फिलिप्पी 4

1तबइकिलाइ मेरा प्यारा भाइन, म तमनलाइ भौत प्रेम अद्दउ, रे तमनलाइ भेट्या भौत इच्छा छ, तमन मेरा आनन्द रे मुकुट हउ। मेरा प्यारा, मइले तमनलाइ भण्या अनसार प्रभुमि तमरो बिश्वास बालियो होइरउ।

पावलको सल्लाह

2म इयोदिया रे सुन्तुखेलाइ लगइ बिन्ति अद्दउ, कि यिन दुइ स्वानी प्रभुमि मेलमिलापमि बसुन। 3म तमलाइ सोद्दउ, सिसिगुस, जसो तमरो नाउँ छ, बिश्वासयोग्य सहकर्मी, म तमनलाइ यो बिन्ति लगइ अद्दउ कि यिन दुइ स्वानी मान्सनलाइ मेलमिलापमि बसाइलाइ सहयोग अर, क्याकि यिनले मसित सुसमाचार फइलाउन्या काममी, कष्टमी रे मेरा और सहकर्मी सित मिहिनेत अरिराइछ, जइको नाउँ तइ किताबमी लेखिरइछ जइमि अनन्त जीवन पाया मान्सनको नाउ लेखिया छ।

सदाइ आनन्दित होउ

4प्रभुमि सदाइ आनन्द अर। म आजी लगइ भण्नउ, आनन्द अर। 5तमरो सभ्य स्वभाव सब मान्सनले था पाउन। प्रभु छिट्टाइ आउनाछन। 6केइ कुरणीमि लगइ चिन्ता जन अर, तर तम हरेक परिस्थितिमि प्रार्थना रे निबेदनले धन्यवादसित तमरा बिन्ति परमेश्वरलाइ चढा। 7तब परमेश्वरले तमनलाइ सान्ति दिन्या हुन। यो सान्ति मान्सनको समज भण्ना बाइर छ। यइ सान्तिले तमरो हृदय रे मनलाइ येशू ख्रीष्टमी जोगाइबर राख्द्या हो।

यइ कुरणीमि ध्यान दिय

8अन्तमी बिश्वासि भाइन हो, जी सत्य छ, जी आदरणीय छ, जी धर्मि छ, जी सुद्द छ, जी सुन्दर छ, जी प्रसंसा अद्द्या योग्यको छ, जी असल छ, रे कसइमी मान्सन बठेइ आदर पाउन्या स्वभाव छ भण्या यिसा कुरणीमि मन ला। 9तमनले जइ कुरणी मेरा सब्द बठेइ रे मेरा काम बठेइ सिक्या, रे ग्रहण अर्या, तेइ कुरणी पालन अर। तब सान्तिका परमेश्वर तमनसित रइरनाहान।

भेटीकी निउति धन्यबाद

10म प्रभुमि बड्ताइ आनन्दित होइरइछु कि आब भौत दिन पछा मलाइ भेटी पठाइबर मेरा बारेमि तमले आजी फिक्री अर्या छौ। साच्ची तमन मेरो निउति चिन्तित थ्या, तर मलाइ सहयोग अददाइ तमनलाइ त्यो मौका मिल्या थेइन। 11मलाइ खाँचो पड्या चिज मसित आथिन भणबर मइले तमनलाइ गुनासो पोख्या होइन, क्याकि जसोइ परिस्थितिमि लगइ मइले सन्तुष्ट रन सिकिसक्या छु। 12खाँचो पणन्ज्या लगइ, रे प्रसस्त हुन्ज्या लगइ, कसेरी जीवन बिताउनु पणन्छ, म जाण्नउ। जसाइ परिस्थितिमि लगइ, थोक्काइ खान्या चिज भया लगइ, प्रसस्त भया लगइ, मइले सन्तुष्ट भइबर जीवन बिताउन सिक्याछु। 13मलाइ सक्ति दिन्या ख्रीष्ट बठेइ म सब कुरणी अद्द सक्दउ।

14पइलगइ तमनले मलाइ भेटी दिबर मेरा दु:खमी सहभागी भया हुनाले धन्यबाद। 15फिलिप्पी सहरका मान्सन, तमन आफइ लगइ जाणन्छौ कि तमनकीलाइ सुसमाचारको प्रचार अर्या दिन बठेइ जब म माकेडोनिया प्रदेस गया, तब तमन बाहेक और कोइ मण्डलिले मलाइ भेटी दिबर सहयोग अरेइन। 16इसेरि जब म थेसलोनिके सहरमि थ्या, तब मलाइ सहयोग चाइया बेला तमनले दुइ बेर मलाइ भेटी पठाइबर सहयोग अर्या। 17म यो भणनइन कि तमनले मलाइ भेटी दिबर सहयोग अर, बरु म चाहानउ कि तमनले अरया कामको इनाम पाउन सक।

18मइले जो पाउनु हो तइ भण्न्ना बड्ता पाइराइछु। मइले इपाफ्रोडिटस बठेइ तमनले पठाया उपहार पाया। तमनले पठाया उपहार मेरा निउति पुजारिले परमेश्वरलाइ चडाया मिठो बास आउन्या भेटी रे बलिदान जसोइ हो। जो परमेश्वरलाइ भौत खुशी पडद्या रे ग्रहणयोग्य छ। 19मेरा परमेश्वरले आफ्नो महिमामि उनरो सम्पति अन्सार तमरो सब खाँचो येशू ख्रीष्टमी पुरा अरिदिन्या हुन। 20आब हामरा परमेश्वर रे पितालाइ सदाइ भरि महिमा होइरउ। आमेन।

अबिबादन रे आसिर्बाद

21येशू ख्रीष्टमी सब पबित्र जनलाइ मेरो अबिबादन दिय। मसित भया भाइनले लगइ तमनलाइ अबिबादन पठाया छ। 22सब पबित्र जन रे बिसेस अरिबर सम्राटका महलमिका परमेश्वरका मान्सनले तमन सबलाइ अबिबादन पठाया छ।

23हामरा प्रभु येशू ख्रीष्टको अनुग्रह तमनसित होइरउ। आमेन।

Currently Selected:

फिलिप्पी 4: DTYNT

Highlight

Copy

Compare