ENDE-ENDEN SALOMO 2
2
1Aku bali kap ras rudang-rudang si turah-turah bana i Baluren Saron,
bunga ncole si turah i berneh deleng.
Dilaki
2Desken bunga ncole i tengah rambah duri,
bage me impalku i tengah diberu-diberu.
Diberu
3Bali ras batang apel, i tengah kerangen
bage me impalku i tengah-tengah dilaki si deban.
Meriah ukurku cilinggem i teruhna,
buahna, entebu kuakap nanamna.
4Ibabana aku ku ingan erpesta,
ipernehenna aku alu dem ngena ate.
5Pegegehi aku mulihken alu buah anggur,
pesenang dagingku alu buah apel.
Lanai tertahanken tedeh ateku.
6Tanna si kawes natang takalku,
alu tanna si kemuhen isapu-sapuna aku.
7O diberu Jerusalem erpadanlah,
ersumpahlah erkiteken belkih ras balua si meter kiam,
maka la atendu nganggu kami,
kami si sangana singenan.
Ende-enden si peduaken
Diberu
8Kubegi sora impalku.
Kiam-kiam mentasi deleng-deleng pedas-pedas ia ngepari
uruk-uruk ndahi aku.
9Impalku bali ras belkih,
bali ras anak balua,
tedis deherken tembok,
ipernehenna arah jendela,
iintipna arah renggang-renggang.
10Ngerana impalku man bangku.
Dilaki
Mari impalku, ikutken aku.
11Paksa mbergeh ras paksa perudan enggo lepas.
12I bas mbalmbal rudang-rudang enggo terlak e kap paksana rende-rende.
Sora ndukur erlebuh terbegi i juma-juma.
13Buah ara enggo mulai tasak,
bau bunga anggur enggo teranggeh.
Mari impal, mari keleng ateku, ikutken aku.
14Kam desken nderpati si cebuni
i bas lingling batu.
Pelepas min kuidah rupandu si mejile,
pediat min kubegi sorandu si mehuli e.
15Tangkap min serigala si kitik-kitik, ope denga sempat icedakenna
peken anggur kami si sangana erbunga.
Diberu
16Impalku e aku kap empuna, janah aku ia empuna,
ipermakanina rarasen e i tengah-tengah bunga ncole
17seh ngayak rembus angin erpagi-pagi,
janah kegelapen enggo mulai lesap.
Mulih pedas, o impalku, bali ras belkih;
bali ras anak belkih i datas deleng si erbatu-batu.
Currently Selected:
ENDE-ENDEN SALOMO 2: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
