प्रेरित 10

कुरनेलियुस रा पतरस शादणअ

1कैसरिया शहरा में कुरनेलियुस ना रअ एक मणश, इतालियानी ना कअ पलटना रअ सुबेदार थी। 2सह भक्त थी, होर आपणे सारे घराने समेत परमेश्वरा का डरदा थी, होर यहूदी लोका बे बहू दान दिंदा, होर बराबर परमेश्वरा री प्रार्थना करदा थी। 3तेऊ धयाडी रे चिंहुणे पहरा रे नेड स्पष्ट रूपा में हेरू कि परमेश्वर रअ एक स्वर्गदूत तेऊ सेटा ईछी करे बोलदा, हे कुरनेलियुस! 4तेऊ सह ध्याने संघे हेरू होर डरी करे बोलू, हे परमेश्वर कैह साहा? तेऊये तेऊबै बोलू, तेरी प्रार्थना होर दान परमेश्वरा सेटा पूजे; 5होर एबा याफा में मणश भेजी करे सिमोना बे, जोह पतरस कहलाऊंदा बुलाबा भेजूं। 6सह शिमोना रे चमड़े रे व्यापारी सेटा परआहूणअ साहा, जासकअ घर समुद्रा रे किनारे साहा। 7जेबा स्वर्गदूत जासु तेऊ संघे गला करी नाठअ, तेबा तेऊ दुई सेबक, जोह सदा तेऊ सेटा रंहदा थी, त्याह मेंज़ा का एक भक्त नोकरे शादू, 8होर त्याह सारी गला खोजी करे याफा बे भेजी।

पतरसा रा दर्शन

9दूजे धयाडे हांडदे-हांडदे नगरा सेटा पुजे, तेबा दोपहरे पतरस छापरे प्रार्थना करदअ चहडू। 10तेऊ भोछ लागीदी, होर कुछ खांणा चांहदा थी, पर जेभरे त्या तैयारी करदे लागदे थी तेबा सह बेहोश होऊ। 11होर तेऊ हेरू कि सरग खुलू, होर एक पात्र बड़ी चादरा रे समान चाहर कूंणे लटकदे धरती पैंदे उतरदे लागे। 12जासू में धरती रे सभे चऊ टांगा आले होर रेंगणे आले जंतु होर सरगा रे चेलू थी। 13तेऊ एक एडा शब्द शूणू, हे पतरस उठ मार होर खा। 14पर पतरसे बोलू, नांई परमेश्वर, कधी नांई; किबेकी मांई मची तणी अपवित्र होर अशुद्ध चीजा मची तणी नांई खाई। 15तेबा दूजी बारी भी तेऊ शब्द शूणू, जोह कुछ परमेश्वरे शुद्ध ठहराऊ, तेता तूह अशुद्ध नांई ठहरा। 16चीण बारी एडा ही होऊ; तेबा तेभरी सह पात्र सरग बे उडू। 17जेबा पतरसे आपणे मना में दुविधा में थी, कि यह दर्शन जोह मांई हेरू कैह होई सकदा, तेबा हेरा, त्याह मणश शिमोन जूंणा कुरनेलियुस भेजी दे थी, शिमोना रे घरा रा पता लाई करे तेऊरे साबे री डेहली सेटा खड़े होई। 18होर पुकारी करे पूछदे लागे, कैह शमौन जोह पतरस कहलाऊँदा, अखे परआहुणअ साहा। 19पतरसे तेऊ दर्शना रे बारे में सोचदअ लागअदअ थी, कि आत्मा तेऊबै बोलू, हर चीण मणश तेरी खोजा में साहा। 20अतः उठ होर ऊंहदे नाह होर शर्म करे त्याहा संघे नाह, मांई ही त्याह भेजी दे साहा। 21तेबा पतरस ऊतरु होर त्याहे मणशा बे बोलू, हेरा जासू लोडदे तमे आउदे साहा हाँऊ साहा थारे ईहणे रा कारण कैह साहा? 22त्याहए बोलू, कुरनेलियुस सुबेदार जोह धर्मी होर परमेश्वरा का डरणे आलअ होर सारी यहूदी जाति में सुनाम मणश साहा, तेऊ एकी पवित्र स्वर्गदूता का निर्देश पाऊ की सह ताह आपणे घरे शदाई करे बचन शूणे। 23तेबा तेऊ त्याह भीतर शदाई होर त्याहरी पाहूनचारी करी। होर दूजे धयाडे सह त्याह संघे नाठअ, होर याफा रे भाई मेंज़ा का एखा तेउ संघे नाठे।

