1 પિત્તરુ પત્રો 3

કોઅવાલો આને કોઅવાલી

1હે કોઅવાલીહી, તુમુહુ બી પોત-પોતા કોઅવાલા આધિનુમે રેજા, કા કાદાચ ઇયામેને કેલ્લો બી કોઅવાલો જો પરમેહેરુ વચનુપે વિશ્વાસ નાય કેતો વેરી, 2તેબી, તે તુમા કાંવીહી આખ્યા વગર પોત-પોતા કોઅવાલી સ્વભાવું મારફતે વિશ્વાસ કી સેકેહે, કાહાકા તે તુમા પવિત્ર આને હારા સ્વભાવુલે હેતા રેતાહા. 3આને બોયુહુ, તુમા શણગાર બીજાહાને દેખાવા ખાતુરે માઅ કેરાહા, જીયુ રીતીકી અલગ રીતીકી ચોંટયે બોનાવુલો, આને હોનો-ચાંદી સામાન પોવુલો, કા ફાચે મોગે-મોગે પોતળે પોવુલો. 4પેન તુમા રુપ ઈયા બાદાપે આધાર રાખા જોજે, કા તુમુહુ ખરેખર કેડો હાય, ઓ એક નમ્ર આને શાંત વેહવાર હાય, જો નાહ પારવાતો, પરમેહેરુ માટે ખુબુજ કિંમતી હાય. 5પેલ્લા જમાનામે રેનાર્યા પવિત્ર બાયા આથ્યા, જે પરમેહેરુ આશા રાખતલ્યા, આને તે પોત-પોતા કોઅવાલા આધિનુમે રેતલ્યા, ઈયુ રીતીકી તે પોતા શણગાર કેતલ્યા. 6જેહેકી સારા પોતા કોઅવાલા ઇબ્રાહીમુ આધિનુમે આથી આને તીયાલે માલિકમ આખતલી. જાંહા તુમુહુ બી ભલાયુ કામે કીહો, આને કેલ્લા બી પ્રકારુ બીખ નાય રાખા, તા તુમુહુ બી તીયુ પોયરી હોચે વેરાહા.

7તેહેકીજ કોઅવાલાહા, તુમુહુ બી પોતા કોઅવાલીલે કમજોર હોમજીને હોમુજદારીકી રેજા, આને તીયા આદર કેરા. ઇ હોમજીને કા આપુહુ બેન માંહે અનંત જીવનુ વરદાનુ ભાગીદાર હાય, જીયાકી તુમા પ્રાર્થના પરમેહેર ઉનાય.

ભલાય કેરુલો લીદે સતાવ

8છેલ્લે આંય તુમનેહે ઇંજ આખા માગુહુ, કા તુમુહુ એકમત વીને એકબીજા ચિંતા કેરા, એકબીજા આરી પાવુ-બોયુ હોચે પ્રેમ રાખા એકબીજાપે દયા કેરા, આને એકબીજા આરી નમ્રતાકી રેજા. 9ખોટાયુ બદલે ખોટાય માઅ કેરાહા, આને માઅ ગાય દીહા, પેન એકબીજાહાને આશીર્વાદુજ આપા, કાહાકા પરમેહેરુહુ તુમનેહે બીજાહાને આશીર્વાદ આપા ખાતુરે હાધ્યાહા, કાદાચ તુમુહુ તેહેકી કેરાહા તા પરમેહેર તુમનેહે આશીર્વાદ આપી. 10કાહાકા પવિત્રશાસ્ત્રમે લેખલો હાય, કાદાચ એગો માંહુ પોતા જીવનુ આનંદ લાંઅ માગેહે, આને હારા દિહ હેરા માંગેહે, તા તોઅ ખોટયા ગોઠયા નાય કે, આને નાય ઝુટો ગોગે. 11તોઅ ખોટાય કેરા છોડી દેઅ, આને ભલાયુજ કે, તોઅ બીજા આરી મિલ-મિલાપુકી રાંઅ કોશિશ કે. 12કાહાકા “પ્રભુ નજર ધર્મી લોકુપે રેહે, આને તીયા કાન તીયાં પ્રાર્થના ઉનાતાહા, પેન પ્રભુ ખોટાય કેનારા વિરુધ રેહે.”

