1 कुरिन्थियों 11
11
आराधना में मूड ढोपणअ
1तमे माँह साही चाल चला, जेहडी हाऊं मसीहा री चाला में चला। 2हे भाईयो हाऊं तमा सराहन्दा की तमे माँह सभी गला में याद डाहे, होर जोह रीति रिवाज जोह मांये तमावै दिने दे तेता याद डाहे। 3पर हाऊं चाहन्दा की, तमे यह जाणा की हर एकी भाई रअ मुंड मसीहा साहा, होर बेटड़ी रअ मुंड मर्द साहा, होर मसीहा रअ मुंड परमेश्वर साहा। 4जोह मर्द आपणे मुंड ढकी करे प्रार्थना होर भविष्यवाणी करदा आपणे मुंड रा अपमान करा।
5पर जोह बेटड़ी नंगे मुडे प्रार्थना होर भविष्यवाणी करा थी, आपणे मुंडा रा अपमान करा किबेकि सह मुणडी हुणे रे बराबर साहा। 6अगर बेटड़ी मुंडा नांई ढोपी सकदी तेबा सह आपणी जटा भी काटे, अगर बेटड़ी वै आपणी जटा काटनी शर्मा रा काम साहा, तेबा सह आपणे मुडा ढोपे।
7हां मर्दा आपण मुंड ढोपण जरूरी नांई आंध, किबेकि सह परमेश्वरा रे सबरूप होर महिमा साहा पर बेटड़ी मर्दा री शोभा साहा। 8किबेकि मर्द बेटड़ी का नांई होऊ, पर बेटड़ी मर्दा का होई। 9होर मर्द बेटड़ी वै नांई बनाऊ पर बेटड़ी मर्दा वै बणाई। 10तेबा स्वर्गदूता री बजा का बेटड़ी वै ठीक साहा की सह आपणा अधिकार मुड़ा में डाहे।
11तेबा भी परमेश्वरा में नाह तो बेटड़ी बिना मर्द, होर नाह मर्द बिना बेटड़ी साहा। 12किबेकि जेहड़ी बैटडी मर्दा का साहा तेडअ मर्द भी बेटड़ी का साहा पर सवै चीजा परमेश्वर का साहा। 13तमे आपे भी न्याय करे की कैह, नेगे मुडे बेटड़ी परमेश्वरा संघे प्रार्थना करणा शोभा दिंदा? 14कैह स्वाभाविक रुपा संघे, तमे नांई जांणदे, अगर मर्द लाम्वै बाल डाहे, तेबा सह तेत्का अपमान साहा। 15पर अगर बेटडी बे लामी जटा डाहे तेबा सह तेसकी शोभा साहा, किबेकि बाल तेसा वै ओढणी वै दिंनदे साहा। 16पर अगर कोई बिबाद करना चाहे, तेबा सह यह जाणा की ना हमारी होर नाह परमेश्वरा री कलीसिया री रीति एडी साहा।
प्रभु भोजा रे बारे में
(मत्ती 26.26-29; मरकुस 14.22-25; लूका 22.14-20)
17पर ऐसा आज्ञा दिंदा हाऊं तमा नांई सराहन्दा, तेबा थारे कठे हुणे का लाभ नांई पर हानि साहा। 18किबेकि पहिले हाऊं शुणदा कि जेबरे तमे कलीसिया में कठे हुंदा तेबा तमामें फुट हुंदा, होर हाऊं एता पेन्दे कुछ बुशाह भी करदा। 19किबेकी दल बंदी भी तमामें जरूरी हुणी, तेबा तमामें जोह लोका खरे साहा त्याह प्रकट हुणे। 20पर तमे जोह एकी जागहा कठे हुंदा, यह प्रभु भोज खांणे वै नांई। 21किबेकि खाणे रा वक्त एकी दूजे का पहिले आपणा धाम खांदा एउ सावै कुण रजा कुण भोछ रहदा। 22कैह खांणे वै थारे घरे नांई, या परमेश्वरा री कलीसिया तमा तुच्छ जाणा, होर जासु जेह नांई आंधी त्याह री वैइजती करा? हाऊं तमा का कैह बोलू कैह एसा गल्ला में थारी प्रशंसा करू, नांई हाऊं थारी प्रशंसा नांई करा।
23किबेकि यह गला माँह प्रभु का भेटी होर मांई तमावै भी खोजी, कि जासु राची प्रभु यीशु ढाकु थी, तेबा तेऊए रोटी चुआकी, 24होर धन्यवादा री प्रार्थान करी करे सह चोडी, होर बोलू, यह मेरी देह साहा, जोह तमावै साहा मेरी यादा में यह करा। 25एउ सावै तेऊ रोटी बाद जुसा रअ कटोरे ढाकु होर बोलू, यह कटोरअ मेरा लोहू री नई वाचा साहा; जेवा तमे एता झुट्ले, तेबा मेरी यादी वै एहड़ा करे। 26किबेकि जेबरे तमे रोटी खाले होर एऊ कटोरे का झुट्ले परमेश्वरा तेबा परमेश्वरा री मृत्यु, जेबरे तणी सह नांई इच्छे, सुसमाचारा खोजदे रहा।
27एतकि तणी जोह कोई अनुचित रीति संघा परमेश्वरा री रोटी खाए, याह तेऊरे कटोरे का झूठे, सह परमेश्वरा री देह होर लोहू रअ अपराधी रहणअं। 28एतकि तणी मणश आपणे आपा परेखे होर एसी रीति संघा एसा रोटी मेंज़ा का खाए, होर एऊ कटोरे मेंज़ा का झूठे। 29किबेकि जोह खांदे-पिंदे वक्तते परमेश्वरा रे शरीर मे दोष नांई पछेणू, सह खांदे होर पिंदे आपु वै दण्ड आणे। 30एऊ सावै तमामें बहू कमज़ोर होर रोगी साहा, होर एखा सुते। 31अगर हामे आपणे आपा वै फर्क नांई डाहले तेबा दोषी नांई हुणे। 32पर परमेश्वर हामा वै दण्ड देई करे हामे डांटी, की हामे संसारा रे दोषी नांई होए।
33तेबा, हमारे भाईयो, जेवा तमे खाणे वै कठे हुंदा तेबा एकी दुजे भी निहाले। 34अगर कुण भोच्छ साहा तेऊ आपणे घरा वै आणे, जासु का थारे कठे हुणे लोका रे दण्डा री बजा नांई होए। होर वाकी गल्ला माँह इच्छी करे ठीक करणी।
Currently Selected:
1 कुरिन्थियों 11: ISJNT
Highlight
Copy
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