कुरनेलियुसा रे घरे पतरस

24दूजे धयाडे त्याह कैसरिया पूजे होर कुरनेलियुस आपणे टबर होर प्रिय मित्र कठे करी होर त्याह रे हाला-चाला पूछदअ लागअ 25जेबा पतरस भितरा बे, लागअदअ इंहदअ, तेबा कुरनेलियुस तेऊ संघे भेंट करी होर तेऊरी टांगा पैंदे पड़ी करे नमस्ते करू। 26पर पतरस चुआकि करे बोलू, खडअ हो हाँउ भी तअ मणश साह। 27होर तेऊ संघे गला करदे-करदे भितरा बे नाठअ होर बहू लोका कठे हेरी 28तेऊ बोलू, तूह जाणदा कि अन्यजाति संघे संगति करणा या अखे नांहणा यहूदी बे अधर्म सा, पर परमेश्वरे माह बे खोजू कि कासु भी मणशा बे अपवित्र या अशुद्ध नांई बोले। 29एढ़ी तरह जेबरे हाँऊ शादू बिना कुछ बोले आऊअ। एबा हाँऊ पूछदा कि हाँऊ किजकी तणी शादू दअ?

30कुरनेलियुसे बोलू, ऐसा घड़ी पुरे चार धयाडे होई, हाँऊ आपणे घरे चीहूंणे पहरे प्रार्थना करदअ लागअ थी, एक मणश चमकीले झिकड़े बानही माह सामने खडअ होऊ। 31होर बोलदअ लागअ, हे कुरनेलियुस, तेरी प्रार्थना शूणी होर तेरे दान परमेश्वरा रे सामने स्मरण करी। 32तेबा कासु याफा भेजी करे सिमोन जोह पतरस कहलाऊँदा, शादु। सह समुन्दा रे किनारे शिमोन चमड़े रा काम करने आले रे घरें मेहमान थी। 33तेबा मांई तेभरी ताह सेटा लोका भेजी होर तांई सह रांबडा करू जोह तूह आऊअ। एबा हामे सभे अखे परमेश्वरा रे सामने आसा, कि जो कुछ परमेश्वर ताह कअ बोलू तेऊ शूणे।

पतरसा रा उपदेश

34तेबा पतरस बोलू, एबा माहा हल्का होऊ कि परमेश्वर कासी रा पक्ष नांई लउंदअ, यह सचाई आसा। 35हर एक जाति जोह तेऊका डरदा होर धर्मा रे काम करदा, त्या तेऊ शोभले लागा। 36जोह बचन तेऊ इस्राएलियों सेटा भेजी, जेबा तेऊ यीशु मसीह रे साबे (जोह सभी रा परमेश्वर सा) शांति रा सुसमाचार शूणाऊ। 37सह बचन जोह तमे जाणदा, जोह यूहन्ना रे बपतिस्मा रे प्रचारा बाद गलीला का शुरू होई करे यहूदिया में फैलू : 38परमेश्वरे कासु रीति संघे यीशु नासरी रा पवित्र आत्मा होर सामर्थ्य संघे अभिषेक करू; सह भलाई करदा, होर सभी जोह शैताने दुखी करी दे, रांबडे करदा, किबेकी परमेश्वरे तेऊ संघे थी। 39होर हामा त्याहा सभी कामा रे गुआही साह; जोह यहूदिया रे देशा में होर यरूशलेमा में करी, होर त्याहे सह क्रुसा रे काठा पैंदे लटकाई करे मारू। 40सह परमेश्वरे चीहूँणे धयाडे जिऊंद करू होर प्रगट भी करू; 41सभे लोका नांई पर त्याह गुआही जूंणा परमेश्वरे पहिले ही चूनीदे, मतलब हामा पैंदे तेऊरे जी ऊठणे बाद तेऊ संघे खाऊ पीऊ। 42होर तेऊ हामा बे आज्ञा दीनी कि लोका में प्रचार करा होर गुआही देया, कि यह सह साहा जूण परमेश्वरे जिऊंदअ होर मुंएदे रअ न्यायी ठहराऊ। 43तेऊरी सभे भविष्यद्वक्ता गुआही दिंदा कि जोह कोहे तेऊ पैंदे बुशाह करलअ, तेऊ तेऊरे ना का पापा का क्षमा भेटणी। अन्य जाति पैंदे पवित्र आत्मा ऊतरणा। 44पतरस याह गला बोलदअ लागअदअ, कि पवित्र आत्मा बचना शूणणे आले सभी मणशा में आऊआ। 45होर जेतरे खतना करीदे बुशाही पतरसा संघे आएदे थी, त्याह सभे हैरान होई कि अन्यजाति पैंदे भी पवित्र आत्मा रा दान ऊंडेलू दा साहा। 46किबेकी त्याह होरी-होरी भाषा में बोलदे शूणी होर परमेश्वरा री बड़ाई करदे भी शूणी एता पैंदे पतरसे बोलू, 47कैह कोई पाणी रोकी सकदा कि या बपतिस्मा नांई पाए, जासू हमारे समान पवित्र आत्मा पाऊदा साह? 48होर तेऊ आज्ञा दीनी कि याहबे यीशु मसीह रे ना का बपतिस्मा देया। तेबा त्याहे तेऊका बिनती करी कि सह कुछ धयाडी होर त्याह संघे रहे।

Currently Selected:

प्रेरित 10: ISJNT

Highlight

Copy

Compare