१ कोरिन्थी 1

अबिबादन

1म, पावल यो चिठ्ठी लेख्दाछु। म परमेश्वरका इच्छा बठेइ येशू ख्रीष्टको छान्या शिष्य हुनाइलाइ बोलाइया हु। म याँ हामरा बिश्वासि भाइ सोस्थेनेससित छु, 2म कोरिन्थ सहरमि भया परमेश्वरका मण्डलिलाइ लेख्दाछु, जइलाइ उनले येशू ख्रीष्टसित एक बनाइबर आफना मान्सनका रुपमि अलग अर्या छन, रे उनरा पबित्र जन हुनाइ बोलाया छन। उनले हामरा प्रभु येशू ख्रीष्टलाइ प्रार्थना अद्द्या सब ठाउँका मान्सनलाइ पबित्र बनाया जसेरि तमनलाइ लगइ पबित्र बनाया छन, क्याकि उन हाम सबइका प्रभु हुन। 3म प्रार्थना अद्दउ कि हामरा परमेश्वर पिता रे प्रभु येशू ख्रीष्ट तमन प्रति अनुग्रही हुन रे तमनलाइ सान्ति दिउन।

पावलले परमेश्वरलाइ धन्यबाद दियाको

4म तमरि निउति परमेश्वरलाइ सदाइ धन्यबाद चडाउनउ, क्याकि तमरो येशू ख्रीष्टसित सम्बन्ध छ रे उनरा अनुग्रह बठेइ उनले तमनलाइ भौत आशिस दिया छन। 5क्याकि ख्रीष्ट येशूसित मिलाप भया हुनाले तमनले हरेक किसमले भौत आशिस पायाछौ। खास अरिबर उनले तमनलाइ उनरो बचन बोल्लाइ रे बुज्जाइ हरेक किसिमको खास क्षमता दिया छ। 6यिसेरी परमेश्वरले तमनलाइ साबित अर्यो कि ख्रीष्टको बारेमिको सन्देश सत्य हो।

7तबइकिलाइ हामरा प्रभु येशू ख्रीष्टको फर्कि आउन्या बाटो हेरन्ज्या चाइन्या सब बरदान पबित्र आत्माले तमनलाइ दिया छ। 8हामरा प्रभु येशू ख्रीष्ट फर्कि आउन्या दिनमि तमन दोस रहित होउ भणबर परमेश्वरले तमनलाइ अन्त सम्म बिश्वासमि बालियो बनाउन्या हुन। 9परमेश्वरले तमनलाइ उनरा चेलो हामरा प्रभु येशू ख्रीष्टसित एक हुनाइलाइ छान्यो, रे परमेश्वरले बिश्वासयोग्यसित बाचा अर्या कुरणी पुरा अददाहान। तबइकिलाइ तमन पक्‍का हुन सकन्छौ कि उनले तमरा निउति यो अद्दया हुन।

मण्डलिमि फुट

10बिश्वासि भाइन हो, हामरा प्रभु येशू ख्रीष्टका नाउँमि म तमनलाइ बिन्ति अद्दउ कि तमन एक दोसरा सित सहमत होउ, ताकि तमरा बिचमि केइलगइ फुट जन होउ। बरु तमन एकइ मन एकइ बिचारका होउ। 11क्याकि मेरा बिश्वासि भाइन हो, तमनमि झगडा छ भणबर मलाइ क्लोएका परिबारले खबर दिराइछ।

12मेरो भणाइको अर्थ यो हो कि तमन कसइले, म पावलको शिष्य हु, कसइले म अपोल्लोसको शिष्य हु, कसइले म केफासको शिष्य हु, कसइले म ख्रीष्टको शिष्य हु भणन्छौ अरे। 13जो तमन अददाछौ त्यो असल होइन क्याकि ख्रीष्ट बाँडीया आथिन। म पावल, तमनकीलाइ क्रुसमि मर्या होइन। तमनले म पावलका नाउँमि बप्तिस्मा लगइ लिया होनु।

14म परमेश्वरलाइ धन्यबाद दिनउ कि मइले तमन मध्ये दुइ भाइ क्रिस्पस रे गायसलाइ बाहेक और कसइलाइ लगइ बप्तिस्मा दिया आथिन। 15तबइकिलाइ मेरा नाउँमि बप्तिस्मा भयो भणबर तमन कसइले भण्न सक्दानु। 16अइल मलाइ याद आयो कि मइले स्तिफनासका परिवारलाइ लगइ बप्तिस्मा दिया हु। तइ बाहेक मइले और कसइले बप्तिस्मा दिया कुरणी मलाइ था आथिन।

17क्याकि बप्तिस्मा दिनाइ होइन तर सुसमाचार प्रचार अद्दाइ ख्रीष्टले मलाइ पठाया हो, रे मइले सुसमाचार प्रचार अरन्ज्या म आफ्नो मानब बुद्दिको प्रयोग अद्दइन। नतित मान्सनले मेरो मानब बुद्दीका लाग्दा ममि बिश्वास अद्दया हुन रे तिननले क्रुसमि भया ख्रीष्टको बलिदानको सक्ति था पाउन्या आथिन्न।

