लूका 4
4
येशूको परिक्षा
(मत्ती ४:१-११; मर्क १:१२-१३)
1येशू पबित्र आत्माले भरिबर यर्दन नदी बठेइ फर्किबर आया। रे पबित्र आत्माले येशूलाइ उजाड ठाउँमि लैया, 2रे चालिस दिन सम्म उजाड ठाउँमि सैतान बठेइ उनलाइ परिक्षा भयो। चालिस दिन सम्म उनले केइलगइ खाएइन, रे चालिस दिन पछा उन भोकाया।
3सैतानले उनरा वाँ आइबर भण्यो, “यदि तम परमेश्वरका चेला हौ भण्या, यिन ढुङालाइ रोटा होइजाउन भणि आज्ञा अर, ताकि तम तिन रोटा खान सक।”
4येशूले तइलाइ जबाफ दिइबर भण्यो, “लेखिरइछ मान्स रोटाले मान्तर जिउनो रनइन।”
5सैतानले उनलाइ एक उच्चा ठाउँमि लइजाइबर एकै बेरमि धर्तिका जम्माइ राज्य धेकायो। 6सैतानले उनलाइ भण्यो, “म यो सब अधिकार रे यइको गौरब तमलाइ दिनउ, क्याकि यिन जम्माइ मलाइ दिइराइछ, रे म जइलाइ इच्छा अद्दउ उइलाइ दिनउ।” 7तमले मलाइ आराधना अर्या भण्या यिन सब तमरा हुन्या हुन।
8येशूले तइलाइ जबाफ दिइबर भण्यो, “लेखिरइछ तुइले परमप्रभु, आफना परमेश्वरलाइ आराधना अरेइ, रे उनरो मान्तर सेवा अरेइ।”
9आब सैतानले येशूलाइ पबित्र यरुशलेम सहरमि लइय्यो रे मन्दिरका टुप्पामि पुगाइबर उनलाइ भण्यो, “यदि तम परमेश्वरको चेला हौ भण्या याँ बठेइ तल्तिर फट्टक हाल।” 10क्याकि पबित्र सास्त्रमि लेखिरइछ, “तमलाइ बचाउनाइ परमेश्वरले आफना स्वर्गदुतलाइ आज्ञा अद्या हुन 11रे तिननले तमलाइ आफना हात-हातइ समाउन्या हुन, रे तमरा खुट्टा ढुङामि ठोकिन्या होइन्न।”
12येशूले तइलाइ जबाफ दिइबर भण्यो, “यिसो भणिरइ छ, तुइले परमप्रभु आफ्ना परमेश्वरको परिक्षा जनअरेइ।”
13सैतानले उनलाइ सब परिक्षा अरिसकिबर अनुकूल समय नहुन्ज्या उनलाइ छाडिबर गयो।
14येशू पबित्र आत्माको सक्तिमि गालील जिल्लामि फर्किबर गया, रे उनरा बिसयको कुरणी वलतिर पल्तिरका सब ठाउँमि फैलियो। 15येशूले यहुदि सभाघरमी सिकाउन लाग्या, रे सबले उनरो प्रसंसा अर्यो।
16उन नासरत गाउँमी फर्किबर गया, जाँ उन हुर्क्या। उन आफ्नो चलन अन्सार बिश्राम दिन यहुदि सभाघरमी गया, रे पबित्र सास्त्र पड्डाइलाइ कलिया। 17उनलाइ यशैया अगमबक्ताको किताब दियो। उनले तइ किताब खोल्यो, रे यो खण्ड निकाल्यो जइमि यिसो लेखिरइथ्यो:
18परमेश्वरका आत्मा ममि छ,
क्याकि गरिबलाइ सुसमाचार सुणाउनाइलाइ
उनले मलाइ अभिषेक अरिराइछ।
कैदीनलाइ स्वतन्त्रताको घोषणा अद्दाइलाइ,
रे अन्धालाइ दृष्टि दिनाइलाइ,
अत्याचारमि पड्या सबलाइ मुक्त अद्दाइलाइ,
19रे परमेश्वरको दया धेकाउन्या समय आया छ भण्नाकिलाइ उनले मलाइ पठाया छ।
20उनले तइ किताब बन्द अर्यो, रे एक जाना सेबकलाइ दिइबर उन बस्या। यहुदि सभाघर भितर भया सबले येशूलाइ एकोरो हेर्यो। 21तब उनले तिननलाइ भण्यो, “आज पबित्र सास्त्रको यो बचन तमनले सुण्न्ना सुण्न्नाइ पुरा भया छ।”
22सबले उनरो बडवाँइ अर्यो, रे उनरो मुख बठेइ निकल्या कृपापूर्ण बचनमी छक्क पड्या, रे तिननले भण्यो, “यिन योसेफका चेला होइन्न ब?”
