KETANGKASEN 20

Kerna si seribu tahun

1Kenca bage kuidah sekalak malekat nusur i Surga nari. I bas tanna lit kunci embang si la ersibar bagesna e ras rante galang. 2Itangkapna naga, nipe si nuria e, e me Iblis ntah pe Setan, jenari igarikenna seh seribu tahun dekahna. #Kej 3:1 3Kenca bage iambekkenna naga e ku bas embang e jenari ikuncina kelbung e janah itamana meteraina gelah olanai itipu Iblis e bangsa-bangsa seh lepas si seribu tahun e. Kenca lepas si seribu tahun e arus ia ipulahi kentisik.

4Jenari kuidah melala kursi kinirajan ras si ngkundulisa, si enggo ibereken man bana kuasa guna ngadili. Bage pe kuidah tendi-tendi kalak si enggo mate itampul erkiteken meritaken Kata Dibata ras ersaksi kerna Jesus. Kalak si enggo mate enda ndai, la pernah nai isembahna rubia-rubia e ntah pe gana-ganana. Bage pe labo lit cap rubia-rubia e i bas perdempakenna ntah i bas tanna. Kalak enda ndai nggeluh mulihi janah erkuasa ras Kristus seribu tahun dekahna. #Dan 7:9,22 5(Kalak mate si deban la nggeluh mulihi seh lepas paksa si seribu tahun e.) Enda me kekeken si pemena. 6Ketuahen kalak si ikut i bas kekeken si pemena e sabap ia enggo iserapken jadi anak-anak Dibata. Kematen si peduaken lanai erkuasa nandangi ia. Ia me pagi jadi imam-imam Dibata ras Kristus. Ras Kristus kalak enda erkuasa i bas si seribu tahun e.

Talu Iblis

7Lepas si seribu tahun e, ipulahi me Iblis i bas penjara nari, 8jenari ndarat ia nipu bangsa-bangsa i belang-belang doni, e me Gog ras Magog. Ipepulung Iblis e me bangsa-bangsa e ku peperangen, bagi kersik i tepi lawit teremna. #Esek 7:2; 38:2,9,15 9Merap me ia kerina ku doni enda; ikepungna benteng anak-anak Dibata ras kuta si ikelengiNa. Tapi nusur api i Surga nari ngkernepken bangsa-bangsa e. 10Jenari Iblis si enggo nipu bangsa-bangsa e, iambekken ku lawit api si singgur ras kertah, ingan ngambekken rubia-rubia ras nabi perguak e. Isiksa me kalak enda rasa lalap suari ras berngi.

Ukumen si perpudina

11Jenari kuidah sada kursi kinirajan ras si ngkundulisa. Kursi kinirajan e mbelin dingen mbentar rupana. Langit ras doni kiam i bas ia nari seh lanai teridah. #Dan 7:9-10 12Jenari kuidah kalak si enggo mate, subuk si mbelin bage pe si kitik, tedis i lebe-lebe kursi kinirajan e. Kitap-kitap italangi. Jenari italangi ka sada Kitap nari, e me Kitap Kegeluhen. Kenca bage kalak si enggo mate iadili rikutken kai si enggo ibahanna, bagi lit isuratken i bas Kitap-kitap e. 13E maka lawit ngendesken kalak mate si lit i bas ia. Kematen ras doni kematen pe ngendesken kalak mate si lit i bas ia, janah iadili me kerina rikutken perbahanenna sekalak-sekalak. 14Kenca bage kematen ras doni kematen iambekken ku bas lawit api. (Lawit api enda me kematen si peduaken.) 15Ise la lit gelarna tersurat i bas Kitap Kegeluhen e iambekken me ku bas lawit api e.

Currently Selected:

KETANGKASEN 20: BTX

Highlight

Compare

Copy