Úkuecha 1
1
Inchap'ekua
(1.1-26)
Espiritu Sántueri aiatspekua
1¡Áke t'u Teófilu! Máteru jucheti urhetku karakatarhukini karachespka ampe enka Jesusi uénapka úni ka jurhentpeni. 2Ka jiák'ani jamperi enka auantarhu p'íkunhantaka, ka enka Espiritu Sántu jimpo juramukuapka imeri uantakua párichani enka erantaatini jápka. 3Ísï tátsekua enka xáni nósesi kánhapka ka uántikunhani, tsípiti xarhakuantaaspti ka sési exeraaspti eska tsípiti jámaxapka, ka tsimani ekuatse jurhiatekuaksï exent'aspti, ka ima Diósïri irechakueri ampe uantaxekuasïrempti.
4Jesusi juramukuaspti jurhenkorheri jémpechani enka imechani jinkuni t'ireni jápka:
–Ásï jama je uéakuntani Jerusaleni. Erokorhe je Táteri aiatsperakuani, imani enkats'ïni cha jínteni kurhach'akorheka. 5Sési jimpo, Juánu itsï jimpo itsï atats'ïkpesti, ka cháts'ï nóteru ióntani Espiritu Sántuni atats'ïkunhaaka.
Jesusi karhanchent'asti
6Ima enkaksï Jesusi jinkuni jápka, kurhamarhesptiksï:
–Tata, ¿Iásïri Israeli anapuechani irecheni ma péraakuaua?
7Ka Jesusi arhiaspti:
–Cháts'ï no p'itaranchasïnka míteni ampe jántueua o na jatiniua, ampe enka Táte imeri juramukua jimpo juramutini jaka, 8k'óru jiák'ani enkats'ï p'iuaka Espiritu Sántueri uinhapekua, enkaksïni antats'ïkueraaka, Jerusaleni ka iápuru Judea ka Samaria ka ma parhakpentsï uantant'a'aka ampe enkats'ï jucheti ampe exeka.
9Jesusi íni ampe untarini, auantarhu p'íkunhantaspti imechani jáparini, jánikua ma ónharhikuaspti ka nóteruksï úsptiia exeni. 10Enkaksï erancheni jápka, enka Jesusi karhanchent'ani jápka, ma akantanksï niárakuaspti tsimani acheticha urapiti xukuparhatini, 11enkaksï arhiapka:
–Galilea anapuecha, ¿Antits'ïsï ísku pakarera erancheni? Inte Jesusi enka auantarhu p'íkunhantani jaka, mák'ueni junkuaati eskats'ï na erankuntani jaka.
Na enkaksï Matiasïni Júdasïni jimpo mót'akuka
12Olibusïrhu juátarhu uératinksï, Jesusiri uantakua páricha Jerusaleni k'uanhatsentaspti, no iauanesti, xántku eska sábadu nák'u jiáretperanhempka xanharani. 13Ka iretarhu niáratinksï, k'umanchekuarhu iótakuarhuksï karhantaspti, jima enkaksï Pédru ka Santiagu ják'orheni jápka, ka ístu Juánu ka Andresï ka Felipe ka Tomasï ka Bartolome ka Mateo ka Santiagu Alfeo uáp'a, ka Simoni Selota ka Júdasï; Santiagu uáp'a. 14Imaksï nanecha máru jinkuni méntku tánkorhent'ani jarhasïrempti uantamukukorheni, Maria Jesusiri amampa jinkuni ka erachi jémpecha jinkuni.
15Imani jurhiatekua ma jimpo, Pédru, erachichani japarini jauarasti ka uantaspti. Ka ima enkaksï tánkorhetini jápka kuímu ekuatse ísïptiksï: 16“Tatecha ka nanecha, k'uanisïrempti eska úkorhepirinka eska karakata na arhik'a, enka Espiritu Sántu Dabini jimpo, Júdasïri ampe uantapka. Ima enka urhekupaapka imechani enkaksï Jesusini jupikapka. 17Júdasï jucha jinkunispti ka jucha jinkuni ánchekorhesïrempti. 18Ima, tumina nósesi antakata jimpo, echeri ma piántaspti, ka tátsekua ép'u urhetatapaspti ka charerani ka sïturhi uéarheraspti. 19I ampe Jerusaleni iámu mítekorhespti ka echerinksï jamperi Aseldama jakankurhitaspti, (enka ‘Iurhiri jáakurhakuarhu’ arhikuekak'a imecheri uantakua jimpo.) 20Nóchka jakak'uticheri pirekuecharhu ísï karakata jarhasti anti:
Chéni jémpo pínantente,
ka ásteru nema jima ireke.”
Ka eska máteru jupintaaka imeri ánchekorhetani.
21“Sésiuati eska ma enkats'ïni méntkisï pámpetakiia, enka Acha Jesusi juchantsïni jinkuni jámani jápka; 22jiáni uératini enka Juánu itsï atats'ïkpeka, ka enka jamperi ima auantarhu p'íkunhantaka. K'uanisïnti eska ma jucha jinkuni jámaaka uantant'a'ni eska Jesusi tsíntaska.”
23Ka tsimanksï achetichani erauantaaspti: Joseni, enkaksï Bársabasï arhimpka ka ístuksï Jústu arhisïrempti, ka Matiasïni. 24Ka ísïksï uantamukukorhespti: “Acha, cha enkats'ï iámentuechani mintsita mítekuaka, exerats'ïni nákiri i tsimani tatani erakusïnki, 25enka jupintaaka uantakua páni, enka Júdasï jurarkuka jiák'ani enka k'amanharhint'apka, ka enka nika jini enka ima jakuepka.”
26Ka enkaksï erakuani jápka, Matiasïni niárakueraspti, ka ima témpeni ma Jesusiri uantakua páricha jinkuniranhasptia.
Currently Selected:
Úkuecha 1: BI-PURHE
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
