1 થેસ્સલોનિકીઓ પત્રો 4

પરમેહેરુલે ખુશ કેનારો જીવન જીવા

1ઓ વિશ્વાસી પાવુહુ, તુમા પોતા જીવન જીવુલુકી પરમેહેરુલે કેહેકી ખુશ કેરુલો તોઅ તુમુહુ આમા પેને હિક્યાહા, આને તેહેકીજ તુમુહુ બી જાંતાહા. ઈયા ખાતુરે આમુહુ પ્રભુ ઇસુ ખ્રિસ્તુ નાવુકી તુમનેહે વિનંતી કેતાહા, આને હોમજાવતાહા બી, કા તુમુહુ તીયામે વાદતા જાઅ. 2કાહાકા તુમુહુ જાંતાહા, કા જે શિક્ષા આમુહુ તુમનેહે દેદીહી તે તીયા અધિકારુકી હાય જે પ્રભુ ઇસુ ખ્રિસ્તુહુ આમનેહે દેદીહી. 3પરમેહેરુ ઈચ્છા એ હાય, કા તુમુહુ પવિત્ર બોના એટલે વ્યેભિચાર નાય કેરુલો. 4આને તુમામેને દરેક માંહુ પવિત્રતાકી આને સન્માનુકી પોતા કોઅવાલી આરી વેહવાર કેરા જાંય લેઅ. 5આને તીયા લોકુ સામાન નાય કેરુલો જે પરમેહેરુલે નાહ જાંતા. કાહાકા તે ભોગવિલાસ હોમજીને ઇ કામે કેતાહા. 6આને ઈયુ ગોઠીપે પાપ કીને કેડો બી એગા પાવુલે ધોકો નાય દેઅ, ઇ આમુહુ તુમનેહે પેલ્લાનેજ આખલો આને ચેતવણી બી આપલી, કાહાકા પ્રભુ ઈયુ ગોઠી દંડ આપી. 7કાહાકા પરમેહેરુહુ આમનેહે અશુદ્ધ જીવન જીવા ખાતુરે નાહ, પેન પવિત્ર જીવન જીવા ખાતુરે હાધ્યાહા. 8ઈયા ખાતુરે જે નિયમુલે નાહ જાંતા તોઅ કેલ્લા બી માંહા નાહ પેન પરમેહેરુ નિયમુલે નાહ માનતો, જો પોતા પવિત્રઆત્મા તુમનેહે આપેહે.

9એકબીજા આરી પ્રેમ રાખુલો તુમુહુ પોતે પરમેહેરુપેને હિક્યાહા, ઈયા ખાતુરે તુમુહુ વિશ્વાસી પાવુ-બોયુ આરી પ્રેમ રાખુલો વિશે હિકુલો જરુરત નાહ. 10આને મકોદેનિયા વિસ્તારુ વિશ્વાસી પાવુ-બોયુ આરી એહેડો પ્રેમ રાખતાહા બી. પેન ઓ મેરાલાહા, આમુહુ તુમનેહે વિનંતી કેતાહા કા આજી બી વાદારે એકબીજા આરી પ્રેમુમે રેજા. 11આને જેહેકી આમુહુ તુમનેહે હોમજાવલો તેહેકીજ શાંતિકી રેજા, આને પોત-પોતા કામ કેતા રેવુલો, આને પોતે કામાવીને પોતા પાલન પોષણ કેરુલો. 12કા અવિશ્વાસી લોક તુમા વેહવાર હીને તુમા આદર કે, આને તુમનેહે પોતા જરુરત પુરી કેરા ખાતુરે કેડાપે બી નિર્ભર નાય રાંઅ પોળે.

ઇસુ ફાચે આવુલો

13ઓ માઅ વિશ્વાસી પાવુહુ, આમુહુ ઈચ્છા રાખતાહા જે મોય ગીયાહા તીયાં વિશે તુમુહુ જાંણા, એહેકી નાય વેઅ કા તુમુહુ એકબીજા લોકુ હોચે દુઃખી વેરા, જીયાહાને એ આશા નાહ કા મોરુલો બાદ ફાચા જીવતા વી જાંય. 14કાહાકા કાદાચ આપુહુ વિશ્વાસ કેતાહા, કા ઇસુ મોય ગીયો આને ફાચે જીવતો વી ગીયો, તેહેકીજ જે ઇસુ ખ્રિસ્તુમે વિશ્વાસ કીને મોય ગીયાહા, તીયાહાને પરમેહેર ઇસુ ખ્રિસ્તુ મારફતે ફાચો લાવી. 15આપુહુ પ્રભુ ઇસુ ખ્રિસ્તુ વચનુ અનુસાર તુમનેહે ઇ આખતાહા, જે લોક વિશ્વાસુમે મોય ગીયાહા, તે પ્રભુ ઇસુ ખ્રિસ્તુ આરી મુલાકાત કેરી, તીયાં બાદ આપુહુ જે જીવતા હાય આને પ્રભુ ઇસુ ખ્રિસ્તુ આવુલો લોગુ જીવતા રીઅ, તે પ્રભુ આરી મુલાકાત કેરી. 16કાહાકા પ્રભુ ઇસુ પોતે હોરગામેને આવી, તાંહા આદેશ આપવામે આવી, આને મોડા દુતુ આવાજ ઉનાહુ આને પરમેહેરુ તુરી આવાજ ઉનાહુ, તાંહા જે ખ્રિસ્તુમે વિશ્વાસ કીને મોય ગીયાહા, તે પેલ્લા જીવતા વી જાંય. 17તીયા બાદ જે આપુહુ જીવતા હાય આને વાચાય રીહુ, તીયાં આરી જુગુમે પ્રભુલે મીલા ખાતુરે વાદલામે ઉઠાવી લેવામે આવુહુ, આને તીયા સમયુલેને આપુહુ સાદા પ્રભુ ઇસુ ખ્રિસ્તુ આરી રીહુ. 18ઈયા ખાતુરે ઈયુ ગોઠીકી એકબીજા આરી સાંત્વના આપ્યા કેરા.

Currently Selected:

1 થેસ્સલોનિકીઓ પત્રો 4: DUBNT

Highlight

Copy

Compare