प्रेरित 7
7
स्तिफनुस रा भाषण
1तेबा महायाजके बोलू, केह या गला सच साहा? 2स्तिफनुस बोलू, हे भाईयो, होर बापुओ शूणा। महारअ बापू अब्राहम हरान में बसणे का पहिले मैसोपोटामिया में थी; तेबा तेजोमय परमेश्वरे तेऊबै दर्शन दिने। 3होर तेऊबे बोलू, तूह आपणे देशा होर आपणे परिबारा का निखली करे तेऊ देशा बे नाहे , जासू हाँउ रिहाऊलअ। 4तेबा सह कसदिया रे देशा का निखली करे हराना में बसु; तेऊरे बापू मरणे बाद परमेश्वरे सह तखा का आणू होर एऊ देशे बसाऊ जासू मे तमे एबा रंहदा। 5होर तेऊबै कुछ बिरासत नांई दीनी पर टांगा डांहणे बे भी जागहा नांई दीनी पर प्रतिज्ञा करी कि यह देश तेरअ होर ताह बाद तेरे बंशा रे हाथे करणअ तेता पहिले तेऊरे कोहे शोहरू नांई आंहदअ थी। 6होर परमेश्वरे एडा बोलू, तेरी संताना रे लोका पराये देशा में परदेशी हूंणे । होर त्याह त्या नोकर बनाऊँणे होर चार शअ साला तणी त्याह त्या वे दुःख दीणा। 7तेउकी परमेश्वरे भी बोलू, जासू जाति रे त्या नोकर होले, त्यावे माह दोष लाऊणा, होर एता बाद निखली करे ऐसी जागहा मेरी सेवा करणी। 8होर तेऊये तेऊ संघे खतने री वाचा बानी होर एढ़ी दशा में इसहाक होऊ होर आठे धयाडे तेऊरा खतना करू; होर इसहाका का याकूब होर याकुबा का बारह कुलपति होई।
9होर कुलपतिये यूसुफा का रोष करी करे सह मिस्रा नांहणे आले रे हाथे बेचू। पर परमेश्वर तेऊ संघे थी। 10होर सह तेऊ सभी दुखा का छुड़ाईकरे मिस्रा रअ राजा फिरौना री दृष्टी में अनुग्रह होर बुद्धी प्रदान करी होर तेऊ सह मिस्र होर आपणे सारे घरा रअ बईद नियुक्त करू। 11तेबा मिस्र होर कनाना रे सारे देशा में आकाल पडू; जासू संघे भारी कलेश पडू होर महारे बापू दादा वे खांणा नांई भेटा। 12पर याकूब यह शूणी करे कि मिस्रा में नाज साह, माहरे पहिले बजुर्ग भेजी। 13दूजी बारी यूसुफ आपणे भाई वे प्रगट होऊ होर यूसुफा री जाति फिरौना पता लागी। 14तेबा यूसुफ आपणे आमा पापा याकूब होर आपणे सारे प्राणी, पजतर मणश, शदाई। 15तेबा याकूब मिस्रा वे नाठअ होर तखे सह होर महारे वजुर्ग मुंए। 16त्यारे शब् शकेमा में पजेरी होर तेसा कब्रा में डाही, जूंण अब्राहम चांदी देईकरे शेकेमा में हमोरा री संताना का लई दी थी।
17पर जेबा तेसा प्रतिज्ञा रा पुरे हूंणे रा बक्त नेड आऊआ जोह परमेश्वरे अब्राहमा का करी थी, तेबा मिस्रा में त्या लोका बड़दे लागे होर बहू होई। 18तेबा मिस्रा में होर राजा होऊ जोह यूसुफा नांई जांणदअ थी। 19तेऊ महारी जाति संघे चालाकी करी करे महारे बजुर्गा संघे बुरा व्यबहार करू, कि त्या आपणे शोहरू छाडणे पड़ी कि त्याह जींउदे ना रहे। 20तेऊ वक्ते मूसा ऊत्पन्न होऊ। सह परमेश्वरे री दृष्टि में बहू ज्यादा शोभलअ थी। सह चीण महीने तणी आपणे बापू रे घरे पलू। 21जेबरे फेंकू तेबा फिरौना री शोहरीए सह चुआकु होर आपण शोहरू मानी करे पालू। 22मूसा बे मिस्रा री सारी बिद्या पढाई, होर यह बचन होर कर्म दूही में सामर्थ्यी थी।
