MASMUR 89
89
Enden-enden tupung bangsa i bas kiniseran
1Ende-enden si ikarang Etan kalak Esrahi. #1Raj 4:31
2O TUHAN rasa lalap ateku ngendeken keleng ateNdu si tetap.
KesetianNdu kuberitaken, man kerina kesusuren.
3Sabap keleng ateNdu tetap rasa lalap,
kesetianNdu nteguh bagi langit.
4Nindu, “Enggo Kubahan iketen padan ras kalak si Kupilih,
enggo Aku ersumpah man Daud suruh-suruhenKu.
5Kesusurenndu tetap rasa lalap jadi raja,
kursi kinirajanndu Kukawali rasa lalap.” #2Sam 7:12-16; 1Kro 17:11-14; Msm 132:11; Perb 2:30
6O TUHAN, perbahanenNdu si mejin ipuji i Surga,
pertetapNdu iendeken perpulungen si badia.
7I awang-awang pe la lit si bali ras Kam o TUHAN,
la lit mahluk Surga si seri ras TUHAN.
8Kam ihamati perpulungen si badia,
dingen kerina ia malang man baNdu.
9O TUHAN Dibata si Mada Kuasa, la lit si seri ganjangna ras Kam,
i bas kai pe o TUHAN Kam megegeh dingen tetap.
10IkuasaiNdu lawit si rugup-ugup,
ipetenengNdu galumbang si merawa.
11Rahap, naga lawit e ibunuh dingen iripukkenNdu,
alu tanNdu si megegeh italukenNdu musuh-musuhNdu.
12Lawit ras doni Kam kap empuna,
doni ras isina kerina kap tinepaNdu.
13Kam kap njadiken Utara ras Selatan,
Deleng Tabor ras Hermon ersurak kerna Kam.
14Andiko belinna kuasaNdu!
Andiko belinna gegehNdu.
15Keadilen dingen kebujuren kap palas kinirajanNdu,
keleng ate dingen kesetian teridah i bas kerina perbahanenNdu.
16O TUHAN, sangap kal bangsa si nembah man baNdu alu rende,
kiniulinNdu nalsali geluhna.
17Erkiteken Kam, dem i bas ia keriahen,
kiniulinNdu ipujina gedang-gedang wari.
18Kam merekenca man kami kemenangen si mbelin,
erkiteken kiniulinNdu nge maka kami menang.
19Sabap Kam o TUHAN, enggo milih sekawal kami,
Kam, o Dibata si badia Israel, enggo nangkuhken raja kami.
Padan Dibata man Daud
20Nuria nari i bas sada pengenehenen, ngerana Kam man suruh-suruhenNdu si patuh niNdu,
“Enggo Kusampati kalak si mbisa,
enggo Kubereken mahkota man kalak si Kupilih i bas bangsa e nari.
21Enggo Kujumpai Daud suruh-suruhenku,
Kutangkuhken ia alu minak si badia. #1Sam 13:14; 16:12; Perb 13:22
22Kuasangku si engkawali ia lalap,
gegehKu si pegegehi ia.
23La ngasup musuh ngimbangi ia,
kalak jahat la ngasup naluken ia.
24Aku si ngkernepken kerina imbang-imbangna,
Kubunuh ise saja si ernembeh ate man bana.
25Aku setia dingen tetap ngkelengi ia,
jenari erkiteken gelarku Kubereken kemenangen man bana.
26Aku si pebelangken kerajanna,
daerahna menaken i Lawit Tengah nari seh ku Lau Eprat.
27Nina kempak aku, ‘Kam kap Bapangku dingen Dibatangku,
Kam kap si kawal dingen si engkelini aku.’
28Ia Kujadiken anakku sintua,
i bas kerina raja-raja ia si muliana. #Ket 1:5
29Keleng ateKu man bana Kucidahken rasa lalap,
dingen perpadanKu man bana tetap rasa lalap.
30Kerajanna tetap kidekah langit lit denga
kesusurenna lalap jadi raja.
31Tapi adi kesusurenna ngelanggar undang-undangKu,
jenari la iikutkenna perentahKu,
32janah adi mekarus ia nandangi pedahKu,
dingen ipersilahangna peraturenKu,
33kuukum me ia alu ciken ras mara erkiteken kesalahen si ibahanna e,
jenari Kubereken man bana kiniseran erkiteken dosana.
34Tapi Daud tetap Kukelengi,
dingen perpadanenKu man bana tetap rasa lalap.
35La Kupersilahang perpadanenKu man bana,
janah sada pe i bas perpadanenKu e la Kuobah.
36Sekali seh rasa lalap enggo Aku ersumpah i bas gelarKu si badia.
Kutera pe la Aku nggit erguak man Daud.
37Kidekah matawari ersinalsal denga
kerajanna tetap rasa lalap, dingen kesusurenna jine si ngerajaisa.
38Kujadiken kerajanna tetap desken bulan
e me saksi si setia i datas awang-awang.”
Perngandungen erkiteken kinitalun raja
39Tapi o TUHAN, genduari keke rawaNdu man raja,
kalak si ipilihNdu ibuang dingen itadingkenNdu.
40IcedakenNdu perpadanenNdu man suruh-suruhenNdu,
mahkotana iambekkenNdu ku bas kubang.
41Tembok-tembok kutana iruntuhkenNdu,
benteng-bentengna enggo irontaskenNdu.
42Kerina kalak si mentas arah e ngerampasisa,
ia jadi uru-urun bangsa sekelewetna.
43IberekenNdu kemenangen man musuhna,
iberekenNdu keriahen man imbang-imbangna.
44IbahanNdu la erguna senjata raja,
ipelepasNdu ia talu erperang.
45ItangtangiNdu kuasana selaku raja,
ibenterkenNdu mahkotana ku taneh.
46IbahanNdu maka pedas kal ia metua,
ijurukenNdu ia.
Pertoton mindo penampat
47 TUHAN, seh ndigan Kam cebuni?
Ngayak ndigan rawaNdu gurlah bagi api?
48Ingetlah uga gendekna geluh enda,
ola min Kam lupa maka kami tinepaNdu si ermasap-masap.
49Ise kin tetap nggeluh la mate-mate?
Ise kin banci pulah i bas kuburen nari?
50O Tuhan, i ja kekelengenNdu si nai?
Si enggo ipadankenNdu man Daud i bas kesetianNdu.
51Inget min uga aku suruh-suruhenNdu igombangi kalak
dingen ngaloken penghinan i bas bangsa-bangsa si deban nari.
52O TUHAN, raja si ipilihNdu ihina imbangNdu,
igombangina raja e ku japa pe ia lawes.
53Pujilah TUHAN rasa lalap seh rasa lalap.
Amin! Amin!
Currently Selected:
MASMUR 89: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
