1 कुरिन्थियों 14
14
भविष्यवाणी होर अन्य भाषा
1प्रेमा रा साथ देया, होर आत्मिक वरदान री धुना में रहा, खासकर की भविष्यवाणी करा। 2किबेकि जोह अन्य भाषा में गला करा, सह मणशा संघे नांई पर परमेश्वरे संघे गला करा, तेबा तेऊरी गला कोहे नांई समझदअ, किबेकि सह भेदा री गला आत्मा संघे होई करे बोल्ला। 3पर जोह भविष्यवाणी करे, सह मणशा का सुधार, होर उपदेशा होर शांति री गला बोला।
4जोह अन्य भाषा में गला करे, सह आपणी ही तरक्की करा, पर जोह भविष्यवाणी करा सह कलीसिया री तरक्की करा। 5हाऊं चाहन्दा की तमे सबे अन्य भाषा में गला करे, पर एताक ज्यादा चाहन्दा की जो भविष्यवाणी करा, किबेकि अगर अन्य भाषा बोलण आले कलीसिया रे सुधारा री तणी अनुवाद ना करे, तेबा भविष्यद्वक्ता तेऊका बढ़ी करे साहा।
6तेबा हे भाईयों अगर हाऊं तमा सेटा ईछी करे, अन्य भाषा में गला करे होर प्रकाश होर ज्ञान या भविष्यवाणी या उपदेशा री गला तमा सेटा नांई बोलू, तेबा तमा महा का कैह लाभ हुणा। 7एउ सावै अगर निरजीब चीज जसुका छेड हुन्दा, जेड़ा की बशुरी, या बीण अगर तेऊरी आबजा में भेद नांई हो, तेबा जोह यह फुकरे या बाजे तेबा तेऊ यह केई सावै पछैणणां? 8अगर तुहरी रे शब्द साफ नांई होलो, तेबा लड़ाई वै कुण त्यार करनअ?
9एई सावै अगर तमे आपणी जीभा री भाषा का साफ गला नांई बोलदा, तेबा जोह कुछ तमे बोला सह केई सावै समझ ईहंणा? 10संसारा में कई तरह री भाषा किवै ना हो, पर त्याह में बिना मतलबा री कोहे नांई हुणी। 11तेबा अगर हाऊं कासी भाषा री समझणे री सामर्थ्य नांई समझू, तेबा बोलण आले रे सावै हाऊं परदेशी हुणअ। 12तेबा तमे भी अगर आत्मा रे बरदानों री धूना में साहा, तेबा एडी कोशिश करे की थारे बरदाने संघे कलीसिया रा सुधार हो।
13तेबा अगर जोह अन्य भाषा बोला, सह प्रार्थना करे की तेत्का अनुवाद भी करी सका। 14तेबा अगर हाऊं अन्य भाषा में गला करू, तेबा मेरी आत्मा प्रार्थना करदा, पर मेरी बुद्धी काम नांई करदी। 15तेबा कैह करना लोडी? माँह आत्मा का भी प्रार्थना करणी, होर बुद्धी का भी प्रार्थना करणी, माँह आत्मा होर बुद्धी का गाऊंणा।
16नांई अगर तूह आत्मा का धन्यवाद करलअ तेबा अज्ञानी तेरा धन्यवादा में आमीन केहडा बोलणा, किबेकि सह नांई जांणदा की तूह कैह बोला। 17तूह तअ भली भांति धन्यवाद करां, पर तेता संघे दूजे री तरक्की नांई हूँदी। 18हाऊं आपणे परमेश्वरा रा धन्यवाद करां कि हाऊं सभी का बहु होरी भाषा में बोला। 19पर कलीसिया हामें अन्य भाषा में दस हज़ार गल्ला बोलण का माँह ठीक लागे, की दूजे सिखउणे वै पांज़ गल्ला बोलूं।
