ENDE-ENDEN SALOMO 1
1
1Ende-enden Salomo si lanai kal tanggung jilena. #1Raj 4:32
Ende-enden si pemena
Diberu
2Iemaindu aku alu biberndu,
keleng atendu tebun asangken anggur.
3Lanai tanggung rimna bau minak wangindu,
gelarndu desken minak wangi si maler, e me sabapna;
kerina singuda-nguda erngena ate man bandu!
4Babaken min aku, kiam kita;
kamlah jadi rajangku, e maka babalah aku ku bas bilikndu.
Radu ras kita ngenanami kesenangen,
ngenanami keleng atendu, seh mabuk i bas ate ngena;
la mamang ate, adi kerina diberu rate ngena man bandu!
5Singuda-nguda Jerusalem! Mberu kap aku aminna pe mbiring,
mbiring desken kemah-kemah Kedar si gelap,
tapi mejile desken kire-kire istana Salomo!
6Ola kam megombang ngenen rupangku,
sabap ayongku enggo pan las.
Itembehi kaka-kakangku aku
isuruhna aku erdahin, ngiani peken anggurna
seh maka lanai aku sempat pekena-kena dagingku.
7Kataken man bangku, o jadi ateku,
ku ja ipermakanindu biri-birindu?
I ja ia ipederumndu tupung las wari?
Kai gunana kam kudarami
i tengah-tengah rarasen permakan si deban?
Dilaki
8Kam kap singuda-nguda si mberuna,
ma itehndu kin ingan e?
Ikut-ikutlah rarasen e,
permakanilah kambingndu deherken kemah kalak permakan.
9O keleng ateku, debet-debet pusuh dilaki ngenehen kam
bali ras kuda raja Mesir erngih-ngih ngidah kuda beru-beru.
10Mejile pipindu sembaba ras perhiasen si ipakendu,
bage pe kerahungndu si mejile make bura.
11Sibahan pagi emas man perhiasenndu,
rikut ras pirak jadi mainenna.
Diberu
12Rajangku galang-galang i bas ingan medemna,
bau minak wangingku merim iembusken angin.
13Jadi ateku merim desken mur,
tupung ipedemkenna bana i babo tentenku.
14Keleng ateku desken setangke bunga kacar
terlak ia i bas peken anggur En-gedi.
Dilaki
15Andiko mberu kal kam, o jadi ateku,
matandu nalsalken keleng atendu.
Diberu
16Mejile kal rupandu, o keleng ateku,
malem kal ateku ibahanndu!
Dukut-dukut meratah sibahan inganta medem;
17batang-batang kayu aras sibahan jadi binangun rumahta,
janah batang cemara sibahan langit-langitna.
Currently Selected:
ENDE-ENDEN SALOMO 1: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
