ROMA 11

Perkuah ate Dibata nandangi kalak Israel

1Dage nungkun aku: Enggo kin itulak Dibata bangsa pilihenNa e? Tentu lang! Aku pe kalak Israel nge, kesusuren Abraham, janah i bas suku Benyamin nari. #Pil 3:5 2Labo itulak Dibata bangsaNa si enggo itandaiNa nai nari. Tentu enggo ietehndu si tersurat i bas Pustaka Si Badia kerna Elia, asum ia ertoto ngaduken bangsa Israel man Dibata, nina, 3“O Tuhan, enggo ibunuhna nabi-nabiNdu, janah enggo irontaskenna batar-batarNdu. Aku nari ngenca tading, janah kesahku pe ibuatna atena.” #1Raj 19:10,14 4Kuga nina Dibata ngaloi Elia? Nina Dibata, “Enggo Kuserapken man bangKu pitu ribu kalak si langa pernah ersembah man dewa Baal.” #1Raj 19:18 5Bage me genduari enda: lit piga-piga kalak si tading si enggo ipilih Dibata erkiteken lias ateNa. 6Dibata milih labo erpalasken kai si enggo ibahan kalak e, tapi erkiteken ateNa nge. Sabap adi erpalasken perbahanen manusia kin Dibata e milih, maka lias ateNa e lanai bo lias ate si tuhu-tuhu.

7Kuga dage? Kai si idarami Israel la idatna. Tapi piga-piga kalak si enggo ipilih Dibata e ngenca si ndatsa. Si debanna e kerina ipemersik ukurna. 8Bagi lit tersurat i bas Pustaka Si Badia,

“Ibahan Dibata maka bene kal ukurna,

janah seh paksa enda matana lanai erpengidah

janah cupingna lanai erpemegi.” #Ul 29:4; Jes 29:10

9Bage me pe si ikataken Daud,

“Mbera-mbera kerja si ibahanna jadi siding,

jadi ragum, batu antuken ras ukumen man bana. #Msm 69:23-24

10Mbera-mbera seleng matana gelah ola ia erpengidah;

janah mbengkunglah ia rasa lalap ibahan kesusahenna.”

11Nungkun ka aku: Asum kalak Jahudi tertuktuk nai, guling kin ia seh ampar? Tentu lang! Tapi erkiteken kalak Jahudi enggo erdosa, ibereken Dibata kesempaten e man bangsa si deban gelah mengga ate bangsa Jahudi nandangi bangsa si deban e. 12Bangsa Jahudi la erkemalangen man Dibata janah la setia man baNa. Si enda maba pasu-pasu man kerina bangsa-bangsa si deban i doni enda. Apai denga ka adi hubungen bangsa Jahudi ras Dibata jadi mehuli mulihken, tentu beliden ka pasu-pasu si ibereken Dibata.

Keselamaten bangsa-bangsa si labo Jahudi

13Kukataken man bandu o kam kalak si labo Jahudi: Kidekah aku rasul guna kalak si labo Jahudi, megah kuakap i bas dahinku e. 14Banci jadi ngasup aku erbahan bangsangku ermengga ate, gelah erkiteken si e ikelini Dibata ia deba-deba. 15Sabap adi enggo itulak Dibata ia, doni enda jadi teman ras Dibata. Tapi kuga nge adi ialoken Dibata bangsa Jahudi e mulihken? Tentu si e bali ras si mate nggeluh mulihi. 16Adi cimpa si pemena khusus ibereken man Dibata, maka kerina cimpa e pe jadi sikerajangenNa. Janah adi urat kayu ikhususken man Dibata maka dahan-dahan kayu e pe jadi sikerajangenNa. 17Piga-piga dahan batang seton enggo itektek, jenari icangkokken ku batangna e sada dahan seton kerangen. Kam kalak si labo Jahudi iumpamaken bali ras batang seton si turah i kerangen e, janah genduari kam enggo ndat bagin si mehuli bagi si enggo inanami kalak Jahudi. 18E maka ola kam megombang man kalak si bali ras dahan si enggo itektek e. La kap lit dalanna maka kam megombang. Sabap kam dahan nge ngenca, labo kam natang urat-urat tapi urat-urat nge natang kam.

