प्रेरित 9

शाऊला रा ‌‍मन बदलणा

(प्रेरित 22.6-16; 26.12-18)

1शाऊल जोह एवरे तणी परमेश्वरा रे चेले धमकाऊँणे होर घात करदअ लागअदअ थी, महायाजका सेटा नाठअ। 2होर तेऊ दमिश्का रे प्रार्थना घरा रे ना पैंदे री चिठ्ठी मांगी कि कैह मणश कैह बेटडी, जूंणा तेऊ एऊ पन्था पैंदे पाई त्याह बानी करे यरूशलेमा बे आणे। 3पर हांडदे-हांडदे जेबा सह दमिश्का सेटा पूजअ, तेबा एकदम सरग चहु फेरे पर्याशा होऊ। 4होर सह नेहटे धरती माटे पैंदे पडू होर यह शब्द शूणू, हे शाऊल, हे शाऊल, तूह माह किबे दुखी करा?

5तेऊ पुछु, हे परमेश्वर तूह कुण साहा? तेऊ बोलू, हांऊ यीशु साहा, जासू तूह दुखी करा। 6पर एबा ऊठी करे नगरा बे नाह, होर जोह ताह करना, सह ताबे खोजणा, 7जोह मणशे तेऊ संघे यात्रा करण आले थी, त्याह हैरान-परेशान होई, किबेकी शब्द तअ शूणदे लागदे थी, पर कुण हेरी नांई आंहदअ थी। 8तेबा शाऊले जमीना मे का उजे ऊठअ, पर जेबा आछी खोली तेबा तेऊ किछे नांई हेरु होर तेऊये तेऊरअ हाथ ढाकी करे सह दमिश्क में नीऊ। 9तेऊ चीई धयाडी नाह कुछ हेरू होर नाह कुछ खाऊ होर ना कुछ पीऊ। 10दमिश्का में हनन्याह ना रअ एक चेलअ थी, तेऊबै परमेश्वरे दर्शना में बोलू, हे हनन्याह! तेऊ बोलू, हाँ परमेश्वर। 11तेबा परमेश्वरे तेऊबै बोलू, उठ होर तेसा गली में नाह जोह सीधी आसा दी होर यहूदा रै घरा में शाऊला ना रअ एक तरसुस बे पूछु; किबेकी सह प्रार्थना करदअ लागअदअ साहा। 12होर तेऊ हनन्याह ना रअ एक मणश भीतर इंहदअ होर आपु पैंदे हाथ डांहदअ हेरू; कि भीआ कअ भाली सके। 13हनन्याह उतर दीना, हे परमेश्वर, मांई एऊ मणशा रे बारे में बहू लोका कअ शूणूदा साहा कि एऊ यरूशलेमा में तेरे पवित्र लोका संघे बड़ी-बड़ी बुराई करीदी साहा; 14होर अखे भी यह प्रधान याजका रे अधिकारा संघे आऊदअ कि जोह लोका तेरा ना लंऊदा त्याह बंधी बणाए। 15पर परमेश्वर तेऊबै बोलू, तूह नांह; किबेकी सह अन्यजाति होर राजाओं होर इस्राएलियों ज़ेह मेरा ना प्रगट करणे री तणी मेरअ चुनु दअ पात्र साहा। 16होर माहा तेऊबै खोजणा कि मेरे ना री तणी केहडा-केहडा दुःख चुकाऊंणा पड़ना। 17तेबा हनन्याह उठी करे तेऊ घरा में नाठअ, होर आपणे हाथ तेऊ पेंदे डाही करे बोलू, हे भाई शाऊल, परमेश्वर, मतलब यीशु जोह ताह बाता में, जासुकअ तूह आऊअ ताह हेरू थी, तेऊ हाँऊ भेजू कि तूह भीआ कअ दृष्टि पाए होर पवित्र आत्मा संघे परिपूर्ण होेए । 18होर तेभरी तेऊरी आछी कअ छिलके जेड़े पड़ी होर तेऊ हेरदा लागा, होर ऊठी करे बपतिस्मा लऊ; 19तेबा रोटी खाई तेऊमें जान आई। सह बहू धयाडी त्याह चेले संघे रहू जोह दमिश्क में थी।

