प्रेरित 8

कलीसिया पैंदे अत्याचार

1शाऊल एसा हत्या रे पक्षा में थी, तेसा धयाडी यरूशलेमा री कलीसिया पैंदे बड़ा उपद्र्ब शुरू होऊ होर प्रेरितों छाडी सभे यहूदिया होर सामरिया देशा में तितर बितर होई। 2कुछ भक्त स्‍तीफनुस कब्रा में डाहू होर तेऊरी तणी बडआ दुःख होऊ। 3शाऊल कलीसिया खत्म करदअ लागअदअ थी होर घरे-घरे नांही करे मर्द होर बेटडी घशीटी करे जेला में डांहण थी।

सामरिया में फिलिप्पुस रा प्रचार

4पर जोह तितर बितर होई थी त्याह सुसमाचार शुणाऊंदे लागे । 5होर फिलिप्पुस सामरिया नगरा में नाही करे लोका बे मसीहा रा प्रचार करदअ लागअ। 6जूंणा गला फिलिप्पुसे बोली त्याह लोके शुंणी करे होर जोह चिन्ह सह रीहांऊदा थी, त्याह हेरी-हेरी करे एक चित होई करे मन लाऊ। 7किबेकी बहू लोका का दुष्टात्मा चिलाऊंदे -चिलाऊंदे निकदी, होर बहू लकबे रे रोगी होर लेगड़े भी ठीक होई। 8होर तेऊ नगरा में बडआ आनन्द होऊ।

जादूगर शामोन

9एता पहिले तेऊ नगरा में शिमोन ना रअ एक मणश रहंदा थी, जोह जादू टोना करी सामरिया लोका हेरान करदअ रंहदा थी, होर आपणे आपा बे बडअ मणश माना थी। 10होछे बडे सभे तेऊरा आदर करा थी, यह मणश परमेश्वरा री सह सामर्थ साहा, जोह महान कहलाऊँदा। 11तेऊ बहू धयाडी तणी आपणे जादू रे कामा संघे हेरान डाही एढ़ी तरह त्याह तेऊ बहू माना थी। 12पर जेबा त्याह फिलिप्पुस पैंदे बुशाह करू जोह परमेश्वरा रे राज्य होर यीशु मसीहा रे ना रा सुसमाचार शूणाऊंदा थी, तेबा केह बेटडी कह मर्द, बपतिस्मा लंऊदे लागे। 13तेबा शिमोने भी आपे बुशाह करू होर बपतिस्मा लऊ होर फिलिप्पुसा संघे रंहदअ लागअ। सह चिन्ह होर सामर्थ्य रे काम हेरी करे हेरान हुंदा थी।

सामरिया में पतरस होर यूहन्ना

14जेबा प्रेरिते जोह यरूशलेमा में, शूणू कि सामरिय परमेश्वरा रा बचन मांनू तेबा पतरस होर यूहन्ना त्याह सेटा भेजी। 15त्याह नांही करे त्याह री तणी प्रार्थना करी कि पवित्र आत्मा पाए। 16किबेकी सह मची तणी त्याह मेंज़ा का कोही पैंदे आज तणी नांई ऊतरी थी। त्याह तअ सीधी परमेश्वर यीशु रे ना रा बपतिस्मा लऊ थी। 17तेबा त्याह पैंदे हाथ डाही होर त्याह पवित्र आत्मा भेटी। 18जेबा शिमोने हेरू कि प्रेरितों रे हाथा डांहण का पवित्र आत्मा ईहदा तेबा तेऊ सेटा ढबे आंणी करे बोलू, 19यह शक्ति माह भी दे, कि जासू-कासु पैंदे हाथ डाहे सह पवित्र आत्मा पाए। 20पतरसे तेऊबै बोलू, तेरे ढबे तांई संघे नष्ट हो, किबेकी ताई परमेश्वरा रा दान ढबे संघे लऊंणे रा न्याय करू। 21ऐसा गला में ना तेरा हिस्सा, ना भाग, किबेकी तेरा मन परमेश्वरा रे सामने सीधा नांई आंहदा। 22तेबा आपणी एेसा बुराई का मन फेरी करे परमेश्वरा का प्रार्थना करना ठीक साहा, कि तेरे मना रा न्याय क्षमा होला। 23किबेकी हाँऊ हेरा कि तूह पिता री कडबाहट संघे होर अधर्मी रे बंधना में पडू दअ साहा। 24शिमोने उतर दीना, तमे लोका ही प्रभु का मेरी तणी प्रार्थना करा कि जोह गला तांई बोली, त्याह में कोहे भी माह पैंदे नांई पड़े।

