1 કુરિંથીઓ પત્રો 16

યરુશાલેમુમે મંડળી માટે દાન

1આમી યરુશાલેમુ મંડળી માટે દાન એકઠો કેરામે આવેહે, તીયા તુમા સવાલુ જવાબ આંય તુમનેહે આપુહુ. ગલાતિયા વિસ્તારુ મંડળી લોકુહુ જીયુ રીતીકી કેરા આખલો તેહકીજ તુમુહુ બી કેરા. 2તુમુહુ આઠવાળ્યા પેલ્લા દિહુલે, પોતા કમાયુમેને વી સેકે તોતી બચત કીને અલગ થોવી રાખા. કા જાંહા આંય આવુ તાંહા તુમનેહે દાન એકઠો કેરા જરુર નાય પોળે. 3જાંહા આંય તુમા પાહી આવુ, તા જીયાલે તુમુહુ મોકલા માગતાહા, તીયા મારફતે તુમા દાનુમે પત્ર લેખીને યરુશાલેમુ મંડળીલે મોકલી દેહે. 4કાદાચ યરુશાલેમ શેહેરુ મંડળીમે માને જાવુલો વેરી તા તેબી માઅ આરી આવી.

યાત્રા કેરુલો યોજના

5આંય મકોદેનિયા વિસ્તારુમે જાહે, ફાચે તીહીને વોલીને તુમા પાહી આવેહે, કાહાકા માને તીહી જાવુલો જરુરી હાય. 6પેન ખેરોજ તુમાહી આવેહે, આને વી સેકેહે આંય આખો હિયાલો સીજન તુમાહીજ રેહે, તીયા બાદ માને જીહી જાવુલો વેરી તીહી જાંઅ મદદ કેજા. 7કાહાકા આમી ચાલતા-ચાલતા આંય તુમનેહે મીલા નાહ માગતો, પેન માઅ આશા હાય કા કાદાચ પ્રભુ ઈચ્છા વેતા આંય તુમા આરી થોડોક સમય રેહે. 8પેન આમી તા પચાસમા દિહુ તેહવાર લોગુ એફેસ્સ શેહેરુમે રેહે. 9કાહાકા તીહી માને પ્રભુ સેવા કેરા એક ખાશ મોકો મીલ્યોહો, પેન પરમેહેરુ વચનુ વિરુધ કેનારે બી ખુબ હાય.

10કાદાચ તિમોથી તુમાહી આવે, તા તુમુહુ પોતા પાવુ હોચે તીયા સ્વાગત કેજા, કાહાકા તોઅ માઅ હોચે પ્રભુ સેવા કેહે. 11ઈયા ખાતુરે કેડો બી તીયા અનાદર નાય કે, પેન તીયા મદદ કેજા કા તીયા યાત્રામે કાયજ તકલીફ નાય પોળે આને શાંતિકી માઅ પાહી આવી જાય. કાહાકા તોઅ વિશ્વાસી પાવુ આરી આવી, એહેકી કીને આંય તીયાં વાટ જોવુહુ. 12આપુ વિશ્વાસી પાવુહુ અપુલ્લોસુલે માયુહુ ખુબુજ વિનંતી કેયીહી, કા તે બીજા વિશ્વાસી પાવુ આરી, તુમા મુલાકાત કેરા આવે, પેન આમી તીયાહા જાવુલો ઈચ્છા નાહ કેયી. પેન જાંહા તીયાલે મોકો મીલી તા તુમા પાહી આવી.

છેલ્લો આદેશ આને નમસ્કાર

13સાવધાન રેજા, આને વિશ્વાસુમે સ્થિર રેજા, હિંમત રાખા આને વિશ્વાસુમે મજબુત બોના. 14તુમુહુ જો કાય કેતાહા તોઅ પ્રેમુકી કેરા.

15ઓ મેરાલાહા, તુમુહુ સ્તેફ્નુસ આને તીયા પરિવારુલે જાંતાહા, કા તે અખાયા વિસ્તારુમે પેલ્લા વિશ્વાસી લોક હાય. આને તે સાદા પરમેહેરુ લોકુ મદદ કેરા માટે તીયાર રેતેહે. 16ઈયા ખાતુરે આંય તુમનેહે વિનંતી કીહુ, કા તુમુહુ એહેડા દરેક આગેવાનુ આખુલો માના જો પરમેહેરુ સેવામે મદદ કેરા માટે ખુબુજ મેહનત કેતેહે. 17સ્તેફ્નસ આને અખિકુસ માહી આવા લીદે ખુબ ખુશ હાય, કાહાકા તુમા જાગાપે તે મદદત કેતાહા. 18તીયાહા માનુજ નાહ પેન તુમનેહે બી ખુશ કેયાહા, ઈયા ખાતુરે એહેડા લોકુ તુમુહુ સન્માન કેરા.

19આસિયા વિસ્તારુ મંડળી લોક તુમનેહે નમસ્કાર આખતાહા. અકિલા આને તીયા કોઅવાલી પ્રિસ્કીલા આને તીયાં કોમે ચાલનારી મંડળી બાદા લોક તુમનેહે પ્રભુમે ખુબુજ નમસ્કાર આખતાહા. 20ઇહીને મંડળી બાદા વિશ્વાસી લોક તુમનેહે નમસ્કાર આખતાહા. તુમુહુ એકબીજાલે ગલે મીલીને નમસ્કાર આખજા. 21આંય પાઉલ, માઅ આથુકી તુમનેહે નમસ્કાર લેખુહુ. કાદાચ એગોહો પ્રભુ આરી પ્રેમ નાય રાખે તા શાપિત વેઅ. 22ઓ આમા પ્રભુ, આવ. 23આપુ પ્રભુ ઇસુ ખ્રિસ્તુ કૃપા તુમાપે બોની રેઅ. 24જો ઇસુપે વિશ્વાસ કેહે, તીયાં બાદાહાને આંય ખુબુજ પ્રેમ કીહુ.

Currently Selected:

1 કુરિંથીઓ પત્રો 16: DUBNT

Highlight

Copy

Compare