प्रेरित 23
23
1पौलुसे महासभा फेरा बे टकटकी लाई लगातार हरदअ रहु, होर बोलू, हे भाईओ मांई आज तणी परमेश्वरा बे बिलकुल शोभले मना संघे जीबन बिताऊ। 2एता पैंदे हनन्याह महायाजक त्याहबे जोह तेऊ सेटा खड़े थी, तेऊरे मुंहे थपडा मारणे री आज्ञा दीनी। 3तेबा पौलुसे तेऊ वे बोलू, परमेश्वरा तूह मारणअ। तुह व्यवस्था रे साबे मेरे न्याय करदअ बैठअ आसा, होर तेउकी ब्यवस्था रे बिरोधा में माहा मारने री आज्ञा दीन्दा? 4जोह सेटा खडे थी, त्याहे बोलू, कैह तूह परमेश्वरा रे महायाजक बे भला बुरा बोलदा? 5पौलुसे बोलू, हे भाईओ हाऊं नांई जांणदअ, कि यह महायाजक साह, किबेकी लिखुदा सा, आपणे लोका रे प्रधाना बे बुरा नांई बोले।
6तेबा पौलुसे यह जाणी करे कि एक दल सदूकियों होर दूजअ दल फरीसी रअ साहा, महासभा में पुकारी करे बोलू, हे भाईओ, हाँऊ फरीसी होर फरीसी रे बंशा रअ सा मुंएदे री आशा होर पुनरुत्थाना री बजह संघा मेरा न्याय हुंदा लागादा। 7जेबा तेऊ याह गला बोली, तेबा फरीसी होर सदूकि बीचे झगडा हुंदा लागा; होर सभी में फुट पड़ी। 8किबेकी सदूकि तअ यह बोलदा साहा, कि ना पुनरुत्थान साह, नाह स्वर्गदूत, होर नाह दुष्टात्मा पर फरीसी याह सभी मनदा।
9तेबा बड़ा हाला मचु होर कुछ शास्त्री जोह फरीसी दला रे, खडे उठी होर यह बोली करे झगडदे लागे, हामा एऊ मणशा में कोई बुराई नांई पाई होर ज़ेबा कोई दुष्टात्मा या स्वर्गदूत तेऊका बोला तेबा होर कैह? 10जेबा झगडा बहू बढ़ू तेबा सेनापति डरु कि कंही त्याह पौलुसा रे टुकड़े-टुकड़े नांई करे, एतकी तणी तेऊ सैनिका बे आज्ञा दीनी कि ऊंहदे नांही करे त्याह बीचा मेंज़ा का जबरदस्ती काहडी करे किले बे नींए। 11तेसी राची परमेश्वरे तेऊ सेटा खड़े होई करे बोलू, हे पौलुसा, होसला डाह, किबेकी जेह्डी तांई यरूशलेम में गुआही दीनी, तेहडी ताह रोमा में भी गुआही दीणी आई।
पोलुसा री हत्या रे बारे में गल्ला
12जेबा धयाडी होई तेबा यहूदी षड्यंत्र रचू होर शपथ खाई कि जेबरे तणी पौलुसा मारी नांई पाये तेभरे तणी ना हामा खांणा ना पींणा। 13त्याह आपू में कसम खाई दी थी, त्याह चाहली मणशा का खासे थी। 14तेबा त्याह प्रधान याजक होर बजुर्गा सेटा बोलदे लागे, हामे कसम खाई कि जेबरे तणी पौलुसा मारी नांई लऊले तेभरे तणी हामा किछे नांई खांणा। 15तेबा एबा तमे होर महासभा सेनापति समझा कि तेऊ आपू सेटा बहाने संघे शादा कि तमा तेऊरे बारे में जांच पड़ताल करणा चांहदा; हामे तेऊरे अखे पूजणे का पहिले ही सह मारी पाऊंणअ। 16पौलुसा होर तेऊरे बहीणा रे शोहरू यह सभे शुंणु होर सेनापति पौलुसा बे किले में इच्छी करे खोजू। 17तेबा पौलुस सुबेदारा मेंज़ा का एकी बे आपु सेटा शदाई करे बोलू, एऊ मणशा सेनापति सेटा नींआ किबेकी यह तेऊ का कुछ बोलना चांहदा।
18तेऊ सह सेनापति सेटा बे नींउ होर बोलू, बंदी पौलुस माह शदाई करे बिनती करी कि यह मणश सेनापति का कुछ बोलना चांहदा। एऊ तेऊ सेटा नीआ। 19सेनापति तेऊरअ हाथ डाहकू होर अलग नी करे पुछु, तूह माह का कैह बोलना चांहदा?
