Popular Bible Verses from KETANGKASEN 8

Share

Asum ipecahken Anak Biri-biri e meterai si pepituken, setengah jam dekahna la lit sora kai pe i Surga.

Iembus malekat si pemena terompetna jenari reh udan baho bage pe api singgur ras dareh mambur ku doni. E maka meseng sepertelu doni enda, sepertelu batang kayu ras kerina dukut-dukut si meratah.

Jenari kunehen, janah kubegi serko rajawali si paksa kabang meganjang i tengah awang-awang nina, “Cilaka! Cilaka! Cilaka kal kerina kalak si nggeluh i doni adi ibegina denggo sora terompet si iembus malekat si telu kalak nari!”

Jenari iembus malekat si peduaken terompetna. Paksa e lit meseng tempasna bagi deleng meganjang, iambengken ku lawit. E maka sepertelu lawit salih jadi dareh

Jenari iembus malekat si peteluken terompetna. Paksa e ndabuh i langit nari sada bintang galang gara bagi obor. Idabuhina sepertelu lau mbelin ras sumbul-sumbul lau. (Gelar bintang e Pagit.) E maka sepertelu lau e salih jadi pagit, janah nterem kalak mate erkiteken nginem lau si enggo salih jadi pagit e.

Jenari iembus malekat si peempatken terompetna. Paksa e gelap sepertelu matawari, sepertelu bulan ras sepertelu bintang janah bene terangna sepertelu. Bage pe sepertelu suari ras sepertelu berngi jadi gelap kerina.