MASMUR 88
88
Erlebuh mindo penampat
1Masmur anak-anak Korah; ende-enden pengajaren Heman kalak Esrahi.
2O TUHAN Dibata si engkelini aku gedang-gedang wari aku erlebuh man baNdu,
janah tupung berngi, reh aku ngadap man baNdu.
3Begiken min pertotonku,
dengkehken min pingko-pingkongku.
4Enggo besur aku ngenanami kiniseran,
kematenku enggo ndeher.
5Enggo aku bali ras kalak si nandangi mate,
kerina gegehku enggo bene.
6Aku itadingken i tengah-tengah kalak mate,
bagi kalak si terbunuh terdang aku i bas kuburen,
desken kalak si lanai pernah iingetNdu.
Aku enggo sirang ras penampatNdu.
7IambekkenNdu aku ku bas lubang si mbages,
ku bas kelbung si mbages dingen gelap.
8Alu rawaNdu idehkenNdu aku,
e maka getem kal aku, itamburi galumbangNdu.
9Teman-temanku ipedauhNdu i bas aku nari,
ibahanNdu maka ciga atena man bangku,
terkepung aku lanai banci pulah.
10Gelap matangku perban kiniseran e,
gedang-gedang wari erlebuh aku man baNdu, o TUHAN,
janahku ertoto, kuangkat tanku.
11IlakokenNdu denga kin tanda kuasaNdu man si mate?
Banci denga kin ia keke dingen muji Kam?
12Icakapken denga kin keleng ateNdu i bas kuburen-kuburen?
Ipuji denga kin Kam i bas kalak mate?
13Lit denga kin si ngidah tanda kuasaNdu i bas si gelap?
tah pe kiniulinNdu i bas negeri kalak si enggo ilupaken?
14O TUHAN, man baNdu saja aku erlebuh mindo penampat
tep-tep erpagi-pagi aku ertoto man baNdu.
15O TUHAN, ngkai maka aku itadingkenNdu.
Engkai maka aku itundalkenNdu.
16Kitik-kitikku nari mesui kal ateku, narus-narus mate,
la aku ngasup ngaloken ukumen si iberekenNdu.
17Getem aku perban rawaNdu si mejin,
pengukumNdu si mberat ngeripukken aku.
18Seri ia ras banjir, ikepungna aku,
tep-tep wari aku ikelewetina arah kerina dampar.
19Teman-teman kekelengenku ipedauhNdu i bas aku nari,
e maka kegelapen nari nge jadi temanku.
Currently Selected:
MASMUR 88: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
