1 પિત્તરુ પત્રો 2
2
જીવતો ડોગળો આને પવિત્ર પ્રજા
1ઈયા ખાતુરે, દરેક પ્રકારુ ખોટા વેહવારુકી દુર રેજા, બીજા આરી ધોકો માઅ કીહા, ઢોંગ માઅ કેરાહા, એકબીજાકી માઅ જલન કેરાહા, કેડા બી નિંદા માઅ કેરાહા. 2પેન જીયુ રીતીકી એક નવી વાચા જન્મ વીયો પોયરો પોતા યાહકી દુધ પીયા ખાતુરે લાલસા કેહે, તીયુજ રીતીકી તુમુહુ બી પરમેહેરુ વચનુલે હિકા લાલસા રાખા, કા તુમુહુ આત્મિક રીતીકી મુજબુત બોની સેકા આને તુમુહુ પુરી રીતીકી પરમેહેરુ મારફતે ઉદ્ધાર પામા. 3કાહાકા પવિત્રશાસ્ત્રમે લેખલો હાય, “તુમુહુ અનુભવકીને જાંય લેદોહો કા પ્રભુ ભલો હાય.”
4તુમુહુ પ્રભુ ઇસુ ખ્રિસ્તુ પાહી આલાહા જો પરમેહેરુ મંદિરુ જીવતો ખુણા ડોગળો હાય, તીયાલે ખુબુજ લોકુહુ ઇનકાર કી દેદો પેન પરમેહેરુહુ તીયાલે પસંદ કી લેદો આને પરમેહેરુ નજરુમે તોઅ ખુબુજ કિંમતી હાય. 5તુમુહુ પોતે બી જીવતા ડોગળા હોચે હાય, જીયાલે પરમેહેર પોતા માટે પોંગો બોનાવા માટે તુમનેહે કામુમે લેહે. કા તુમુહુ બી પવિત્ર યાજકુ સમાજ બોનીને, આત્મિક બલિદાન ચોળવી સેકા જીયાલે પરમેહેરુહુ ઇસુ ખ્રિસ્તુ લીદે સ્વીકાર કેહે. 6ઇ પવિત્રશાસ્ત્રમે લેખલો હાય તેહેકીજ હાય,
“હેરા! આંય સિયોનુમે એગાલે ખુણા ડોગળા હોચે થોવુહુ.
તોઅ પાયા માટે નીવળુલા કિંમતી ડોગળા હોચે હાય.
આને જો કેડો તીયાપે વિશ્વાસ કેરી,
તોઅ કેલ્લી બી રીતી નાય નાજ્વાય.” 7તુમુહુ જે ઇસુ ખ્રિસ્તુપે વિશ્વાસ કેતાહા, તુમા માટે ઓ ડોગળો ખુબુજ કિંમતી હાય,
પેન જે લોક તીયાપે વિશ્વાસ નાહ કેતા તીયા વિશે પવિત્રશાસ્ત્રમે લેખલો હાય કા,
“કારીગરુહુ જીયા ડોગળા કામુમે લેવુલો નકાર કી દેદલો,
તોજ પોંગા પાયા ખાશ ડોગળો બોની ગીયો.” 8આને ફાચે પવિત્રશાસ્ત્રમે ઇ બી લેખલો હાય, “ઈયા ડોગળાકી લોકુહુને ઠેસ પોચી, આને ઓજ ઠોકર લાગીને પાળનારો ડોગળો હાય,” કાહાકા તે વિશ્વાસ કેરા નાહ માગતા, ઈયા ખાતુરે તે ઠોકર ખાયને પોળી જાતાહા, પરમેહેરુહુ તીયાં આરી તેહેકીજ વેરુલો માટે યોજના બોનાવલી. 9પેન તુમુહુ પરમેહેરુ પંસદ કેલા લોક, આને યાજકુ ટોલા હાય જે રાજા સેવા કેતાહા, પવિત્ર લોક આને પરમેહેરુ પોતા પ્રજા હાય. તીયાહા તુમનેહે આંદારામેને પોતા અદભુત જ્યોતિમે હાધ્યાહા, કા તુમુહુ તીયા અદભુત કામુ વિશે આખી સેકા.
10ખુબુજ સમય પેલ્લા હોશે ભવિષ્યવક્તાહા તુમા વિશે લેખલો કા,
તુમુહુ પેલ્લા પરમેહેરુ લોક નાય આથા, પેન આમી તુમુહુ પરમેહેરુ લોક હાય.
પેલ્લા તુમુહુ પરમેહેરુ દયાલે નાય જાંતલા, પેન આમી તુમુહુ તીયાલે જાંતાહા,
કાહાકા તીયાહા તુમાપે પોતા દયા દેખાવીહી.
ખ્રિસ્તી જવાબદારી
11ઓ માઅ મેરાલાહા, તુમુહુ ઈયા જગતુમે પરદેશી આને પ્રવાસ કેરા આલ્લે માંઅ હોચે હાય, ઈયા ખાતુરે આંય તુમનેહે વિનંતી કીહુ કા તુમુહુ બાદી જાતિ ખોટી શારીરિક ઈચ્છાકી વાચાયા, કાહાકા એ તુમા આત્મા વિરુધુમે કામ કેહે. 12અન્યજાતિ લોકુમે તુમા વેહવાર હારો રાંઅ જોજે, કા તે જીયુ-જીયુ ગોઠીમે તુમનેહે ખારાબ કામે કેનારા હોમજીને તુમા નિંદા કેતાહા, તે તુમા ભલાયુ કામે હીને ઇસુ ખ્રિસ્ત ફાચે આવુલો દિહ પરમેહેરુ મહિમા કે.