शाऊला रा यीशु मसीहा रा प्रचार करना

20होर सह तेवरी प्रार्थना घरा में यीशु रा प्रचार करदअ लागअ कि सह परमेश्वरा रअ शोहरू साहा। 21होर सब्हे शूणन आले हैरान होई करे बोलदे लागे, केह यह सह मणश नांई आंहदअ जोह यरूशलेमा में त्याह जोह एऊ ना लंऊदा थी, नष्ट करदा थी; होर अखे भी एतकी तणी आऊअद, कि त्याह बान्ही करे प्रधान याजका सेटा नीये? 22पर शाऊल होर भी सामर्थ्यी हुंदअ रहू, होर ऐसा गाला रा प्रमाण देई करे की मसीह यह सा दमिश्क में रहणे आले यहूदी रअ मुंह बंद करदअ रहू। 23जेबा बहू धयाडे होई, तेबा यहूदी मिली करे तेऊ मारणे री योजना बणाई। 24पर त्याह री स्कीम शाऊला पता चली। त्याह तेऊ मारणे री तणी राच-धयाडी योजना बणाऊंदे, लागेदे थी। 25पर राची तेऊरे चेले सह टोकरे में बिशालू होर दीबारा पैंदे लटकाई करे ऊतारू।

यरूशलेमा में शाऊल

26यरूशलेमा में पुजिकरे तेऊ चेले संघे मीलणे री कोशिश करी; पर सभे तेऊ कअ डरदा थी, किबेकी त्याह बुशाह नांई होऊ कि सह भी एक चेलअ साहा। 27पर बरनबासे सह आपु संघे प्रेरितों सेटा नींऊ होर खोजू कि एऊ कासु रीति संघे बाता परमेश्वर हेरू होर तेऊ संघे गला करी; तेऊकी दमिश्का में बड़ी बहादुरी संघे यीशु ना रा प्रचार होउ। 28एता बाद शाऊल यरूशलेमा में चेले संघे इंहद नाहदअ लागअ होर बिना डरे संघे यीशु प्रभु रे ना रा प्रचारा करदअ लागअ । 29होर निधडक होई करे परमेश्वर ना प्रचार करदा। होर यूनानी भाषा बोलण आले यहूदियों संघे गला-बाता होर बाद-बिबाद करदा थी। पर त्याह तेऊ मारणे री स्कीमा बणाऊंदे लागे। 30यह जाणी करे भाई सह कैसरिया शहरा बे आणू होर तरसुसा बे भेजू।

31एढ़ी तरह सारी यहूदिया, होर गलील, होर सामरिया में कलीसिया चैन भेटा, होर कलीसिया री उन्नति हुन्दी रही; होर परमेश्वरे सह परमेश्वरा री डरा का होर पवित्र आत्मा री शांति में चलदी होर बढदी रही।

ऐनियासा रा ठीक हुणा

32तेबा एडा होऊ कि पतरस हर जगह नांहदअ, त्याह पवित्र लोका सेटा पूजअ जोह लुद्दा नगरा में रंहदा। 33तखे तेऊ एनियास ना रअ एक लकबे रअ बीमार मणश भेटअ, जोह आठा साला तणी बिस्तरे में पडू दअ थी। 34पतरसे तेऊबै बोलू, हे एनियास! यीशु मसीह ताह चंगअ करदा। उठ आपणें बिस्तरा छाड। सह तेभरी खडअ ऊठअ। 35तेबा लुद्दा होर शारोना में सभे रहण आले तेऊ हेरी करे परमेश्वरा फेरा बे फिरी।

36याफा में तबीता मतलब दोरकास ना री एक बुशाह करन आली एक वेटडी । सह बहू भले काम होर दान करदा। 37त्याह ही धयाडी सह बीमार होई करे मुंई; होर त्याह सह नैही करे एकी बड़ी बाहुडी डाही। 38तेबा कि लुद्दा याफा सेटा, चेले यह शूणी करे कि पतरस तखे साहा दुई मणश भेजी करे बिनती करी कि, हामा सेटा इंहणे में देर नांई करे। 39तेबा पतरस त्याह संघे नाठअ, जेबा सह तखे पूजअ सह त्याहए एकी बड़ी बाहुडी सेटा बे नींऊ। सभे बिधबा लेरदी तेऊ सेटा खड़ी होई होर जोह कुरते होर झिकड़े दोरकास बेटडी त्याह संघे रंहदे वक्त बणाईद थी, रिहांऊदी लागी। 40तेबा पतरसे सभे बागे काहडी, होर घुटने टेकी करे प्रार्थना करी होर शवा फेरे हेरी करे बोलू, हे तबीता उठ। तेबा तेसे आपणी आछी खोली, होर पतरस हेरी करे उठी करे बेठी। 41तेऊ हाथ देई करे सह चूआकू, होर पवित्र लोका होर बिधबा शदाई करे सह जिऊंदी रिहाई। 42यह गल याफा मैंजे सारी फैली; होर बहू लोका परमेश्वरा पैंदे बुशाह करू। 43होर पतरस याफा में शिमोन नां रअ एकी चामड़े रे व्यापारी रे घरे बहू धयाडी तणी रुकू।

Currently Selected:

प्रेरित 9: ISJNT

Highlight

Copy

Compare