2 કુરિંથીઓ પત્રો 1

નમસ્કાર

1પરમેહેરુ ઈચ્છા અનુસાર ઇસુ ખ્રિસ્તુ ચેલો વેરા ખાતુરે પસંદ કેલો આંય પાઉલ આને આપુ વિશ્વાસી પાવુ તિમોથી, ઓ પત્ર કુરિંથી શેહેરુ મંડળી બાદા વિશ્વાસી લોકુ માટે આને આખા અખાયા વિસ્તારુ પરમેહેરુ લોકુ માટે લેખુહુ. 2આપુ બાહકા પરમેહેર આને પ્રભુ ઇસુ ખ્રિસ્તુ વેલેને તુમનેહે કૃપા આને શાંતિ મિલતી રેઅ.

પરમેહેરુ ધન્યવાદ કેરુલો

3આપુ પ્રભુ ઇસુ ખ્રિસ્તુ આને પરમેહેરુ સ્તૃતિ વેઅ, જો દયાલો બાહકો દરેક પ્રકારુ દિલાસો આપનારો પરમેહેર હાય. 4આપુ બાદા પ્રકારુ દુખુમે પરમેહેર આપનેહે દિલાસો આપેહે, કા આપુહુ બીજાહાને દિલાસો આપજી. જીયુ રીતીકી પરમેહેર આપનેહે દિલાસો આપેહે, તીયુજ રીતીકી આપુહુ જે દુખુમે હાય તીયાહાને દિલાસો આપી સેક્જી. 5કાહાકા જીયુ રીતીકી આપુહુ ખ્રિસ્તુ દુખુમે ભાગીદાર હાય, તેહેકીજ આપનેહે ખ્રિસ્તુ મારફતે ખુબુજ દિલાસો મીલેહે. 6કાદાચ આપુહુ દુઃખ સહન કેતાહા, તા તોઅ તુમા દિલાસા આને ઉદ્ધારુ માટે હાય, આને કાદાચ આપનેહે દિલાસો મીલેહે, તા ઈયા ખાતુરે કા આમુહુ તુમનેહે દિલાસો આપજી, કા તુમુહુ બી તીયાજ દુખુલે ધીરજ રાખીને સહન કી સેકા જો આપુહુ વેઠી રીયાહા. 7તુમા વિશે આમુહુ મજબુત આશા રાખતાહા. કાહાકા આમુહુ જાંતાહા જીયુ રીતીકી તુમુહુ આમા દુખુમે ભાગીદાર હાય, તીયુજ રીતીકી આમનેહે જો દિલાસો મીલેહે, તીયામે તુમુહુ બી ભાગીદાર વેરાહા.

8ઓ માઅ વિશ્વાસી પાવુહુ આને બોયુહુ, આમુહુ એ ઈચ્છા રાખતાહા કા આસિયા વિસ્તારુમે જે તકલીફ આમનેહે વેઠા પોળી તીયા વિશે તુમુહુ જાંણા, કાહાકા આમનેહે ઓતો વોજો લાગ્યો કા આમુહુ તીયાલે વેઠી નાય સેક્યા, ઇહી લોગુ કા આમુહુ જીવા શક્તિ નાહ રીયી. 9આમુહુ તા ઇ વિચારી લેદલો, કા બાસ આમી આમુહુ મોયજ જાનારા હાય, ઇ ઈયા ખાતુરે વીયો કા આમુહુ પોતાપે ભોરોષો નાય રાખી સેક્જી, પેન જો મોલામેને ફાચો જીવતો કેહે, તીયા પરમેહેરુપે વિશ્વાસ કેજી. 10તીયાહાજ આમનેહે મોતુ જોખમુમેને વાચાવ્યા આને વાચાવી, આને આમનેહે તીયાપે પુરી આશા હાય કા તોઅ આગલા બી વાચાવી. 11જીયુ રીતીકી તુમુહુ પ્રાર્થના મારફતે આમા મદદ કેતાહા, કા જે વરદાન ખુબુજ લોકુ મારફતે મીલ્યેહે, તીયુ લીદે ખુબુજ લોક આમા વેલેને પરમેહેરુ ધન્યવાદ કેજા.

