ENDE-ENDEN SALOMO 3
3
1Tupung berngi medem aku i bas ingan medemku,
ernipi aku kerna impalku si kukelengi.
Kudarami ia tapi la aku jumpa.
2Keke aku, jenari kudarami belang-belang kuta,
lanai lit dalan ras lorong si la kutapaki,
kudarami impalku tapi la aku jumpa.
3Jumpa aku ras si ngeronda kuta, janah kuperkuanken ia, ningku,
“Idahndu kang impalku?”
4E denga nge kalak ndai kutadingken, rempet aku jumpa ras impalku.
Kudakepi ia lanai kupulahi;
seh maka kubaba ia ku rumah nandengku,
ku bilik inganku tubuh.
5O diberu-diberu Jerusalem, erpadanlah,
ersumpahlah erkiteken belkih ras balua si meliar,
maka la atendu ngganggu kami,
kami si sangana si ngenan.
Ende-enden si peteluken
Diberu
6Ise ah si sangana erdalan i mbalmbal nari,
si seri tempasna ras binangun asap?
Merim kal bali ras kumenen ras mur,
kumenen si idayaken perbinaga.
7Nehenlah! Ena me reh Salomo,
ilanja tare kursi kinirajanna.
Lit enem puluh kalak pengawalna,
kerina tentera Israel si mbisa.
8Kerina si beluh kal mpergunaken pedang,
janah erpengalamen i bas perang.
Tep-tep kalak maba pedang,
sikap ngelawan serangen tupung berngi.
9Raja Salomo ilanja tare kursi kerajan
si ibahan i bas kayu si mejilena nari.
10Tiangna ilapisi alu pirak,
inganna tertande iukir alu benang emas.
Inganna kundul ibahan i bas kain si meherga nari
sinulamsa e me diberu-diberu Jerusalem si dem alu keleng ate.
11O beru Sion, mari nehenlah Raja Salomo.
Sangana ipakeken mahkotana, si itamaken nandena i babo takalna.
Tupung ia erjabu, e me tupung wari ia ermeriah-meriah,
itamaken nandena mahkota e.
Currently Selected:
ENDE-ENDEN SALOMO 3: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
