KETANGKASEN 19

1Kenca bage kubegi tempa-tempa sora megang i bas perpulungen jelma si nterem si lit i Surga e nari nina, “Pujilah Dibata! IA kap si mulahi kita, janah IA kap si erkuasa. 2Ukumen si iberekenNa bujur dingen adil kap. Enggo iukumNa diberu perlua-lua si mbelin, si mabai doni enda papak alu lagu langkahna si perlua-lua e. Enggo iukum Dibata diberu e perbahan ibunuh diberu e suruh-suruhen Dibata.” #Ul 32:43; 2Raj 9:7 3Tole nina sora e, “Pujilah Dibata! Cimber api si rehna i bas kuta e nari la erkeri-kerin nangkih.” #Jes 34:10 4Pertua-pertua si dua puluh empat ras rubia-rubia si empat e, erjimpuh nembah man Dibata si kundul i bas kursi kinirajan e nina, “Amin! Haleluya!”

Kerja erdemu bayu Anak Biri-biri

5Kenca bage terbegi sora i bas kursi kinirajan e nari nina, “O kerina juak-juakNa, subuk si mbelin bage pe si kitik, si erkemalangen man baNa, pujilah Dibata!” #Msm 115:13 6Jenari kubegi bagi sora sada perpulungen si mbelin, bagi sora air sampuren si mbelin nina, “Pujilah Dibata! Sabap Tuhan Dibatanta si Mada Kuasa e, enggo kap jadi Raja! #Esek 1:24; Msm 93:1; 97:1; 99:1 7Ersuraklah kita janah meriahlah siakap. Sipujilah IA! Sabap enggo seh paksana kerja erdemu bayu Anak Biri-biri e, janah Penganten si Diberu enggo dung ersikap guna kerja e. 8Penganten si Diberu e enggo make uis mbentar si erkilat-kilat.” (Uis mbentar e, e me perbahanen si mehuli si ilakoken anak-anak Dibata.)

9Kenca bage nina man bangku, “Suratkenlah enda, ‘Ketuahen kalak si enggo iundang ku kerja erdemu bayu Anak Biri-biri e.’ ” Tole nina man bangku, “Kata-kata enda tuhu-tuhu i bas Dibata nari.” #Mat 22:2-3

10Erjimpuh aku i lebe-lebe naheNa, ateku nembah man bana, tapi nina man bangku, “Ola sembah aku, sabap aku pe suruh-suruhen nge, bali ras kam, bage pe bali ras senina-seninandu, e me kalak si tetap ncikep kebenaren si ipetangkas Jesus. Sembahlah Dibata!”

Sabap si mpegegehi ukur nabi-nabi e me kebenaren si ipetangkas Jesus.

Si ngersak kuda mbentar

11Jenari kuidah langit talang, janah i je lit sada kuda mbentar. Si ngersak kuda e gelarNa si Setia dingen Bujur. IA ngadili alu bujur ras erperang pe alu bujur. #Esek 1:1; Msm 96:13; Jes 11:4 12MataNa bagi gara api, janah i bas takalNa melala mahkota. I bas IA lit tersurat sada gelar, tapi ise pe la ngangkasa seakatan IA. #Dan 10:6 13Jubah si ipakeNa icelup alu dareh. Gelar si igelarken man baNa e me Kata Dibata. 14Tentera-tentera Surga ngikutken IA alu ngersak kuda mbentar, dingen make baju mbentar si bersih. 15I bas babahNa nari ndarat sada pedang si ntelap janah alu e pagi italukenNa bangsa-bangsa. IperentahNa me bangsa-bangsa alu ciken besi. IerikNa me anggur i bas ingan ngerik anggur pernembeh ate Dibata si Mada Kuasa. #Msm 2:9; Jes 63:3; Joel 3:13; Ket 14:20 16I bas jubahNa bage pe i bas naheNa isuratken gelar, “Raja i babo kerina raja, dingen Tuan i babo kerina tuan.”

17Jenari kuidah sekalak malekat tedis i babo matawari. Alu sora si megang ngerana ia man kerina perik-perik si sangana kabang i tengah awang-awang nina, “Marilah ras-ras pulung guna kerja man-man si mbelin si ibahan Dibata! #Esek 39:17-20 18Marilah man daging raja-raja, puanglima-puanglima ras prajurit-prajurit bage pe daging kuda ras si ngersaksa dingen daging kerina manusia, subuk juak-juak, bage pe la juak-juak, si mbelin bage pe si kitik!”

19Jenari kuidah rubia-rubia e, ras raja-raja doni bage pe tentera-tenterana pulung guna ngelawan si ngersak-kuda ndai ras tentera-tenterana. 20Tapi rubia-rubia e ipenjaraken ras nabi perguak si enggo erbahan tanda-tanda sengget i lebe-lebe rubia-rubia e. (Alu tanda-tanda sengget e me itipu rubia-rubia e kerina kalak si lit i bas ia cap rubia-rubia dingen kerina kalak si nembah gana-gana rubia-rubia e.) Rubia-rubia ras nabina si perguak e, duana iambekken geluh-geluhen ku bas lawit api si gara ras kertah. #Ket 13:1-18 21Tentera-tenterana ibunuh alu pedang si ndarat i bas babah si ngersak kuda e nari; jenari kerina perik-perik e mangani dagingna asa besurna.

Currently Selected:

KETANGKASEN 19: BTX

Highlight

Compare

Copy