1 પિત્તરુ પત્રો 4

બોદલાલો જીવન

1જાંહા ખ્રિસ્તુહુ શરીરુમે રીને દુઃખ વેઠયો, ઈયા ખાતુરે કા તુમુહુ તીયુજ રીતીકી મન રાખીને તીયા આરી દુઃખ વેઠા માટે તીયાર રાંઅ જોજે જો તીયામે આથો, કાહાકા તુમુહુ વિશ્વાસી માટે દુઃખ વેઠા માટે તીયાર હાય, તા તુમુહુ પાપ કેરા છોડી દેદોહો. 2કા તોરતીપે વાચાલો જીવન શારીરિક લાલસા અનુસાર નાય, પેન પરમેહેરુ ઈચ્છા અનુસાર જીવન જીવા. 3કાહાકા અન્યજાતિ લોક મોજ-મસ્તીમે જીવન જીવતાહા, એહેડે કામે કેરુલોકી તુમુહુ પેલ્લાથીજ ખુબુજ સમય વિતાવી ચુક્યાહા, તીયા સમયુમે તુમુહુ વ્યભિચાર કેરુલોમે, ખોટી શારીરિક લાલચ કેરુલોમે, મોજ-મસ્તી કેરુલોમે, હોરો પીનારા પાર્ટીમે આને મુર્તિ પુજા કેરુલોમે સમય કાડયોહો જીયાકી પરમેહેર નફરત કેહે. 4ઈયા કારણુકી જાંહા તુમુહુ તુમા જુના આર્યા આરી ખોટે કામે કેરા નાહ જાતા, તા તે નોવાય પામતાહા આને તે તુમા બદનામી કેતાહા. 5પેન પોતા કામુ લેખ તે પરમેહેરુલે આપી, જે જીવતા હાય તીયાં આને મોલા લોકુ ન્યાય કેરા તીયાર હાય. 6ઇંજ કારણ હાય કા જે મોય ગીયાહા તીયાહાને બી હારી સુવાર્તા ઉનાવી આલી, શારીરિક રીતીકી તા તીયાં ન્યાય વીયો આને તે મોય ગીયા, પેન આમી તે આત્મામે પરમેહેરુ આરી જીવતા હાય.

પરમેહેરુ મહિમા માટે સેવા

7બાદી ગોઠી અંત તુરુતુજ વેનારો હાય, ઈયા ખાતુરે પોતાલે કબજામે રાખીને સાવધાન રાખા આને પ્રાર્થના કેરા. 8બાદા કેતા વાદારે ખાશ ગોઠ એ હાય કા એકબીજા આરી વાદારે પ્રેમ રાખા, કાહાકા કાદાચ તુમુહુ એકબીજા આરી વાદારે પ્રેમ રાખાહા, તા તીયાહા કાય બી ગુનોહ કેયો વેરી તીયાલે તુમુહુ માફ કેરા માટે તુમુહુ એકબીજા આરી વાદારે પ્રેમ રાખા, તા તીયાહા કાય બી ગુનાહ કેયા તીયાલે તુમુહુ માફ કેરા માટે તીયાર રીહા. 9એકબીજા આરી પ્રેમ આને ઇ કામ વગર આચકાયા કેરા. 10પરમેહેરુ વેલેને જીયાલે જો વરદાન મીલ્યોહો, તોઅ તીયા વરદાનુલે હારા સેવકુ રુપુમે એકબીજા સેવા કેરા માટે કામુમે લ્યા. 11જીયુ રીતીકી કાદાચ એગાલે અન્ય બીજા લોકુ મદદ કેરા વરદાન મીલે, તા તોઅ પરમેહેરુ આપલી સામર્થુ સેવા કે, કા તુમુહુ જો કાય બી કેરા તીયામે ઇસુ ખ્રિસ્તુ મારફતે પરમેહેરુલે મહિમા મિલે. બાદી મહિમા આને સામર્થ યુગા-યુગ તીયા હાય. આમીન.

પરમેહેરુ મહિમા માટે દુઃખ વેઠુલો

12ઓ મેરાલાહા, તુમુહુ ઇસુ ખ્રિસ્તુ ચેલા વેરુલો લીદે દુઃખ તુમા જીવનુમે આવતેહે તીયા વિશે આંય ચકિત નાય વિવ્યુ, પેન ઇ ખરેખર આંય તુમુહુ પરમેહેરુપે વિશ્વાસ કેતાહા કા નાહ ઇ પારખા માટે નાહ આવતા. ઈયા ખાતુરે એહેકી વિચારા કા તુમા જીવનુમે કાંવીહી અલગ ઘટના બોની રીયીહી. 13પેન ઈયા બદલે, તુમુહુ તીયા વિશે ખુશ રેજા, કાહાકા તુમુહુ તીયા દુ:ખુમે એક ભાગ મીલ્યોહો જો ખ્રિસ્તુલે મીલ્લો. ઈયા કારણુકી જાંહા ઇસુ ખ્રિસ્ત બાદા લોકુહુને પોતા મહિમા પ્રગટ કેરા આવી તા તુમા આનંદ ખરેખર મોડો આનંદ વેરી. 14ફાચે કાદાચ ઇસુ ખ્રિસ્તુ લીદે તુમા નિંદા કેરામે આવેહે, તા તુમુહુ ધન્ય હાય, કાહાકા પરમેહેરુ મહિમામય આત્મા તુમામે રેહે. 15તુમામેને કેડો બી માંહુ હત્યા, ચોરી, ખારાબ કામે, કા ફાચે બીજાં કામુમે આથ ટાકુલોકી દુઃખ નાય વેઠે, 16પેન કાદાચ એગા ઇસુ ખ્રિસ્તુ વિશ્વાસી વેરા લીદે દુઃખ મીલેહે, તા તીયાલે નાજવાયા નાય જોજે, પેન પરમેહેરુ મહિમા કેરા જોજે, કાહાકા તુમુહુ ખ્રિસ્તુ હાય. 17કાહાકા ન્યાય કેરુલો સમય આવી ગીયોહો, કા પેલ્લા પરમેહેરુ લોકુ ન્યાય કેરામે આવી, આને જાંહા તોઅ બાદા પેલ્લા આપુ ન્યાય કેરી, તા જો પરમેહેરુહુ હારી સુવાર્તાપે વિશ્વાસ નાહ કેતે તીયાં વિશે તુમુહુ વિચારા કા તીયાં કાય હાલત વેરી? 18જેહેકી પવિત્રશાસ્ત્રમે લેખલો હાય, “કાદાચ એક ધર્મી માંહા ઉદ્ધાર પામુલો કઠીન હાય, તા ફાચે વિધર્મી આને પાપી લોકુ કાય વેરી?”

19ઈયા ખાતુરે જો પરમેહેરુ ઈચ્છા અનુસાર દુઃખ વેઠતાહા, તીયાહાને એકબીજા ભલાયુ કેતા જાયને વિશ્વાસ યોગ્યો આને જગત બોનાવનારા પરમેહેરુ આથુમે પોતા જીવન હોપી દેઅ.

Currently Selected:

1 પિત્તરુ પત્રો 4: DUBNT

Highlight

Copy

Compare