13કાદાચ તુમુહુ સાદા ભલાય કેતાહા, તા ખરેખર કેડો બી તુમા આરી ખોટાય નાહ કી સેકતો. 14આને કાદાચ તુમુહુ ખેરો કામુ લીદે દુઃખ બી વેઠતાહા, તા તુમુહુ ધન્ય હાય, એહેકીજ કેરા જેહેકી યાશાયા ભવિષ્યવક્તાહા લેખ્યોહો, “જો તુમનેહે બીયાવતાહા તીયા લોકુકી માઅ બીયાહા, આને ઈયુ ગોઠી ચિંતા માઅ કેરાહા કા લોક તુમા કાય કી સેક્તાહા.” 15પેન તુમા મનુમે ઇસુ ખ્રિસ્તુ પોતા જાંયને આદર કેરા આને તુમાપે જે આશા હાય તીયા વિશે આંય તુમનેહે કેડો ફુચે તીયાલે સાદા નમ્રતાકી આને આદરુકી જવાબ આપા ખાતુરે તીયાર રેજા. 16આને તુમા મન બી સાફ રાખા, ઈયા ખાતુરે કા જીયા વિશે તુમા બદનામી વેહે, તીયા વિશે આંય જો ઇસુ ખ્રિસ્તુમે હારો વેહવારુ અપમાન કેતાહા તે નાજવાય જાય. 17કાહાકા કાદાચ આપુહુ પોતા હારા કામ કરુલો લીદે દુઃખ વેઠતાહા તા ઇ હારો હાય, કાદાચ આપુ માટે પરમેહેરુ એજ ઈચ્છા હાય, ઇ આપુ ખોટા કામુ લીદે દુઃખ વેઠુલો કેતા ઉત્તમ હાય.

18ઇ આંય ઈયા ખાતુરે આખુહુ, કાહાકા ખ્રિસ્તુહુ બી, એક વાર આપુ પાપુ લીદે દુઃખ વેઠયો આને તોઅ ધર્મી આથો તેબી આપુ પાપી માટે મોય ગીયો, કા આપનેહે પરમેહેરુ પાહી લી જાય સેકે. શારીરિક રીતીકી લોકુહુ તા તીયાલે માય ટાક્યો, પેન પવિત્રઆત્મા સામર્થુકી ફાચો જીવતો કી દેદોહો. 19તાંહા તીયા આત્માહા અધોલોકુમે જીહી મોલા લોકુ આત્મા રેહે, જીયાહાને પરમેહેરુ કેદ કેયાહા, તોઅ તીહી જાયને તીયુ આત્માહાને હારી સુવાર્તા પ્રચાર કેયો. 20એ તીયા લોકુ આત્મા હાય આથ્યા, જાંહા નુહો જાહાજ બોનાવતલો તાંહા તીયા આજ્ઞા નાય પાલન કેયી, આને તીયા સમયુલે પરમેહેર ધીરજ રાખીને વાટ જોવતલો કા તે લોક પાસ્તાવો કેરી. પેન જાંહા પાંયુકી બાદા જગતુ નાશ કેરામે આલો, તાંહા જાહાજુમે ખાલી આઠ લોક ઉદ્ધાર પામ્યાહા. 21એ બાપ્તીસ્મા પ્રતિક હાય, જે આમી તુમા ઉદ્ધાર કેહે. બાપ્તીસ્મા અર્થ શરીરુ મોલ તુવુલો નાહ, પેન શુદ્ધ રદયુકી આપુ પરમેહેરુ માટે સમર્પણ કેરુલો હાય. ઓ બાપ્તીસ્મો ઇસુ ખ્રિસ્તુ મૃત્યમેને જીવતો ઉઠુલો મારફતે આપુ ઉદ્ધાર કેહે. 22આને તોઅ હોરગામે જાતો રીયો, આમી તોઅ પરમેહેરુ હુદીવેલે આને બાદા ખાશ જાગાપે બોહી ગીયોહો, આને તોઅ બાદા હોરગા દુત, બાદા અધિકારી આને બાદા શક્તિપે રાજ કેહે.

Currently Selected:

1 પિત્તરુ પત્રો 3: DUBNT

Highlight

Copy

Compare