प्रेरित 21

पौलुसा रा यरूशलेमा बे नांहणा

1जेबा हामे त्याह का अलग होई करे जहाज खोलू, तेबा जयाछी वाता में कोसा ना रे शहरा में आऊए होर दूजे धयाडे रुदुस में होर तखा का पतरा (टापू) में। 2होर तखे एक जहाज फीनाका बे नांहदअ भेटअ होर हामे तेता में चढ़ी करे खोलू। 3जेबा साईप्रस टापू हेरू, तेबा हामे सह उलटे हाथे छाडू, होर सीरिया बे नांही करे सूरा मे उतरी, किबेकी तखे जहाजा रा माल उतारना थी। 4होर चेले भेटी करे हामे साता धयाडी तखी रही। त्याह आत्मा रे सीखीदे पौलुसा बे बोलू कि यरूशलेमा बे नांई नांहे। 5जेबा त्या धयाडे पुरे होई, तेबा हामे तखाका नाठे होर सभिये बेटडी होर शोहरू संघे हामे नगरा बागे तणी पजेरी दिने, होर हामे किनारे में घुटने टेकी करे प्रार्थना करी। 6तेबा हामे एकी दूजे कअ बिदा लई करे जहाजा पैंदे चडी होर आपणे-आपणे घरा बे नाठे। 7जेबा हामे सूरा में होई जलयात्रा पूरी करी पतुलिमयिसा में पूजे होर भाई बे नमस्ते करी एक धयाडी त्याहे संघे रही। 8दूजे धयाडे तखा की चली करे हामे कैसरिया में पूजे होर फिलिप्पुस सुसमाचार प्रचारका रे घरे नांही करे जोह साता मेंज़ा का एक, तेऊ सेटा रुकी। 9तेऊ रे चार कुआरी शोहरी थी, जोह भविष्यद्वाणी करदा थी। 10जेबा हामे तखे रंहदा कुछ धयाडे होई, तेबा अगबुस ना रअ भविष्यद्वक्ता यहूदिया कअ आऊअ। 11हामा सेटा इच्छी करे तेऊ पौलुसा री गाची नी होर आपणे हाथ होर टांगा बान्ही करे बोलू, पवित्र आत्मा यह बोलदा कि जासू मणशा री यह गाची साहा, सह यरूशलेमा में यहूदी एहडी तरह बानणअ होर अन्यजाति बे सौंपणअ। 12जेबा हामे या गला शूणी तेबा हामे होर तख्ले लोक तेऊबै यरूशलेमा बे नांई नांहणे री बिनती करी। 13तेबा पौलुसे उतर दीना, तमे यह कह लाऊदा बोलणाा, कि लेरी-लेरी करे मेरा मन किबे लाऊदा चोडना? हांऊ तअ परमेश्वर यीशु रे ना कअ यरूशलेमा में नांहण होर मरणे री तणी त्याह रे साहा। 14जेबा तेऊ नांई मानू तेबा हामे यह बोली करे चुप रही, परमेश्वरा री इच्छा पूरी हो। 15याह धयाडी बाद हामे त्यारी करी होर यरूशलेमा बे नाठे। 16कैसरिया कअ कुछ चेले हामा संघे आऊए होर हामे साइप्रस मानसोन ना रे घरा बे नीई, मनासोन नयअ चेलअ थी होर हामे अखे तेऊरे घरे रुकणे आल थी।