ख्रीष्टको सक्ति रे परमेश्वरको ज्ञान

18क्याकि दण्ड पाउनाइ परमेश्वर बठेइ अलग भया मान्सनले क्रुसमि भया ख्रीष्टको मृत्युको शिक्षालाइ मुल्यहिन सोच्चाहान, तर हाम जाण्नाउ कि हाम उद्दार पाइरयाका निउति, यो परमेश्वरको सक्तिको प्रमाण हो। 19क्याकि पबित्र सास्त्रमि परमेश्वरले भण्नाहान,

म तिन मान्सनका सोचलाइ धेकाउन्या हु जइलाइ यइ संसारका मान्सनले सोच्चाहान कि तिनन बुद्दिमान छन तर साच्ची तिनरा सोच मुर्ख छन।

म यो साबित अद्द्या हु कि तिनन साच्ची चलाक आथिन।

20तसो भया यइ संसारका बुद्दिमान मान्सन, मोशाको कानुन सिकाउन्यावाला रे एक असल तर्क अद्द्यावाला मान्सनको हालत कि हुन्या हो? क्याकि परमेश्वरले पइल्ली धेकायाछ कि तिनरा संसारिक बुद्दि केइ मुल्यका आथिन। 21म यो भणनउ क्याकि परमेश्वरले बुद्दीसित निर्णय अर्यो कि यइ संसारका मान्सन आफ्ना बुद्दि बठेइ उनलाइ चिन्न सकद्या आथिन। तबइकिलाइ हामले प्रचार अर्या सुसमाचारमि बिश्वास अद्द्यालाइ परमेश्वरले बचाउन्या निर्णय अर्यो, जबकि हामरो प्रचारमि बिश्वास नअद्द्याले भण्नाहान कि यो केइ कामको आथिन।

22यो यहुदि मान्सनकि निउति मुर्खता हो क्याकि तिननले यइलाइ सत्य साबित अददाइ स्वर्ग बठेइ चिन्ह माग्दाहान रे यो गैर-यहुदि मान्सनकिलाइ लगइ मुर्खता हो जो मानब बुद्दि खोज्जाहान। 23तर हाम प्रचार अददाउ कि ख्रीष्ट हामरा पाप बठेइ छुटकारा दिनइ क्रुसमि मर्या। जो यहुदि मान्सनका निउति बाधा #1:23 बाधा क्याकि तिननले सोच्या थ्या कि ख्रीष्ट सदाइकि निउति जिउना रन्या हुन, तबइकिलाइ तिननले बिश्वास अद्द सकेइन कि येशूइ ख्रीष्ट हुन। रे गैर-यहुदि मान्सनकि निउति मुर्खता हो।

24तर जइलाइ परमेश्वरले बोलाया छन, यहुदि हुन अथवा गैर-यहुदि हुन, ख्रीष्टइ परमेश्वरका सक्ति रे बुद्दि हुन। 25क्याकि जो कुरणी परमेश्वरको मुर्खता जसो लागन्छ त्यो मान्सनका बुद्दि भण्न्ना श्रेष्‍ठ छ रे जो कुरणी परमेश्वरको दुर्बलता जसो लागन्छ त्यो मान्सनका ताकत भण्ना सक्तिशाली छ।

प्रभुमि मान्तर घमण्ड अददु

26बिश्वासि भाइन हो, जब परमेश्वरले तमनलाइ छान्या बेला तमन को हालत कसो थ्यो? त्यो बिचार अर मानब सोच अन्सार तमन मध्ये केइ जाना बुद्दिमान अथवा बलबान अथवा खानदानी थ्यानु। 27बरु बुद्दिमान मान्सनलाइ लाजमि पाड्डाइ परमेश्वरले तिननलाइ छान्यो जो संसारका नजरमि मुर्ख छन रे बलबान मान्सनलाइ लाजमि पाड्डाइ परमेश्वरले संसारका नजरमि कमजोर मान्सनलाइ छान्यो।

28परमेश्वरले तिनन मान्सनलाइ चुन्यो जो संसारका मान्सन बठेइ नगणीया छन, जइलाइ तिननले मजाकमि उडाउनाहान, जइलाइ तिननले केइ कामका आथिन भण्नाहान, ताकि मान्सनले जाण्न सकुन कि तिनरा नजरमि जी लगइ मूल्यवान छ त्यो परमेश्वरकि निउति केइ मुल्यको आथिन। 29परमेश्वरले इसो अर्यो ताकि कसइ मान्सनले परमेश्वरका अगाडी घमण्ड जन अरउ।

30तर परमेश्वरले हामलाइ येशू ख्रीष्टसित एक बनाया छ रे ख्रीष्ट बठेइ हामलाइ बुद्दि दिनाहान। परमेश्वरले हामलाइ आफ्ना नजरमि धर्मि लगइ बनाउनाहान। ख्रीष्ट बठेइ हाम पबित्र बनाइया छौ, रे उनले हामलाइ पाप बठेइ छुटकारा दियो। 31ख्रीष्ट हामरो सब थोक भया हुनतक, पबित्र सास्त्रमि भण्या अनसार अर, “घमण्ड अद्देले प्रभुले अर्या काममी घमण्ड अरउ।”

Currently Selected:

१ कोरिन्थी 1: DTYNT

Highlight

Copy

Compare