અધિકારી આધિનુમે રેવુલો
13તુમુહુ તીયા બાદા અધિકારી આધિનુમે રેજા, જીયાહાને લોકુ મારફતે નિયુક્ત કેરામે આવતાહા, કાહાકા પ્રભુ ઇસુ એજ ઈચ્છા હાય. રાજા આધિનુમે રેજા, જે બાદા લોકુપે રાજ કેતાહા. 14આને રાજ્યપાલુ આધિનુમે બી રેજા કાહાકા જાંહા લોક ખોટે કામે કેતાહા, તા તીયાહાને દંડ આપા ખાતુરે આને જે હારે કામે કેતાહા તીયાં પ્રસંશા કેરા માટે રાજ્યપાલુહુનેજ રાજા ઉપયોગ કેહે. 15કાહાકા પરમેહેરુ ઈચ્છા એજ હાય, તુમુહુ હારે કામે કેરા, કા તુમુહુ તીયા મુર્ખ લોકુહુને તુમા વિરુધુમ ગલત આરોપ લાગવુલોકી ઓટકાવી સેકા, જે પરમેહેરુલે નાહ જાંતે. 16તુમુહુ પોતે સ્વતંત્ર લોકુ હોચે હાય જીવન જીવા, કાહાકા આપુ પ્રભુ ઇસુ ખ્રિસ્તુહુ તુમનેહે આઝાદ કી દેદાહા, પેન તીયુ આઝાદીમે ખોટે માઅ કેરાહા, પેન તુમુહુ પરમેહેરુ સેવકુ હોચે વેહવાર કેરા. 17બાદા આદર કેરા, બાદા વિશ્વાસી પાવુ-બોયુ આરી પ્રેમ રાખા, પરમેહેરુ બીખ રાખા, રાજય કેનારા અધિકારી સન્માન કેરા.
ખ્રિસ્ત આપુ નમુનો
18ઓ પોંગામે કામ કેનારા ગુલામુહુ, દરેક પ્રકારુ ભય રાખીને પોતા માલિકુ આધિનુમે રીને તીયા આખલો માના, ઇયુજ રીતીકી બાદા માલિકુ આધિનુમે રેજા, જો હારો આને હોમજેહે, આને જો કઠોર વેહવાર કેનારો હાય, તીયા આધિનુમે બી રેજા. 19કાહાકા કાદાચ આપુહુ પરમેહેરુ વિચાર કીને અન્યાય વેઠતા જાયને દુઃખ વેઠતાહા, તા પરમેહેર આપુકી પ્રસન્ન વેહે. 20કાહાકા કાદાચ ગુનાહ કીને માર ખાદો વેરી આને તીયાલે વેઠતાહા તા તીયામે તુમા પ્રસંશા કેરુલો કાય મતલબ નાહ, પેન કાદાચ હારે કામે કીને દુઃખ વેઠતાહા આને ધીરજ રાખતાહા, તા પરમેહેર પ્રસન્ન વેહે. 21તુમનેહે ઈયા ખાતુરુજ પરમેહેરુહુ હાધ્યાહા કાહાકા ખ્રિસ્ત બી તુમા માટે દુઃખ વેઠીને, તુમા માટે એક નમુનો બોન્યો, કા તુમુહુ બી તીયા અનુસાર જીવન જીવા.
22પવિત્રશાસ્ત્રમે લેખલો હાય, “તીયાહા કીદીહીજ પાપ નાહ કેયો,
આને તોઅ કીદીહીજ બી ઝુટો નાહ ગોગ્યો.” 23તીયાહા ખારાબ ગોઠયા ઉનાયને બી ખારાબ નાહ આખ્યો, આને જાંહા લોકુહુ તીયાલે ખુબુજ સતાવ્યો તા તીયાહા કેડાલુજ ધમકી નાહ આપી, પેન તીયાહા પોતા જીવન પરમેહેરુ આથુમે હોપી દેદોહો સાદા ખેરી રીતીકી બાદા લોકુ ન્યાય કેહે. 24જાંહા ઇસુ ખ્રિસ્ત મોયો, તા તોઅ પોતે આપુ પાપુહુને પોતા શરીરુમે લીને ક્રુસુપે ચોળી ગીયો, તીયાહા એહેકી ઈયા ખાતુરે કેલો કા આપુહુ પાપ કેરા બંદ કી દેદો આને ધાર્મિકતાકી જીવન જીવા લાગ્યા, આને તીયા માર ખાવુલો બાદ તુમુહુ હારા વેયા. 25તુમુહુ પેલ્લા ભટકી ગેહલા ઘેટા હોચે આથા, પેન આમી તુમુહુ તુમા આત્મા આગેવાન આને ચારવાલ્યા પાહી વોલી આલાહા.
Currently Selected:
1 પિત્તરુ પત્રો 2: DUBNT
Highlight
Copy
Compare
Share
Want to have your highlights saved across all your devices? Sign up or sign in
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