20हे भाईयो, तमे समझा में बालक नांई बणा बुराई में बालका रौहा, पर समझा में सियाणे बणा। 21व्यवस्था में लिखुदा साहा कि प्रभु बोला, हाऊं अन्य भाषा बोलण आले संघा होर पराए मुँहा संघा या लोका संघे गलां करुँ तेबा भी याह मेरी नांई शुणनी।
22तेबा अन्य भाषा बुशाही वै नांई, पर अबिश्बासी वै चिन्ह साहा, होर भविष्यवाणी अबुशाही वै नांई, पर बुशाही वै चिन्ह साहा। 23पर कलीसिया एकी जागाह कठे हो या, होर सब अन्य भाषा बोला, होर बागले होर अबिश्बासी मितरा वै इच्छै, तेबा त्याह तमा वै पागल नांई बोलणा? 24पर अगर सभी भविष्यवाणी करदे लागे, कुण अबुशाही होर बागलअ मितरा वै इच्छै, तेबा सभी सह दोषी मनणौ, होर परेखणअ; 25तेऊरे मना रा भेद प्रकट हुणा होर तेऊ पड़ी करे परमेश्वरा बे नमस्ते करणा, होर तेऊ मनणा कि परमेश्वर सच्ची हामा बीचे साहा।
प्रार्थना में अनुशासन
26तेबा हमारे भाईयो, कैह करू लोडी? जेवा तमे कठे हुंदा, तेबा हर एकी रे दिला में भजन या उपदेश या अन्य भाषा या प्रयाशा या अन्य भाषा रा मतलब खोजणा। सबे साहा आत्मिक सुधारा वै होऊ लोडी। 27अगर अन्य भाषा में गल्ला करणी हो तेबा दुई या बहु लोका हो तेबा चीण मणश बारी-बारी बोला, होर एक मणश अनुवाद करा। 28पर अगर अनुवाद करण आले नांई हो तेबा अन्य भाषा बोलण आली कलीसिया में शांत रहे, होर आपणे मना होर परमेश्वरे संघे गल्ला करे।
29भविष्यद्वक्ता मेंज़ा का दुई या चिण बोला, होर एक, मणश अनुवाद करा, होर बाकि त्याह बचना मे फर्क जाणे। 30पर अगर कुण दूजे पैंदे बैठदअ साहा, कैह परमेश्वरा रा प्रकाश होला तेबा पहिलअ चुप रहे। 31किबेकि तमे सभी बारी-बारी भविष्यवाणी करी सका, पर सभी सीखे होर शांति पाएं। 32होर भविष्यद्वक्ता री आत्मा भविष्यवक्ता रे बशा में साहा।
33किबेकि परमेश्वर गडबडी रअ परमेश्वर नांई, पर शांति रअ परमेश्वर साहा। जेहड़ा पवित्र लोका री पवित्र कलीसिया मे हामें साहा। 34बेटड़ी कलीसिया री सभा में चुप रहे किवैकी त्याह गल्ला करण री आज्ञा नांई, पर अधीन रहण री आज्ञा साहा, जेहड़ा व्यवस्था में लिखुदा भी साहा। 35अगर त्याह किछे सिखणा चाहे, तेबा घरे आपणे मर्दा का पूछे, किबेकी कलीसिया हामें बेटड़ी री गल्ला करणी वैइजती री गल्ला साहा। 36कैह परमेश्वर रअ वचन तमा का साहा? या तमा सेटा ही पूजअद साहा?
37अगर आपणे आपा वै कुण भविष्यद्वक्ता या आत्मिक जन समझे, तेबा एड़ा जाणा कि जोह गल्ला माई तमावै लिखिदी साहा, त्याह प्रभु री आज्ञा साहा। 38पर अगर कुण एता नांई मने, तेऊ भी नांई मना। 39पर हे भाईयो भविष्यवाणी करने री धुना में रौआ, होर अन्य भाषा बोलणे का नांई ना करे। 40पर सारी गल्ला शलीनता होर रामडे ढगे संघे होई लोडी।
Currently Selected:
1 कुरिन्थियों 14: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