19Tapi nggit me maka nindu, “Dahan-dahan e itektek gelah aku banci icangkokken ku batang e.” 20Tuhu bage. Bangsa Jahudi e enggo itektek erkiteken la ia tek, tapi kam tetap leket i bas batang e erkiteken tek kam. Amin bage pe ola meganjang ukurndu kerna si e, tapi erkemalangenlah kam man Dibata. 21Sedangken bangsa Jahudi pe la Dibata alang-alangen ngambekkenca, apai denga ka kam? 22Dage teridah man banta uga belinna lias ate Dibata bage pe kuga IA la alang-alangen ngukum kalak. La IA mbiar ngukum kalak si enggo erdosa, tapi melias IA man bandu adi tetap kam erbahan si ngena ateNa, gelah tetap kam ngenanami kiniulinNa; tapi adi lang, kam pe iambekkenNa nge. 23Janah kalak Jahudi, adi jera ia janah tek, icangkokken Dibata me ia mulih ku batang e, sabap Dibata ngasup nge erbahan si bage pe. 24Kam kalak si labo Jahudi bali ras dahan seton kerangen si enggo itektek, jenari icangkokken ku batang seton si ipiara. Si enda erlawanen ras kebiasan. Kalak Jahudi bali ras batang seton si ipiara; tentu sukahen nge iakap Dibata encangkokken mulihi dahan asli ku batangna jine.

Perkuah ate Dibata nandangi kerina manusia

25O senina-seninangku, gelah ola iakapndu beluh bandu, perlu kuakap ietehndu rahasia enda: Ukur kalak Jahudi labo mersik seh rasa lalap, tapi ngayak kuh bilangen kalak si labo Jahudi jadi anak-anak Dibata. 26Dage kerina nge pagi kalak Israel ikelini. Bagi lit tersurat i bas Pustaka Si Badia,

“Si Engkelini e pagi rehna i Sion nari

janah imasapkenNa me kerina kejahaten kesusuren Jakup.”

“Nina Dibata, #Jes 59:20-21

27‘Kubahan me iketen padan ras ia,

tupung Kualemi dosa-dosana.’ ” #Jer 31:33-34

28Erkiteken itulak kalak Jahudi Berita Si Meriah, e maka jadi imbang Dibata ia, tapi si enda jadi keuntungen man bandu o kalak si labo Jahudi. Tapi erkiteken pilihen Dibata, kalak Jahudi e teman Dibata nge, erkiteken nini kalak Jahudi e. 29Dibata labo erkadiola adi IA enggo milih dingen masu-masu. 30Bali nge ras kam nai, o kalak si labo Jahudi, nai la kam erkemalangen man Dibata; tapi genduari erkiteken kalak Jahudi la erkemalangen man Dibata enggo ialokenndu perkuah ate Dibata. 31Bage me pe kalak Jahudi genduari la erkemalangen man Dibata gelah arah perkuah ate si enggo ialokenndu e ialokenna ka perkuah ate. 32Sabap kerina manusia la erkemalangen man Dibata. E maka lanai lit dalanna pulah ibahan Dibata. Si enda ibahanNa alu perayaken gelah banci icidahkenNa perkuah ateNa man kerinana.

Pujin man Dibata

33Seh kal tuhu bayakna Dibata! Seh kal tuhu bagesna kepentaren ras pemetehNa! Ise kin ngasup nerangken keputusen-keputusenNa? Ise ngasup ngikuti dalan si idalaniNa? #Jes 55:8 34Bagi lit tersurat i bas Pustaka Si Badia,

“Ise kin meteh perukuren Tuhan?

Ise kin ngasup ngajarken IA? #Jes 40:13

35Ise kin pernah mere man baNa

gelah ndatken balasen i bas IA nari?” #Jop 41:11

36Sabap kerina si nasa lit Dibata njadikenca, janah kerina e lit erkiteken IA dingen man gunaNa. Terpujilah Dibata seh rasa lalap. Amin. #1Kor 8:6

Currently Selected:

ROMA 11: BTX

Highlight

Copy