23उनले तिननलाइ भण्यो, “पक्कालगइ तमनले मलाइ यो उखान भण्न्या हौ, ‘ए बैद्दी, आफइलाइ निको बना। कफर्नहुम गाउँमी तुइले जी जति अर्या भणि हामले सुणिराइथ्या, तिन याँ आफना सहरमि लगइ अर’।” 24रे उनले भण्यो, “साँच्चि म तमनलाइ भण्न्नउ, कोइलगइ अगमबक्तालाइ आफनाइ देस रे आफनाइ ठाउँमि मान्स सम्मान अद्दाइन्न। 25मेरी कुरणी सुण। यो सत्य हो कि इस्राएल देशमि एलिया अगमबक्ताको पालामि ताँ भौत बिधवा थिन, तइ बेला जब साडे तीन बर्ष सम्म पानी पडेइन, याँ सम्मकि पुराइ इस्राएल देशमि ठुलो अनिकाल पड्या थ्यो। 26तर एलिया सिदोन सहरको नजिक सारपत गाउँमी भएइ एक गैर-यहुदि बिधवाका वाँ मान्तर पठाइया, रे इस्राएल देशमि और कसइ बिधवा वाँ पठाइयइन्न। 27एलिशा अगमबक्ताको पालामि इस्राएल देशमि भौत कोणी थ्या, तर सिरिया देस बठेइ नामान, गैर-यहुदि मान्स मान्तरइ निको पाडीयो, और कोइलगइ निको पाडिएइन्न।”
28यिन कुरणी सुणिबर यहुदि सभाघरमी भया सब जाना रिसले मुर्मुरिया। 29तिनन उठ्या रे उनलाइ सहर बठेइ बाइर निकाल्यो, रे जइ पहाडमि तिनरो सहर बनाइराइथ्यो, तइका टुप्पामि लइजाइबर उनलाइ माद्दाइकीलाइ तल्तिर खित्ताइ खोज्यो। 30तर उन तिनरा बिच बठेइ निकलिबर गया।
भूत लाग्या मान्स
(मर्क १:२१-२८)
31तइ पछा येशू गालील जिल्लाको कफर्नहुम गाउँमी गया रे बिश्राम दिनमि उनले तिननलाइ शिक्षा दिन लाग्या। 32तिनन येशूको शिक्षा सुणिबर छक्क पड्या, क्याकि उनले बचन पुरा अधिकारसित सिकाउन्थ्या।
33यहुदि सभाघरमी एक मान्स थ्यो जइलाइ भूत लागिरइथ्यो, रे तइले जोरले कला हाल्यो, 34“हे नासरत गाउँका येशू, तमरो हामसित कि काम? कि तम हामलाइ नास पाड्डाइ आया हौ? म तमलाइ पछेण्नउ, तम को हौ? तम मान्तर पबित्र जनहउ जो परमेश्वरका वाँ बठेइ आया हौ।”
35रे येशूले भूतलाइ यिसो भणि हकाद्द पस्या, “चुप लाग रे तइ बठेइ निकलिबर जा।” तइ मान्सलाइ घुडबुडयाउनोइ तइलाइ केइलगइ हानि नअरिबर त्यो भूत तइ मान्स बठेइ निकलिबर गयो।
36तब तिनन सब मान्सले भौत अचम्म माण्यो, रे एक-अर्खासित यिसो भण्यो, “यो ज्ञानकी कुरणी रइछ यिनले त अधिकारसित रे सक्तिसित भूतलाइ आज्ञा दिनाहान रे भूत निजानाहान।” 37येशूका बारेमि वलतिर पल्तिरका सब ठाउँमि फैलियो।
38यहुदि सभाघर बठेइ निकलिबर उन सिमोनका घर पस्या। सिमोनकि सासु जरले सिकिस्त होइरइथिन, रे तिननले उइकी निउति येशूसित बिन्ति अर्यो। 39उइका नजिकै गइबर उनले जरलाइ हकार्यो, रे जरले उइलाइ छाड्यो, उतनजेइ उठीबर उइले तिननलाइ खानाइ दियो।
40बसाइतक भौत मान्सन जो बिमारी रे जइलाइ भूत लाग्याथ्यो सबलाइ तिननले उनरा वाँ लेया। उनले तिनन सबमि आफना हात राखिबर तिननलाइ निको पाड्यो। 41भौत मान्सन बठेइ भूत लगइ कला हाल्लाइ रे इसो भण्नाइ निकल्या, “तम परमेश्वरको चेलो हौ।” तर उनले तिनलाइ हकारिबर बोल्लइ दिएइन, क्याकि भूतले उन येशू ख्रीष्ट हुन भणि चिन्याथ्यो।
42परभातइ सुर्य आउना हइ पइल्ली येशू उठीबर एकान्त ठाउँमि गया। भिड उनलाइ खोज्जाइ उनरा वाँ आया, रे “हामलाइ छाडिबर जन जा” भणि उनलाइ रोक्दाइ कोशिस अर्यो। 43तर येशूले तिनलाइ भण्यो, “मइले परमेश्वरको राज्यको सुसमाचार और सहरमि लगइ प्रचार अद्दु पणन्छ, क्याकि म इसइकि निउति पठाइया हु।” 44रे उन यहुदिया जिल्लाका यहुदि सभाघरमी प्रचार अद्द लाग्या।
Currently Selected:
लूका 4: DTYNT
Highlight
Share
Compare
Copy
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
