuri ka tátecheri urhets'ïkuricha, kurhamarhekorhesïremptiksï: ¿Nénaxamuteru jánhaskorhepaa? 25Ka jiák'ani niáraspti ma enka arhiapka:
–Imani enkats'ï cha ónhatarkorheaka, tiósïoksï jarhasti jurhentpeni.
26Jiák'ani p'urhek'uticheri urhets'ïkuri imeri p'urhek'utichani jinkunksï niraspti p'iuantaani sési arhiaparini, jimpokaksï iretani chérhesïrempka, jimpokaksï jámapirinka tsakapkueraani. 27Enkaksï k'éri tánkorhekuarhu péntaapkia, k'éri táta kurhamarheaspti 28arhiaparini:
–¿Nóksïni sési jásï jimpo arhispkia eskats'ï no jámapirinka inteni jakankurhikua jimpo jurhentpeni? Iámu Jerusaleni íni ampets'ï jurhentpeskia, ka juchantsïntsïni arhiparhataxaka eskani inte achetini jucha uántikuska.
29Ka Pédruksï Jesusiri uantakua párichani jinkuni mókukorhespti:
–K'uanisïnti Diósïni urheta kurhach'ani, eska k'uiripuni kurhach'ani. 30Juchari tua anapuecheri Diósï Jesusini tsítant'a'sti, imani enkats'ï cha cháparhataka, 31Diósï t'irek'antani pérasti juramutini ka p'imutantspirini, ka eskaksï imani jimpo Israeli anapuecha Diósïni antarhentaaka ka k'amanharhintskuechanksï púamenhantani. 32Jucha íni ampe exekorheska, ka Espiritu Sántut'u ísï, enka Diósï íntsaaka imechani enkaksï kurhantirakuk'a.
33Imaksï ikiaspti íni ampe ísï kurharini, ka uékasïremptiksï uántikuani. 34Jiák'ani k'éri tánkorhekuarhu, fariseo ma jauaraspti enka Gamalieli arhinhempka, juramukua jurhentpiri ma, enka iretarhu kánekua janhanharhikatepka. Ima sónti Jesusiri uantakua párichani petarkorheaspti, 35ka uantaspti:
–Israeli anapu tatecha, jinkuntku je néna enkats'ï uékani jaka káani íni achetichani. 36Míantsï je na enka Teudasï anhatsekorhepka uantani eska ima k'éri ampespka. Ka intenksï sáno ma irepeta acheticha chúxapaspti. Imanksï uántikusti ka iámentu enkaksï chúxapempka etsapakorhesptiksï ka ískuksï k'amantespti. 37Ka xásï Júdasï Galilea anapu anhatsekorhespti, imani jurhiatekua enka miiup'eranhantapka, ka uánekuechani chúxatakorhepaaspti ka imantuksï uántikusti, ka ima enkaksï chúxapempka etsapakorhesptiksï. 38Ka iásïksïsïni arhixaka: Ásï inchakukua je íni achetichani, jurak'ua je, jimpoka eka i k'uiripueri úkua ampeka, ísku k'amanteati, 39k'óru enka i ampe Diósïrika, nóts'ï úaka k'amak'uni. Ka ísku úntani jauakats'ï Diósï jinkuni úrhutani.
40Ka imaksï ísï sési erankuntaspti. Ka uantap'antaasptiksï Jesusiri uantakua párichani ka enkaksï na k'uikirheapka, juramukuasptiksï eskaksï nóteru jámapirinka Jesusiri jakankurhikuani uantaparini, ka tátsekuaksï jurak'uaspti. 41Imaksï uéntaspti k'éri tánkorhekuani japarini, kánekuaksï tsípeparini, jimpoka Diósï nitatarhetaaspka eskaksï ísï nósesi kánhapirinka eska Jesusi. 42Ka mántani pauanksï no kuantant'a'sïrempti k'éri tiósïo ka k'umanchekuecharhu Jesukritueri ampe jurhentpeni ka arhits'ïkpeni.
Currently Selected:
Úkuecha 5: BI-PURHE
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
