KETANGKASEN 9

1Jenari iembus malekat si pelimaken terompetna. Paksa e kuidah sada bintang si enggo ndabuh i langit nari ku doni. Man bana ibereken kunci embang si la ersibar bagesna. 2Italangi bintang e embang si la ersibar bagesna ndai jenari erdipul cimber i bas nari bagi cimber dapur si mbelin. Sinalsal matawari ras awang-awang gelap ibahan cimber si reh i bas embang e nari. #Kej 19:28 3Jenari rehen labang ku babo taneh enda i bas cimber e nari, janah man labang ibereken kuasa bali ras kuasa kacip gelang i doni enda. #Kel 10:12-15 4Man labang e ipebetehken maka la banci icedakenna dukut-dukut, ntah batang kayu ntah sinuan-sinuan. Manusia si la lit meterai i bas perdempakenna ngenca banci icedakenna. #Esek 9:4 5Labang e la banci munuh manusia, tapi seh kal akap kalak suina ibanna, dekahna lima bulan. Suina isiksa labang e bali ras, icit kacip gelang. 6I bas si lima bulan e idarami manusia e kematen, tapi la idatca; merincuh ia mate, tapi kematen nilah i bas ia nari. #Jop 3:21; Jer 8:3

7Labang e bagi kuda si enggo ersikap erperang. I babo takalna lit mahkota bali ras emas. Ayona bagi ayo manusia. #Joel 2:4 8Bukna bagi buk diberu, janah ipenna bagi ipen singa. #Joel 1:6 9Ampang-ampang tentenna tempa-tempa baju besi. Sora kabengna bagi sora gereta kuda kiam lawes erperang. #Joel 2:5 10Kerina rikur bage pe serenna bali ras kacip-gelang. I bas ikur e lit kuasa pesega-sega manusia lima bulan dekahna. 11Labang e lit rajana si ngaturken ia, e me malekat si ertanggung jawab kerna embang si la ersibar bagesna e. Gelar rajana e i bas cakap Heber e me Abaddon; i bas cakap Junani Apolion (ertina, si ngkernepken).

12Cilaka si pemena enggo lepas. Kenca si e reh ka cilaka dua kali nari.

13Jenari iembus malekat si peenemken terompetna. Paksa si e kubegi sora i bas empatna tanduk batar-batar persembahen nari, e me batar-batar persembahen emas si lit i lebe-lebe Dibata. #Kel 30:1-3 14Nina sora e man malekat si ngembus terompet ndai, “Pulahi malekat si empat si irante i tepi Lau Eprat si mbelin e.” 15E maka ipulahi me malekat si empat e. Malekat e enggo isikapken i bas jam e, wari e, bulan e, dingen tahun e guna munuh sepertelu i bas kerina manusia. 16Man bangku ipebetehken teremna barisen tentera si erkuda e lit dua ratus juta kalak. 17Janah i bas pengenehenen ka kuidah kuda e ras si ngersaksa: Baju ampang-ampangna, rupana megara bagi api, megara metua bagi permata nilam janah megersing bagi kertah. Takal kuda e bagi takal singa, janah i bas babahna nari ndaraten api, cimber ras kertah. 18Sepertelu manusia mate erkiteken mara si telu e; api, cimber ras kertah si ndarat i bas babah kuda e nari. 19Sabap kuasa kuda e lit i bas babah ras i bas ikurna. Ikur kuda e bagi nipe, lit takal ikurna e janah alu takal ikurna e me ia pesega-sega manusia.

20Manusia si deban, e me manusia si la mate kena mara enda ndai la ka bo ia jera i bas perbahanenna nari. La ingadikenna ersembah man setan-setan ras man berhala-berhala emas, pirak, tembaga, batu ras kayu, si la erpengidah, la erpemegi dingen la ngasup erdalan. #Msm 115:4-7; 135:15-17; Dan 5:23 21Bage pe la ia jera munuh, ndalanken kinigurun, erlua-lua ntah pe nangko.

Currently Selected:

KETANGKASEN 9: BTX

Highlight

Compare

Copy