પાઉલુ મારફતે સેવા મુસાફરી યોજ્ના બોદલેહે

12કાહાકા આમુહુ આમા વિવેકુ ઈયુ સાક્ષીપે ઘમંડ કેતાહા, કા દુનિયા લોકુમે આને ખાશકીને તુમા વોચ્ચે આમા ગોગુલો-ચાલુલો પરમેહેરુ વેલેને પવિત્ર આને હાચાયુ અનુસાર આથો, જો લોકુ જ્ઞાનુ અનુસાર નાહ, પેન પરમેહેરુ કૃપા આરી આથો. 13આમુહુ સાદા એહેડી ગોઠ લેખતાહા કા તુમુહુ વાચી આને હોમજી સેકા, જેહેકી કા આમી તુમુહુ આમનેહે ખાલી થોડા-ઘોણા હોમજુતાહા, પેન માને આશા હાય કા તુમુહુ આમનેહે પુરી રીતીકી હોમજી સેકાહા. 14કા જીયુ રીતીકી આમુહુ તુમા લીદે ઘમંડ કીહુ, તીયુજ રીતીકી તુમુહુ બી પ્રભુ ઇસુ ફાચે આવુલો સમયુપે ઘમંડ કેરાહા.

15માને ઈયુ બાદી ગોઠીપે ભોરોષો આથો, ઈયા ખાતુરે માયુહુ પેલ્લાજ તુમનેહે મીલા આયોજન કેલો, કા આંય તુમા પાહી બીજી વાર આવુ આને તુમનેહે બમણો આશીર્વાદ આપી સેકુ. 16ઈયા કારણુકી માઅ યોજના એ આથી કા આંય તુમા પાહી રાખીને મકોદેનિયા વિસ્તારુને જાંઉ, આને મકોદેનિયા વિસ્તારુમેને વોલીને ફાચે તુમા પાહી આવુ. આને યહુદીયા વિસ્તારુમે જો ખર્ચો વેરી, તીયા માટે તુમુહુ માઅ મદદ કેરા. 17જાંહા માયુહુ ઇ નક્કી કેયો તા આંય ઈયા વિશે ખુબુજ ગંભીર આથો. આંય જો કેરા ઇચ્છુહુ તીયાલે સંસારિક લોકુ હોમુજુ અનુસાર ફેસલો નાહ કેતો, કા દરેક ગોઠીમે હા-હા આને નાહ-નાહ કિવ્યુ. 18પરમેહેર હાચો સાક્ષી હાય કા જો વચન આમુહુ તુમનેહે આખલો, તીયામે હા આને નાય બેન ગોઠયા નાહ. 19પરમેહેરુ પોયરો ઇસુ ખ્રિસ્ત જીયા પ્રચાર માયુહુ આને સિલાસ આને તિમોથીહી તુમા વોચ્ચે કેયોહો, તીયામે હા આને નાય બેન ગોઠયા પેન ખાલી હોવ હાય. 20કાહાકા પરમેહેરુહુ જે બી વાયદા કેલા તે બાદા ઇસુ ખ્રિસ્તુમે હાંજ હાય, ઈયા ખાતુરે આમુહુ પરમેહેરુ મહિમા માટે ખ્રિસ્ત ઇસુ આમીન એટલે હાં આખતાહા. 21આને જો આમનેહે તુમા આરી ખ્રિસ્તુમે મજબુત કેહે, આને જીયાહા આમા અભિષેક કેયોહો તોજ પરમેહેર હાય. 22જીયાહા આમાપે મહોર બી લાગવી દેદીહી, આને સોદા રુપુમે પોતા પવિત્રઆત્માલે આમા હદયુમે આપીહી.

23આંય કુરિંથી શેહેરુમે ઈયા ખાતુરે ફાચો નાહ આલો, કા તુમનેહે તકલીફ પોળે, માઅ ઈયુ હાચાયુ પરમેહેર સાક્ષી હાય. 24આમુહુ એ નાહ ઈચ્છા રાખતા કા તુમા વિશ્વાસુપે આમુહુ અધિકાર ચાલવુજી. પેન આમુહુ તુમા સુખ-શાંતિમે મદદ કેનારા હાય, કાહાકા તુમુહુ તા એહેકી બી વિશ્વાસુમે મજબુત હાય.

Currently Selected:

2 કુરિંથીઓ પત્રો 1: DUBNT

Highlight

Copy

Compare