Popular Bible Verses from 1 પિત્તરુ પત્રો 2

Share

પેન તુમુહુ પરમેહેરુ પંસદ કેલા લોક, આને યાજકુ ટોલા હાય જે રાજા સેવા કેતાહા, પવિત્ર લોક આને પરમેહેરુ પોતા પ્રજા હાય. તીયાહા તુમનેહે આંદારામેને પોતા અદભુત જ્યોતિમે હાધ્યાહા, કા તુમુહુ તીયા અદભુત કામુ વિશે આખી સેકા.

જાંહા ઇસુ ખ્રિસ્ત મોયો, તા તોઅ પોતે આપુ પાપુહુને પોતા શરીરુમે લીને ક્રુસુપે ચોળી ગીયો, તીયાહા એહેકી ઈયા ખાતુરે કેલો કા આપુહુ પાપ કેરા બંદ કી દેદો આને ધાર્મિકતાકી જીવન જીવા લાગ્યા, આને તીયા માર ખાવુલો બાદ તુમુહુ હારા વેયા. તુમુહુ પેલ્લા ભટકી ગેહલા ઘેટા હોચે આથા, પેન આમી તુમુહુ તુમા આત્મા આગેવાન આને ચારવાલ્યા પાહી વોલી આલાહા.

ખુબુજ સમય પેલ્લા હોશે ભવિષ્યવક્તાહા તુમા વિશે લેખલો કા, તુમુહુ પેલ્લા પરમેહેરુ લોક નાય આથા, પેન આમી તુમુહુ પરમેહેરુ લોક હાય. પેલ્લા તુમુહુ પરમેહેરુ દયાલે નાય જાંતલા, પેન આમી તુમુહુ તીયાલે જાંતાહા, કાહાકા તીયાહા તુમાપે પોતા દયા દેખાવીહી.

પેન જીયુ રીતીકી એક નવી વાચા જન્મ વીયો પોયરો પોતા યાહકી દુધ પીયા ખાતુરે લાલસા કેહે, તીયુજ રીતીકી તુમુહુ બી પરમેહેરુ વચનુલે હિકા લાલસા રાખા, કા તુમુહુ આત્મિક રીતીકી મુજબુત બોની સેકા આને તુમુહુ પુરી રીતીકી પરમેહેરુ મારફતે ઉદ્ધાર પામા.

ઓ માઅ મેરાલાહા, તુમુહુ ઈયા જગતુમે પરદેશી આને પ્રવાસ કેરા આલ્લે માંઅ હોચે હાય, ઈયા ખાતુરે આંય તુમનેહે વિનંતી કીહુ કા તુમુહુ બાદી જાતિ ખોટી શારીરિક ઈચ્છાકી વાચાયા, કાહાકા એ તુમા આત્મા વિરુધુમે કામ કેહે. અન્યજાતિ લોકુમે તુમા વેહવાર હારો રાંઅ જોજે, કા તે જીયુ-જીયુ ગોઠીમે તુમનેહે ખારાબ કામે કેનારા હોમજીને તુમા નિંદા કેતાહા, તે તુમા ભલાયુ કામે હીને ઇસુ ખ્રિસ્ત ફાચે આવુલો દિહ પરમેહેરુ મહિમા કે.

તુમુહુ પોતે બી જીવતા ડોગળા હોચે હાય, જીયાલે પરમેહેર પોતા માટે પોંગો બોનાવા માટે તુમનેહે કામુમે લેહે. કા તુમુહુ બી પવિત્ર યાજકુ સમાજ બોનીને, આત્મિક બલિદાન ચોળવી સેકા જીયાલે પરમેહેરુહુ ઇસુ ખ્રિસ્તુ લીદે સ્વીકાર કેહે.

ઈયા ખાતુરે, દરેક પ્રકારુ ખોટા વેહવારુકી દુર રેજા, બીજા આરી ધોકો માઅ કીહા, ઢોંગ માઅ કેરાહા, એકબીજાકી માઅ જલન કેરાહા, કેડા બી નિંદા માઅ કેરાહા.

તુમુહુ પ્રભુ ઇસુ ખ્રિસ્તુ પાહી આલાહા જો પરમેહેરુ મંદિરુ જીવતો ખુણા ડોગળો હાય, તીયાલે ખુબુજ લોકુહુ ઇનકાર કી દેદો પેન પરમેહેરુહુ તીયાલે પસંદ કી લેદો આને પરમેહેરુ નજરુમે તોઅ ખુબુજ કિંમતી હાય.

તુમુહુ પોતે સ્વતંત્ર લોકુ હોચે હાય જીવન જીવા, કાહાકા આપુ પ્રભુ ઇસુ ખ્રિસ્તુહુ તુમનેહે આઝાદ કી દેદાહા, પેન તીયુ આઝાદીમે ખોટે માઅ કેરાહા, પેન તુમુહુ પરમેહેરુ સેવકુ હોચે વેહવાર કેરા.

કાહાકા પરમેહેરુ ઈચ્છા એજ હાય, તુમુહુ હારે કામે કેરા, કા તુમુહુ તીયા મુર્ખ લોકુહુને તુમા વિરુધુમ ગલત આરોપ લાગવુલોકી ઓટકાવી સેકા, જે પરમેહેરુલે નાહ જાંતે.