प्रेरित 22

बहु लोका रे सामने पोलुसा रा भाषण

1हे भाईओ होर बजुर्गो, मेरा प्रतिउत्तर शुंणा, जोह मांई एबा तमा सेटा प्रस्तुत लाऊ करणा। 2त्याह यह शूणी करे कि सह हामा कअ इब्रानी भाषा में बोलदअ लागअ, होर चुप होई, तेबा तेऊ बोलू। 3हाऊं यहूदी साहा जोह किलिकिया रे तरसुसा में जन्मुदअ, पर एऊ नगरा में मेरा पालन पोषण होऊ होर गमलीएल रे चरणा में बेशी करे बजुर्गा री व्यवस्था रे साबे ठीक रीति संघे सिखाऊ, होर परमेश्वरा रे प्रति उत्साहे संघे भरूदअ। जेहड़े आज तमे साहा। 4मांई मर्द होर बेटडी दुहे बान्ही-बान्ही करे जेला में ठोकी; यह पन्थ अखे तणी सताउ कि त्याह मांई मारी भी पाई। 5ऐसा गला री तणी महायाजक होर बजुर्ग भी गुआही साहा, कि त्याहा में का मांई भाई रे ना पैंदे चिठ्ठी लई करे दमिश्का का चलू, कि तखे लोका बंदी बणाई करे यरूशलेम बे आऊये।

आपणे मना रे बदलणे रे बारे में

6जेबा हाऊं हांडदे-हांडदे दमिश्का सेटा पूजअ तेबा एडहा होऊ कि दोपहरा रे लगभग एका-एक बडा प्रयाषा सरगा का मेरे चहु तरफे चमकू। 7होर हाऊं माटे पैंदे पडू होर यह शब्द शूंणू, हे शाऊल, हे शाऊल, तूह माह किबे सताउन्दा? 8मांई उतर दीना, हे परमेश्वर तूह कुंण सा? तेऊ उतर दीना, हाऊं यीशु नासरी साहा जासू तूह सताउन्दा। 9मेरे संघी प्रयाषा तअ हेरू पर माहा संघे गल्ला करणे आले रे शब्द नांई शूंणी। 10तेबा मांई बोलू, हे परमेश्वर हाँऊ कैह करू? परमेश्वरे माह का बोलू, ऊठी करे दमिश्का बे नांह, होर तखे ताह सह सब जोह तेरे करणे री तणी ठहराऊदा साहा खोजणा। 11तेबा तेऊ प्रयाशे रे तेज हूंणे री बजहा माह किच्छे नांई हेरू होर आपणे संघी रअ हाथ ढाहकी करे दमिश्का में पूजअ। 12तेबा हनन्याह ना रअ व्यवस्था रे साबे एक भक्त मणश, जोह तखे रहणे आले सब यहूदी रअ सुनाम थी; माह सेटा आऊअ। 13होर खड़े होई करे माह का बोलू, हे भाई शाऊल! ताह हेरदा लागे। तेबा मेरी आच्छी खुली होर माह भी हेरदा लागा। 14तेबा तेऊ बोलू, माहरे बजुर्गा रे परमेश्वरे तूह एतकी तणी ठहराऊ की तूह तेऊरी इच्छा जांणे होर तेऊ धर्मी हर कोई हेरे होर तेऊर मुंहा का गला शुंणे। 15किबेकी तूह त्याह फेरा का सभी मणशा रे सामने त्याह गला रअ गुआही हूंणअ जोह तांई हेरी होर शूंणी। 16एबा तूह देर किबे करदा? ऊठ बपतिस्मा लअ, होर तेऊरा ना लईकरे आपणे पापा धो।

अन्य जाती में प्रचार करणा

17तेबा एडहा होऊ कि जेबा हाऊं यरूशलेमा बे बापस इच्छी करे मंदिरा में प्रार्थना करदअ लागअदअ थी, तेबा हाऊं बेहोश होऊ, 18होर सह हेरू कि सह माह का बोलदा, छेकअ कर यरूशलेम का छेको निखल, किबेकी त्याह मेरे बारे में तेरी गुआही नांई मानणी। 19मांई बोलू, हे परमेश्वर एता तुहे जाणदा कि हाँऊ ताह पैंदे बुशाह करणे आले जेला में पांऊंदा, होर जागहा-जागहा प्रार्थना घर में चिकदा थी। 20जेबा तेरे गुआही स्‍तीफनुस रा लोहू बहाऊ, तेबा हांऊ भी तखे खडअ थी, होर ऐसा गला का सहमत थी, होर तेऊ मारणे आले रे झिकड़े भी रखबाली करदा थी। 21होर तेऊ माह का बोलू, नांह, किबेकी माह तूह अन्यजाति सेटा दूर-दूर भेजणअ। 22त्याह ऐसा गला तणी तेऊरी शुंणदे रही, तेबा ज़ोरे एकी शब्दा में चिल्लाई, एह्ड़े मणशा रा धरती मे का अंत करा, एऊरा जिऊंणा ठीक नांई आंहदा। 23जेबा त्याह चिल्लाई-चिल्लाई करे होर आपणे झिकड़े ऊछालदे होर धुडे चुआकदे लागे। 24तेबा सेनापति तेऊ किले बे नींणे बे बोलू होर आज्ञा दीनी कि तेऊबै कोड़े मारी करे जाँच करी कि हाँऊ यह जांणी सके कि लोका किबे एऊ पैंदे चिल्लाऊँदे लागदे। 25तेबा त्याहे सह तसमे संघा बान्हू तेबा पौलुसे सुबेदारा बे जोह सेटा खडूदअ थी, बोलू कैह यह कानूना रे सावे ठीक साहा कि तमे एकी रोमी मणशा, होर यह भी बीना कासु दोषे संघे, कोड़े मारणे? 26सुबेदारे यह सुणी करी आपणे सरदारा बे बोलू, तूह यह कैह करदा? यह तअ रोमी मणश साहा। 27तेबा सरदारा सेटा इच्छी करे बोलू, माह खोज कैह तूह रोमी सा? तेऊ बोलू, हां। 28यह शुंणी सरदारे बोलू, मांई रोमी नागरिकता बहू ढब्बे देईकरे पाई दी सा। पौलुसे बोलू, पर हाऊं जन्मा का रोमी साहा। 29तेबा जोह लोका तेऊ जाँचदे, लागदे थी, त्याह तेभरी तेऊ सेटा का हटी होर सेनापति भी यह जांणी करे कि यह रोमी साहा होर यह रोमी साहा, डरु। 30पर दूजे धयाडे, यह निश्चय करण री तणी कि यहूदियों किबे एऊ पैंदे यह आरोप लाउंदा तेऊ सह खोलू होर प्रधान याजका होर सारी महासभा कठे हूंणे री आज्ञा दीनी, होर पौलुस ऊंहदे नी करे त्याह रे सामने खड़अ करू।

Currently Selected:

प्रेरित 22: ISJNT

Highlight

Copy

Compare