20तेऊ बोलू, यहूदिये षड्यंत्र रचू दा साह कि ताहका बिनती करे कि काला पौलुसा महासभा में आंणे एड़ा की त्याह पूरी तरह तेऊरी जाँच करणा चांहदा। 21पर त्याह री नांई शूणे, किबेकी त्याह में चाहली का उझे लोका घाता में साह जासू यह कसम खाई दी दा साह कि जेबरे तणी पौलुसा मारी नांई लए तेभरे तणी त्याह नांई खांणा नांई पींणा, होर एबा त्याह त्यारे साह होर तेरे बचना रे इन्तजारा करदे लागेदे। 22तेबा सेनापति जबाना वे यह आज्ञा देई करे बीदा करू, कासु कअ नांई बोले कि तांई या गला माहा का खोजी।
पौलुसा रा फलिक्सा जेह नाहणा
23तेबा तेऊ दुई सुबेदार शदाई होर बोलू, दुई शअ सैनिक, सतर घुडसबार होर दुई शअ भालेत कैसरिया नांहणे बे राची त्यार करा। 24होर पौलुसा री घोड़े सबारी बे त्याह रे डाहा कि सह फैलिक्स राज्यपाल सेटा बचाऊ सकुशल नींणअ। 25होर तेऊ एक चिठ्ठी एढ़ी लिखी। 26महामहिम राज्यपाल फैलिक्सा बे क्लौदियुस लुसियासा री नमस्ते। 27यह मणश यहूदियों षड्यंत्र करी करे मारणअ चाहू पर जेभरे मांई जांणू यह रोमी साह, तेबा सैना भेजी करे यह छुड़ाऊ।
28हाँऊ जांणना चांहदा की त्याह एऊ पैंदे कासु बजा का दोष लाऊ, एतकि तणी मांई यह महासभा में नींऊ। 29तेबा मांई जांणू कि त्याह आपणी व्यवस्था रे बिबदा रे बारे में एऊ पैंदे दोष लाऊ, पर मारणे होर बंधन लायक एउ मेंज़ा कोई दोष नांई आंहदा। 30जेबा माह यह पता चलू कि एऊ मणश रे बिरुद्ध षड्यंत्र रचणा लाऊदा तेबा मांई तेभरी यह ताह सेटा भेजू होर दोषा लाऊण आले भी आदेश दीना कि त्याह तेरे सामने एउर बिरुद्ध दोष लाए।
31अतः जेह्डी सैनिका बे आज्ञा दीनी, तेहड़ी ही त्याहे पौलुस राचो राच अन्तिपत्रिसा बे आंणू। 32पर दूजे धयाडे घुडसबा सेनापति तेऊ संघे नांहणे री तणी छाडी करे किले बे बापस आए। 33घुडसबारा कैसरिया पूजी करे राज्यपाला बे चिठ्ठी दीनी होर पौलुस तेऊ सामने प्रस्तुत करू। 34तेऊ चिठ्ठी पढ़ी करे पुछु, यह कासु जागहा का साहा? होर जेबा तेऊ जाणू कि यह किलिकिया का साहा; 35तेबा तेऊ बोलू, जेभरे ताह पैंदे दोषा लाऊणे आले इंहणे, तेबा माह तेरी सुनबाई करणी। होर तेऊ आदेश दीना कि सह हेरोदेसा री राजभवना री सुरक्षा में डांहणअ।
Currently Selected:
प्रेरित 23: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