23जेबा यह चाहली साला रअ होऊ, तेबा तेऊरे मना में आउआ कि हाऊं आपणे इस्राएली भाईया सेटा मिलदअ नाशू। 24तेऊ एकी मणशा पैंदे बुराई हुंदे वक्ते सह बचाऊ, होर सह मिस्री मारू होर सह सताऊ होर बदला लऊ। 25तेऊ सोचू कि तेऊरे भाई समझणा कि परमेश्वरे तेऊरे हाथा का उद्धार करणा पर त्याह नांई समझी। 26दूजी धयाडी त्या तेवा आपु में लडदे लागे थी, तेबा सह तखे आऊअ होर एडा बोली करे त्यावे आपु में मेल करणे वे बोलू, हे पुरुषों, तमें भाई-भाई साहा, एकी दूजे पैंदे किवे लाईदी बुराई करनी? 27पर जोह आपणे पडोसी पैंदे बुराई करदअ लागदअ थी, तेऊये सह एडा बोली करे हटाऊ, तूह कासुये हामा पैंदे हाकिम होर न्यायी ठहराऊ। 28कैह जासू रीति का तांई हीज मिस्री मारू माह भी मारणा चांहदा। 29यह गल शूणी करे मूसा ठुरू होर मिधान देशा में परदशी होई करे रंहदअ लागअ होर तखे तेऊरे दुई शोहरू होई।
30जेबा पुरी चाहली साला बीती, तेबा एक स्वर्गदूत सीनै पहाडा रे बूणे झाखडा री जलदी आगी में दर्शन दिने। 31मूसा तेऊ दर्शना हेरी करे हैरान होऊ, जेबा हेरणे री तणी सह नेड नाठअ, तेबा परमेश्वरा रअ यह शब्द शुणू, 32हाँऊ तेरे बजुर्गा, अब्राहम इसहाक होर याकूबा रअ परमेश्वर साहा; तेबा मूसा कांबू, अखे तणी कि तेऊ हेरणे री भी हिम्मत नांई रही। 33तेबा परमेश्वरे बोलू, आपणी टांगा रे बूटा खोल, किबेकी जासू जमीना मे तूह खडअ साहा, यह पवित्र जागह साहा। 34मांई सची जोह लोका मिस्रा में साहा, त्या री बुरी हालता माई हेरी; होर त्याहरी हाए होर लेरणा शूणू; तेबा त्याह छुड़ाउणे री तणी ऊतरु दअ साहा। एबा इच्छ माह तूह मिस्रा वे भेजणअ।
35जूंण मूसा त्याहे यह बोली करे नकारू कि तूह कासु महारअ हाकिम, होर न्यायी ठहराऊ? त्याही वे परमेश्वरे का न्यायधीश होर मुक्ति रे रूपा में त्याह सेटा सहे स्वर्गदूत भेजू थी, जासुये तेऊबे झाड़ी मे दर्शन दीने थी। 36यह मणश मिस्र होर लाल समुन्द्र होर बूणे चाहली साला तक चमत्कार होर चिन्ह रिहाई-रिहाई करे त्याह काह्डी आणी। 37यह सहे मूसा साहा, जासू इस्राएली वे बोलू, परमेश्वर थारे भाई मेंजा कअ थारी तणी माहा जेहडअ एक भविष्यद्वक्ता चकणअ । 38यह सहे साहा जासूए जंगले कलीसिया मंजे तेऊ स्वर्गदूता संघे सीनै पहाडा पैंदे तेऊ संघे गला करी होर महारे पूर्वजा संघे थी। तेऊ जिऊंदअ बचन भेटअ कि हामा सेटा पजेरे। 39पर माहरे वजुर्गे सह नांई मनु पर सह हटाई करे आपणे मन मिस्रा फेरा वे फेरी। 40होर हारुने बोलू, महारी तणी एडह देऊ बंणू, जोह हामा ज़ेह-ज़ेह हांडे किबेकी यह मूसा जोह मिस्र देशा कअ काहडी आंणु , हामे नांई जांणदे कि तेऊ कैह होऊ? 41त्याह धयाडी त्याह एक बाकरअ बणाई करे होर तेऊरी मूर्ति सेटा बलि चढाई; होर आपणे हाथा रे कामा में मगन हुंदे लागे। 42होर परमेश्वरे मुंह फेरी करे त्याह पीछे छाडी, कि सरगा रे नक्षत्रा री पूजा करणे री तणी छाडी दीनी, जेड़ा भविष्यद्वक्ता री कताबा में लिखुदा साहा,
हे इस्राएला रे घराने कैह तमे बूणा में चाहली साला तक पशु बलि होर अन्न बलि चढ़ाउदे रही?