पौलुसा रा याकुबे संघे मिलणा

17जेबा हामे यरूशलेमा में पूजे, तेबा भाई बडे खुशी संघे हामा कअ मिली। 18दूजे धयाडे पौलुसे हामे याकूबा सेटा बे नी करे, जखे सभे बजुर्ग पूजे दे थी। 19तेबा तेऊ त्याहबे नमस्ते करी करे, जोह काम परमेश्वरे त्याहरी सेवा रे साबे अन्यजाति बे करी दे थी, एक-एक करी करे खोजी। 20त्याहे यह शूणी करे परमेश्वर री महिमा करी, तेहुकी तेऊबै बोलू, हे भाई तूह भालदा कि यहूदी में हज़ारों लोका साहा जासू बुशाह करू। त्याह सबे मुसा री व्यवस्था बे उत्साह संघे भरी दे साहा। 21त्याह तेरे बारे में सिखाई दे साहा कि तूह अन्यजाति बीच रंहण आले यहूदी बे यह सिखाऊंदा कि मूसा री व्यवस्था री शिक्षा छाडा होर बोलदा कि पूराणी रीति रे साबे नांई चले। 22तेबा कह करणा? त्याह यह जरुरी शुंणना कि तूह आऊदअ साहा। 23तेबा जोह हामे ताहबे बोलदा सह कर। हमारे चऊ मणशे मन्नत मानी दी साहा। 24त्याह नी करे त्याह संघे आपणे आपा शुद्ध करे, होर त्याह बे खर्चा दे कि त्या री झांमत करे। तेबा सभी पता लागणा कि जोह गला त्याह तेरे बारे में खोजी दी साहा, त्याह में किच्छे सच्चाई नांई आंहदी पर आपु भी व्यवस्था रा पालन करदे होर तेतके साबे चलदा। 25जखे तणी बुशाह करन आले होर अन्यजाति रा बिचार साहा हामे त्याहबे यह निर्णय लिखी करी भेजू दा साहा कि त्याह मूर्ति सेटा बलि रा मांस का, होर लोहू, का गलअ घोंटी दे मासा तथा ब्यभिचार का बचे । 26तेबा पौलुस त्याह मणश आंणी होर दूजे धयाडे त्याह संघे आपु भी शुद्ध होई करे मंदिरा बे नाठअ। तखे तेऊ खोजू कि शुद्ध हूंणे रे धयाडे केबरे पुरे हूंणे। मतलब हामा सभी बे बलिदान का चडाऊणा।

मन्दिरा में पौलुस ढाकणअ

27जेबा सात धयाडे पुरे हूंणे आले थी, तेबा आसिया रै यहूदी पौलुसा मंदिरा में भाली करे सभे लोका उकसाई, होर एढही तरह ज़ोरे-ज़ोरे चीलाई करे सह ढाहकू। 28हे इस्राएलिओ सहायता करा; यह सह मणश साहा जोह लोका रै होर व्यवस्था रै होर एऊ मंदिरा रै बिरोधा में हर जागह सभी लोका बे सिखाऊंदा, अखे तणी कि यूनानी भी मन्दिरा में आंणी करे यह पवित्र जागह अशुद्ध करी। 29त्याह एताका पहिले इफिसुस बासी त्रुफिमुस तेऊ संघे नगरा में हेरू थी, होर समझू की पौलुस सह मंदिरा बे आंणू। 30तेबा सारे नगर भडकी होर लोका ठुरी-ठुरी करे कठे होई होर पौलुस ढाकी करे मंदिरा बागे घशिटी आंणू होर तेभरी दुआर बंद करू। 31जेबा त्याह तेऊ मारणा चांहदा थी, तेबा सेनापति री शूणाई पूजी कि सारी यरूशलेमा में गडबडी मची। 32तेबा सह तेभरी सैनिका होर सुबेदारे संघे त्याह सेटा ठुरी करे आऊअ होर त्याह सेनापति होर सैनिका हेरी करे पौलुस चिकणे का छाडू। 33तेबा सेनापति सेटा इच्छी करे सह ढाकू, होर शांगली बानने री आज्ञा देई करे पूछदअ लागअ, यह कुण साहा होर एऊ केह करू? 34पर भिड़ा में एखा जोरे -जोरे बोलदे लागे थी, होर एखा हाले पाउदे लागे थी। जेबा हाले री बजह संघे सच्चाई पता नांई चली तेबा सेनापति तेऊ किले में नीणे री आज्ञा दीनी। 35जेबा सह शीढी सेटा पूजअ तेबा एडहा होऊ कि भिडा रे दुआरा सेटा सैनिके सह चुआकि करे नीऊं। 36किबेकी लोका री भीड़ यह बोलदी, लागीदी कि, एऊ खत्म करा। 37जेबा त्याह पौलुसा किले में नींदे , लागदे, तेबा तेऊ सेनापति बे बोलू, केह माह आज्ञा सा कि हाँऊ कुछ बोले? तेऊ बोलू, केह तूह यूनानी जांणदा? 38केह तूह सह मिस्री नांई आंहदअ, जोह याह धयाडे पहिले बिद्रोही बणाई करे चार हज़ारा तलबार बंद लोका बूणा बे नी? 39पौलुसे बोलू, हाऊं तरसुस यहूदी साहा! किलिकिया रे मुखय नगरा रअ निवासी साहा। हाँउ ताहका बिनती करदा कि माह लोका संघे गलआ करने दे। 40जेबा तेऊ आज्ञा दीनी तेबा पौलुस शीढी सेटा खडे होई करे लोका बे हाथा संघे इशारा करू। जेबा त्याह चुप होई तेबा सह इब्रानी भाषा में बोलदअ लागअ।

Currently Selected:

प्रेरित 21: ISJNT

Highlight

Copy

Compare