रोमी 16

व्यक्तिगत अबिबादन

1म किंक्रिया सहरमि भया मण्डलिकी सेबिका संगि बिश्वासि बइनि फिबीलाइ तमनले आदर अर्या म चाहानउ। 2परमेश्वरका मान्सनले एक अर्खालाइ स्वागत अर्या जसेरि तमनले तिनलाइ प्रभुमि स्वागत अर रे तिनलाइ तमन बठेइ चाइय्या सहयोग अर, क्याकि तिन आफइले भौत मान्सनलाइ रे मलाइ लगइ सहयोग अरेइ छन।

3प्रिस्किला बइनि रे उनरा बैकान अकिलास, ख्रीष्ट येशूमि मेरा सहकर्मिलाइ मेरो अबिबादन दिय। 4तिननले मेरा निउति आफना जीवन जोखिममि हाल्यो। तिननलाइ मइले मान्तर होइन, तर गैर-यहुदि मान्सनका मण्डलिमि भया सबले धन्यबाद दिनाहान। 5तिनरा घरमि जम्मा हुन्या मण्डलिलाइ अबिबादन दिय। मेरा प्यारा भाइ इपेनितस, जो एसिया प्रदेस बठेइ ख्रीष्टमी बिश्वास अद्दया पइलो मान्स हुन, तिनलाइ अबिबादन दिय।

6मरियम, जइले तमरा बिचइनि कडा मिहिनेत अरिन, तिनलाइ अबिबादन दिय। 7एन्ड्रोनिकस भाइ रे युनियस बइनि, मेरा संगि यहुदि मान्सन रे पइल्लिका मेरा संगि कैदीलाइ, अबिबादन दिय। तिनन येशू ख्रीष्टका छान्या शिष्या बठेइ भौत सम्मानित छन, रे तिननले म भण्ना अगाडी ख्रीष्टमी बिश्वास अरिसक्याथ्यो। 8एम्प्लीआतस भाइ, प्रभुमि मेरा प्यारालाइ, अबिबादन दिय।

9ख्रीष्टले इमानदार ठराया उर्बानस भाइ, ख्रीष्टमी हामरा सहकर्मी, रे मेरा प्यारा संगि स्ताखुसलाइ अबिबादन दिय। 10ख्रीष्ट प्रति इमानदार ठहरिया अपोल्लश भाइलाइ अबिबादन दिय। भाइ अरिस्तोबुलसका परिवारलाइ अबिबादन दिय। 11मेरा संगि यहुदि मान्स हेरोदियन भाइलाइ अबिबादन दिय। प्रभुमि बिश्वास अद्द्या भाइ नर्किससका परिबारलाइ अबिबादन दिय। 12प्रभुमि मिहिनेत अद्द्या बइनि त्रुफेना रे त्रोफोसालाइ अबिबादन दिय। प्रभुमि भौत मिहिनेत अद्द्या प्यारि बइनि परसीसलाइ अबिबादन दिय। 13परमेश्वर बठेइ छान्या प्रभुका सेवामि खास सेवक रुफस भाइ रे तइकि इजा, जो मेरी लगइ इजा जसि हुन, तिननलाइ अबिबादन दिय। 14असिंक्रितस, फ्लेगन, हर्मेस, पत्रोबास, हर्मास, रे तिननसित भया संगि बिश्वासि भाइनलाइ अबिबादन दिय। 15फिलोलोगस भाइ, रे युलिया बइनि, नेरियस भाइ रे तइकि बइनि, रे ओलिम्पास भाइ, रे तिननसित भया सब पबित्र जनलाइ अबिबादन दिय। 16एकले अर्खालाइ पबित्र चुम्बनले अबिबादन अर। ख्रीष्टमी सब मण्डलिले तमनलाइ अबिबादन पठाइराइछ।

भडकाउन्या मान्सन बठेइ होशियार

17बिश्वासि भाइन हो, म तमनलाइ बिन्ति अद्दउ कि तिन मान्सन बठेइ होशियार बस जइले फुट ल्याउनाहान, रे जइले मान्सनलाइ गलत कुरणीमि बिश्वास अद्दया बनाउन्छ जो तमनले सिक्या शिक्षाका बिरुद्दमि हो। तिनन बठेइ अलग बस। 18क्याकि यिसा मान्सनले हामरा प्रभु ख्रीष्टकी निउति होइन, तर आफना व्यक्तिगत चासोकि निउति सेवा अद्दाहान, रे तिननले मिठो-मिठो सब्द रे चिफला कुरणीले निर्दोष मान्सनलाइ धोका दिनाहान।

19सबलाइ था छ कि तमन प्रभुप्रति आज्ञाकारी छौ, तबइकिलाइ म तमरा लाग्दा आनन्द अद्दउ। तर म चाहानउ, कि तमन असल कुरणी जाण्नाइ बुद्दिमान हौ, तर खराब कुरणी अददाइ निर्दोष हौ। 20सान्ति दिन्या परमेश्वरले छट्टाइ सैतानलाइ नष्ट अद्दया हुन रे उइलाइ तमरा अधिनमी ल्याउन्या हुन।

हामरा प्रभु येशू ख्रीष्टको अनुग्रह तमनसित होइरउ।

पावलका साथी बठेइ अबिबादन

21तिमोथी मेरो सहकर्मी, रे मेरा संगि यहुदि भाइन लुकियस, यासोन रे सोसिपात्रोसले तमनलाइ अबिबादन पठाइराइछ। 22म तर्तियस, जइले यो चिठ्ठी पावलका तर्फ बठेइ लेख्दाछु, म लगइ प्रभुका जनका रुपमि अबिबादन पठाउनउ। 23गायस भाइले लगइ अबिबादन पठाइराइछ। म उइका घरमि बस्सउ जाँ मण्डलि जम्मा हुन्छ। इरास्तस, जो सहरको कोषाध्यक्ष हो, रे हामरो भाइ क्वार्टसले तमनलाइ अबिबादन पठाइराइछ। 24म प्रार्थना अद्दउ कि हामरा प्रभु येशू ख्रीष्टको अनुग्रह तमनसित रइजाउ। आमेन।

आसिर्बाद

25आब उनलाइ, जइले तमनलाइ प्रचार अर्या येशू ख्रीष्टका बारेमिको सुसमाचार अनसार बिश्वासमि बलियो बनाउन सक्दाहान, तइ रहस्यको प्रकाश अनसार, जो युग-युग बठेइ गोप्य रइरइथ्यो, 26तर आब अनन्तका परमेश्वरको आज्ञा अन्सार अगमबक्ताले लेख्या कुरणी बठेइ धेकाइया रे जनाइया छ, ताकि सब जातिले बिश्वास अरुन रे आज्ञापालन अरुन:

27एक मान्तर सर्वज्ञानी परमेश्वरलाइ येशू ख्रीष्ट बठेइ सदासर्वदा महिमा होउ। आमेन।

Currently Selected:

रोमी 16: DTYNT

Highlight

Copy

Compare