KETANGKASEN 8
8
Meterai si pepituken
1Asum ipecahken Anak Biri-biri e meterai si pepituken, setengah jam dekahna la lit sora kai pe i Surga. 2Jenari kuidah pituna malekat si tedis i lebe-lebe Dibata ngaloken pitu terompet.
3Reh sekalak malekat si deban, si lit i bas ia mangkuk emas ingan kumenen, jenari lawes ia tedis i lebe-lebe batar-batar persembahen. Ialokenna melala kumenen nambahi pertoton-pertoton anak-anak Dibata dingen mpersembahkenca i babo batar-batar persembahen emas si lit i lebe-lebe kursi kinirajan e. #Amos 9:1; Kel 30:1,3 4Radu ras pertoton anak-anak Dibata, asap kumenen si gara e nangkih i bas tan malekat e nari kuadep-adepen Dibata. 5Jenari ibuat malekat e ingan kumenen ndai, itamana ku bas rara api si ibuat i bas batar-batar persembahen, jenari iamburkenna ku doni. Kenca bage jadi me lenggur, sora si ergeruhguh, kilap, ras linur. #Im 16:12; Esek 10:2; Kel 19:16; Ket 11:19; 16:18
Kerna terompet
6Jenari ersikap malekat si pitu e ngembus terompet si lit i bas ia.
7Iembus malekat si pemena terompetna jenari reh udan baho bage pe api singgur ras dareh mambur ku doni. E maka meseng sepertelu doni enda, sepertelu batang kayu ras kerina dukut-dukut si meratah. #Kel 9:23-25; Esek 38:22
8Jenari iembus malekat si peduaken terompetna. Paksa e lit meseng tempasna bagi deleng meganjang, iambengken ku lawit. E maka sepertelu lawit salih jadi dareh; 9sepertelu rubia-rubia si nggeluh i lawit mate, janah sepertelu kapal kernep.
10Jenari iembus malekat si peteluken terompetna. Paksa e ndabuh i langit nari sada bintang galang gara bagi obor. Idabuhina sepertelu lau mbelin ras sumbul-sumbul lau. #Jes 14:12 11(Gelar bintang e Pagit.) E maka sepertelu lau e salih jadi pagit, janah nterem kalak mate erkiteken nginem lau si enggo salih jadi pagit e. #Jer 9:15
12Jenari iembus malekat si peempatken terompetna. Paksa e gelap sepertelu matawari, sepertelu bulan ras sepertelu bintang janah bene terangna sepertelu. Bage pe sepertelu suari ras sepertelu berngi jadi gelap kerina. #Jes 13:10; Esek 32:7; Joel 2:10,31; 3:15
13Jenari kunehen, janah kubegi serko rajawali si paksa kabang meganjang i tengah awang-awang nina, “Cilaka! Cilaka! Cilaka kal kerina kalak si nggeluh i doni adi ibegina denggo sora terompet si iembus malekat si telu kalak nari!”
Currently Selected:
KETANGKASEN 8: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
