Úkuecha 2

I. ERUSALENI AMPAKITI AIANKPERAKUERI UANTANTSKUA

(2.1—8.3)

Espiritu Sántu kétsesti

1Penteskostesïri k'uínchekurhu jimpoksï iámentuecha tánkorhent'atixapti. 2Ka mátirku auantarhu uératini nósesi kúspuspti, eska ampe uinhamu tarhiani, ka méntku k'umanchekuarhu xamantskantaspti jima enkaksï ima jápka. 3Ka katampeni járhati chpíririksï xarharaspti ka etsakurhisptiksï, ka mántani arhisptiksï imechani antats'ïkueraani. 4Iámentuechani Espiritu Sántu antats'ïkueraaspti, ka uénasptiksï máteru uantakuechani jimpo uántani, ísï eska Espiritu na uantarauempka.

5Ka Jerusalenksï irekaxapti máru judiuecha, kánekua jakak'uticha enkaksï iápuru ísï uératini jútipka. 6Imani xamankuntskuani kurhanhatini uánekua tánkorhenhantaspti, ka ískuksï pakareraspti, jimpokaksï táchani kurhach'akorheaxapka imecheri uantakua jimpoksï uantani jarhani. 7Ískuksï jarhaspti eratsentani ka uantasïremptiksï:

–¿Anti íksï no Galilea anapuecheski enkaksï mámaru uantani jaka? 8¿Néna jimpochisï kurhankukuani jaki imani uantakuani enkachi jucha sapirintki uantak'a? 9Ixuchi jarhaska Pártosï anapuecha ka Médosï anapuecha ka Elami anapuecha, ka jucha enkachi Mesopotamia irekaka; ka Judea ka Kapadosia ka Pónto ka Ásia, 10ka Frígia ka Panfilia ka Ejiptu ka Áfrika ísï, ka Sirene jini sánteru ísï, ka Róma anapuecha enkaksï ixu irekani jaka; 11máruksï judiouesti ka máruksï judio úkorhent'asti. Ka ístuksï ixu jarhasti Kréta anapuecha ka Arabia anapuecha, iámentuechachi kurhach'akorheaxaka enkaksï juchari uantakua jimpo, Diósïri k'éri ampekueri ampe uantani jaka.

12Iámentuksï ísku pakareratixapti ka mámaru ampeksï eratsexapti ka arhip'erasïremptiksï:

–¿I ampexamu arhikuekak'i?

13Ka máteruksï arhinhchaasïrempti:

–Íksï kauirixati.

Pédru uantasti

14Ka Pédru, jauaraspti máteru témpeni ma Jesusiri uantakua párichani jinkuni ka uinhamu uantaspti: “Judiouecha, ka iámentu enkats'ï Jerusaleni irekorheka: Sési mítetini ja je íni ampe, ka kurhats'ïni je ampe enkaksïni arhiaka. 15Íksï no kauirixati eskats'ï cha na eranhaskani jaka, nóchka xarheniski anti. 16Ísï ima ampeti enka Diósïri uantari Joeli uantaka:

17Diósï uantasti:

Jiák'ani enkaksï jurhiatekuecha k'amarhuni jámaaka,

jucheti Espirituni k'uiripuni antats'ïteraaka,

ka chári uátsïtichaksï

Diósïri ampe uantats'ïkpeaati;

chári tumpichaksï jánhaskaati,

ka tata k'ératichaksï tsánharhiati;

18sési jimpo ji jucheti jántspirichani,

ima jurhiatekuechani jimpo

Espirituni antats'ïterauaka

ka uantats'ïkup'eatiksï.

19K'érati míntechani xarhatauaka auantarhu,

ka parhakpeni iurhiri ka chpíri

ka kánekua sïraata.

20Tata jurhiata páp'akaxeati,

ka nana kutsï iurhirkuentaati,

enka nótki niárani jauaka

Acheri k'éri jurhiatekua.

21Ka ima enkaksï Achani kómarhiaka,

p'ímutanhantaatiksï.

22Kurha je íni ampe Israeli anapuecha, enkani uantani jámka: Jesusi Nasareti anapu imesti, enkaksïni Diósï erakucheka, ka imaksïni Diósïni jimpo, k'éri ampe, ka míntechani ampe xarhatachesti eskats'ï cha na mítetini jaka; 23ka intenksï intsïnharhitpesti ísï eska na eratsekata jápka, eska Diósï na eratsetini jápka; ka uántikutarkorheskats'ï cháparhatarkorheparini nóamparhati k'uiripu jimpo. 24Ka Diósï tsítant'a'sti, ka kéntitakusti uarhikueri p'amekuani, jimpoka uarhikua no úpirinka antani. 25Jimpoka irecha Dabi, Jesusini arhikuekani uantasti:

Ji exeni jarhasïnka

eskarini jucheti Acha urhechepasïnka,

jimpokarini jurhik'antani pámpexaka,

ka nómpemarini úati antani.

