ROMA 10
10
1O senina-seninangku, i bas pusuh peratenku ngarap kal aku gelah ikelini Dibata min bangsangku kalak Israel. Ertoto pe aku man Dibata guna si e. 2Pang aku ngatakenca maka kalak Israel e tuhu-tuhu tutus er-Dibata, tapi ketutusenna e la erpalasken pemeteh si payo. 3La ia nggit mperdiateken kuga Dibata ngerembakken manusia kempak diriNa. Iusahakenna erbahan kebenaren jine, seh maka la ia nggit takluk man kebenaren Dibata. 4Sabap Kristus e me penggenepen Undang-undang seh maka kerina kalak si tek man baNa rembak ras Dibata.
Keselamaten e isikapken Dibata man kerina manusia
5Kerna manusia rembak ras Dibata arah ndalanken Undang-undang enggo isuratken Musa, “Kalak si ndalanken kai si ipedahken Undang-undang idatna me kegeluhen arah perbahanenna e.” #Im 18:5 6Tapi kerna manusia rembak ras Dibata arah kiniteken lit tersurat i bas Pustaka Si Badia, “Ola nungkun i bas ukurndu, ‘Ise nge pagi nangkih ku Surga?’ (e me guna maba Kristus ku teruh, ku tengah-tengahta). #Ul 30:12-14 7Bage pe ola nungkun i bas ukurndu, ‘Ise nge pagi nusur ku teruh, ku ingan kalak si enggo mate?’ (e me mpekeke Kristus i bas si mate nari).” 8Dage kai kin si ikataken i bas Pustaka Si Badia? Enda me, “Kata Dibata e rembak ras kam, enggo lit i bas babahndu dingen enggo pe lit i bas pusuhndu” – e me kata si iberitaken kami, si nuntut gelah kam erkiniteken. 9Adi ngaku kam alu babahndu, “Jesus Tuhan kap,” janah tek kam i bas pusuhndu maka Jesus enggo ipekeke Dibata i bas si mate nari, maka terkelin me kam. 10Sabap alu pusuh me kalak erkiniteken seh maka ia irembakken ras Dibata, janah alu babah kalak ngaku seh maka ia ikelini. 11I bas Pustaka Si Badia lit tersurat, “Ise tek man baNa la kecewa.” #Jes 28:16 12Si enda maksudna kerina manusia, sabap labo lit lainna kalak Jahudi ras kalak Junani. Sada ngenca Tuhan, e me Tuhan kerina manusia. IA melumbar mere man kalak si erlebuh man baNa. 13Bagi lit tersurat i bas Pustaka Si Badia, “Kerina kalak si erlebuh mindo penampat man Tuhan, ikeliniNa nge.” #Joel 2:32
14Tapi kuga banci kalak erlebuh mindo penampat man Tuhan adi langa ia tek man baNa? Kuga banci ia tek man baNa adi langa pernah ibegina pe kerna IA? Kuga banci ibegina adi la lit si meritakenca? 15Kuga banci kalak meritaken berita e adi la ia isuruh? I bas Pustaka Si Badia lit tersurat, “Seh kal tuhu ulina kerehen kalak si maba Berita Si Meriah e.” #Jes 52:7 16Tapi labo kerina kalak mehuli pengalo-ngalona nandangi Berita Si Meriah e. Nina Nabi Jesaya, “O Tuhan, ise nge tek nandangi berita si ipeseh kami?” #Jes 53:1 17Dage kiniteken rehna arah megi Berita e, janah isi Berita e, e me Kata kerna Kristus.
18Tapi nungkun aku: Tuhu kin nge la ibegina berita e? Tentu saja enggo ibegina. Bagi lit tersurat i bas Pustaka Si Badia,
“Sorana enggo terbegi ku belang-belang doni enda,
janah katana enggo seh ku tampuk doni.” #Msm 19:5
19Nungkun ka aku: Uga kerna Israel? Ntah la kin iangkana? Guna njabap penungkunen enda, perlebe kubuat si enggo isuratken Musa,
“Nina Dibata, ‘Mecimberu kam pagi Kubahan
nandangi bangsa si labo bangsa pilihenKu,
merawa pagi atendu Kubahan nandangi bangsa si motu.’ ” #Ul 32:21
20Janah lebih asa si e Nabi Jesaya ngerana alu la biar-biaren, nina,
“Nina Dibata, ‘Kalak si la ndarami Aku, jumpa ras Aku;
Kucidahken diringKu man kalak si la nungkuni kerna Aku.’ ” #Jes 65:1
21Tapi man kalak Israel, nina Dibata,
“Gedang-gedang wari Kududurken tanKu
man bangsa si la patuh dingen si nimbak.” #Jes 65:2
Currently Selected:
ROMA 10: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