43तमे लोका मोलेका रे तांबू होर रिफान देउया रे तारे री तणी फिरदे रही,
मतलब त्याह मूर्ति जूंणा तमे नमस्ते करणे री तणी बणाईदी अतः माहा तमे बाबेल पोरी नी करे बसाऊंण।
44असल में सुनसान प्रदेशा में हमारे बजुर्गा सेटा गुआही रअ तांबू थी, परमेश्वरे मूसा वे एतके बारे में यह आदेश दीना दा थी, ताई जो मूर्ति हेरी थी तेथी रे साबे तेता बणा। 45तेऊ तांबू महारे बजुर्ग पुर्बकाला का पाईकरे यहोशू संघे अखा वे आंणू जासु वक्ते कि त्याह अन्य जाति पैंदे आधिकार पाऊ, जूंणा परमेश्वरे माह रे बजुर्गा रे सामने का काहडी दीना, होर तांबू दाऊदा रे बक्ता तणी रहू। 46तेऊ पैंदे परमेश्वरा अनुग्रह करू, अतः तेऊ बिनती करी कि याकूबा रे परमेश्वरा वे रंहणे वे तांबू बणाए। 47पर सुलैमाने तेऊबै घर बणाऊ। 48पर परमप्रधान हाथा रअ बाणाई दे घरा में नांई रंहदा जेढ़ा कि भविष्यद्वक्ता बोलूदा, 49परमेश्वर बोलदा, स्वर्ग मेरा सिंहासन होर धरती मेरी जान्घा थाई चौउकी साहा, मेरी तणी तमा कैहडअ घरअ बनाऊंणअ? होर मेरे बिश्रामा री तणी कुंणअ स्थान हूंणअ। 50कैह या सभे चीजा मेरे हाथा री बणाईदी नांहदी? 51हे हठीले होर मना होर कनेटा रे खतना रहित लोकाे तमा सदा पवित्र आत्मा रा बिरोध करू जेड़ा थारे बजुर्ग करदा, तेहडा तमे भी करू। 52भविष्यद्वक्ता कूण साहा एडअ जूंण थार बजुर्ग नांई सताऊ? त्याहे तेऊ धर्मी रे इंहणे रा पहीले का संदेशा दीणे आले मारी होर एबा तमे भी तेऊ ढाकणे आले होई। 53तमे स्वर्गदूता रे सभी ठहराईदी व्यवस्था पाई पर तेतका पालन नांई करू।
स्तिफनुसा री हत्या
54याह गला शूणी त्याह रोष होऊ, होर मना में तेऊबै गाली दिंदे लागे। 55पर तेऊ पवित्र आत्मा संघे परिपूर्ण होई करे स्वर्गा बे हेरू होर परमेश्वरा री महिमा होर यीशु परमेश्वर रे दाहिनी फेरे खडअ हेरी करे, 56बोलू, हेरा हाऊं स्वर्गा खुले हेरा होर मणशा रे शोहरू परमेश्वरा रे दाहिने फेरा खडअ हेरा। 57तेबा त्याह ज़ोरा रे शब्दा में जोरे करे कनेट बंद करी, होर एक हाथ तेऊ पैंदे झपटी। 58होर सह शहरा का बागे काहडी करे तेऊ पैंदे पाथर फेकदअ लागअ । गुआही आपणे झिकड़े शाऊला ना रे एकी जुआना री टांगा सेटा खोली करे डाही। 59त्याह स्तीफनुस पैंदे पथराब करदे रही होर सह यह बोली करे प्रार्थना करदअ रहू, हे परमेश्वर यीशु, मेरी आत्मा ग्रहण कर। 60तेबा घुटने टेकी करे ज़ोरे-ज़ोरे पुकारू, हे परमेश्वरे, यह पाप त्याह पैंदे नांई लाए। होर यह बोली करे सूतअ।
Currently Selected:
प्रेरित 7: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