26Jimposï jucheti mintsita tsípet'i,

ka antanhentasïnka pirekuni,

ka ji kánekua mintsikaparini irekaaka,

27jimpokari no uarhiricha jinkuni jurak'uaka,

ka no jurak'uati eska chéti erakukata teretseaka.

28Xéraaskarini xanharichani

enka sési irestpek'a,

ka ji kánekua tsípeaka

enkakini exeni jauaka.”

29“Tatecha ka nanecha, jurak'uksïni jurhimpitku arhini, eska irecha Dabi uarhiska ka jatsinhantasti, ka jima enka jántaka, útasteru jima jarhasti. 30Enka ima Diósïri uantarini jápka, mítetixapti eska Diósï aiakutixapka sïrukua jémpani ma irechetarani, 31sési erankuntatini, Dabi, Krístueri tsíntskueri ampesï uantapti, eska Jesusi no uarhikuarhu pakarapirinka ka eska no téretsepirinka. 32Ka Diósï Jesusini tsítant'a'sti, ka inteni ampe jucha exekorheska. 33Enka Diósï Jesusini p'íkuntapka, t'irek'antani pérasti, ka ima p'irasti Espiritu Sántuni enka Tátjempa íntskupka ka Jesusits'ïni juchantsïni antats'ïterasti, intesti enkats'ï exeni jaka ka kurhani jaka. 34No Dabisï kénchent'ati, nóchka ima ísï uantaspki anti:

Acha Diósï arhisti jucheti Achani,

jurhik'antarini uaxakachetini ja,

35ekakini jamperi jatantutauaka

imechani enkaksïni kurhunhek'a.”

36“Mítetini jaueksï Israeli anapuecha, eska Jesusini enkats'ï cháparhataka, Diósï úch'akurasti ka Acha ústi.”

37Ísï kurharinksï kánekua jáarhaspti ka Pédrunksï ka máteru Jesusiri uantakua párichanksï arhiaspti:

–Tatecha, ¿Jucha nena jámaa?

38Ka Pédru arhiaspti:

–Diósïni antarhentsï je ka Jesukristuni jimpo itsï atats'ï je, ka k'amanharhintskuechantsï púamenhant'aaka, ka Espiritu Sántuntsï p'iuaka. 39Jimpoka i, ima aiatsperakueska enkats'ï cha ka chári uátsïticha ka iámentu enkaksï iauani anapuecha aiamenhaka. Arhikuekasïnti, eska imecheriska enka juchari Acha Diósï uékaaka ioarhiani.

40Pédru íni ampe ka uánekua ampeteru arhiaspti ka útasteru arhiaspti:

–¡Ásteru nósesi ireke jeia!

41Ka ima enkaksï uantakuani kurhankuntapka, itsï atats'ïkunhasptiksï ka ima jurhiatekuaksï tanimu míli isï jakak'uticha jinkunisptia. 42Ka Jesusiri uantakua páricheri jurhentperakuanksï sési marhuatasïrempti, ka iámentuechaksï márku marhuataxapti ampe, t'ireni jámani ka uantamukukorheni jámani.

Jakak'utichaksï uánexapti

43Iámentuechaksï ísku pákareratixapti, ka Jesusiri uantakua párichaksï uánekua míntechani ka k'éri ampeksï úsïrempti. 44Ka ima enkaksï jakak'upka mák'uksï úkorhent'atixapti, ka iámentuechaksï jatsikorhekua ampe márku marhuatasïrempti; 45ampe enkaksï xáni kánkorhempka, atarantasïremptiksï ka ísïksï arhukuntasïrempti eskaksï nák'u ampe uéntarhinchani jápirinka. 46Mántani pauanksï tiósïo tánkorhent'asïrempti, ka k'umanchekuarhuecharhuksï kurhinta márku ústasïrempti, ka márkuksï t'iresïrempti tsípekua jinkuni ka sési jásï mintsita jinkuni. 47Diósïnksï k'éri ampe arhiparini, ka iámentuechaksï sési erauasïrempti. Ka Acha mántani pauani uáneraaxapti imechani enkaksï p'ímutantskorhepirinka.

Currently Selected:

Úkuecha 2: BI-PURHE

Highlight

Copy

Compare