25तेबा सह गुआही देई करे होर परमेश्वरा रा बचन शुंणी करे यरूशलेमा बे नाठअ होर सामरिया रे बहू ग्रां में सुसमाचार शूणाऊ।

फिलिप्पुस होर कूश देश रा अधिकारी

26तेबा परमेश्वरा रे एकी दूते फिलिप्पुसा का बोलू, उठ होर दक्षिणा फेरा बे तेसा बाता नांह, जोह यरूशलेमा कअ गाजा शहरा बे नांहदा। यह सुनसान बात साहा। 27सह उठी करे नाठअ होर हेरा, कुश देशा रअ एक मणश इंहदअ, लागअदअ थी, जोह खोजा होर कुशियो री राणी कन्दाके रअ मंत्री होर खजांची थी। सह नमस्ते करदअ यरूशलेमा में आऊअ थी। 28सह आपणे रथा पैंदे, बेठदअ, होर यशायाह भविष्यद्वक्ता री कताबा पढ़दे-पढ़दे, नांहदअ लागअदअ थी। 29तेबा आत्मा फिलिप्पुस का बोलू, सेटा नाशी करे एऊ रथा संघे नांह। 30फिलिप्पुस तेऊ फेरा बे ठुहरु होर यशायाह भविष्यद्वक्ता री कताबा पढ़दअ शूणू होर पुछु, तूह जोह पढ़दअ लागअदअ केह तेता समझदा भी? 31तेऊ बोलू, जेबरे तणी माह कोह नांई समझाए माह कढे समझणा? होर तेऊ फिलिप्पुस बिनती करी कि चढी करे तेऊ सेटा बेशे। 32पवित्र शास्त्रा रअ जोह अध्याय जोह सह पढ़दअ, लागअदअ सह यह थी, सह भेडा रे समान मरणे री तणी पजेरू होर जेढ़अ गाभू आपणे काटण आले सामने चुपचाप रंहदा तेडी तरहा तेऊ भी आपण मुंह नांई खोलू। 33तेऊरी दीनता में तेऊरा न्याय नांई होई पाऊ। तेऊ वक्ता रे लोका रा बर्णन कासु करणा? किबेकी धरती का तेऊरी जिंदगी धरती पैंदे खत्म हुन्दी लागी दी साहा।

34एता पैंदे खोजे फिलिप्पुस का पुछु, हांऊ ताहा का बिनती करदा, यह खोज की भविष्यद्वक्ता यह कासके बारे में बोलदा, आपणे या होरा रे बारे में। 35तेबा फिलिप्पुस आपण मुंह खोलू, होर तेऊ शास्त्रा कअ पहिले का शुरू करी करे यीशु रा सुसमाचार शूणाऊ। 36बाता नांहदे-नांहदे त्याह एक पाणी री जागहा पूजे तेबा खोजे बोलू, हेर अखे पाणी सा एबा माह बपतिस्मा लऊणे में कह रोक साहा। 37फिलिप्पुस बोलू, ज़ेबा तूह सारी मना संघे करदा तेबा ही तूह लई सकदा। तेऊ उतर दीना, हांऊ बिश्वास करदा कि यीशु मसीह परमेश्वरा रअ शोहरू साहा। 38तेबा तेऊ रथ खड़ करने री आज्ञा दीनी होर फिलिप्पुस होर खोजा दुहे पाणी में उतरी होर तेऊ खोजे बे बपतिस्मा दीना। 39जेबा सह पाणी मेंज़ा का निखली करे उझे आऊअ, तेबा परमेश्वर रा आत्मा तखे आऊआ होर फिलिप्पुस चकी करे नींऊ होर सह आनंद करदे-करदे आपणी बाता नाठअ। 40फिलिप्पुस अशदोद में आऊअ होर जेबरे तणी कैसरिया में नांई पूजअ तेभरे तणी नगरे-नगरे सुसमाचारा सुणाऊंदअ रहू।

Currently Selected:

प्रेरित 8: ISJNT

Highlight

Copy

Compare