MASMUR 40
40
Ende-enden pengataken bujur
1Masmur Daud.
2Alu ukur sabar kutimai penampat TUHAN,
ibegikenNa aku janah iperdiatekenna perserkongku.
3IrintakNa aku i bas lubang cilaka nari,
ipedaratNa aku i bas kubang si mbages nari.
Maka tetap pertedisku,
itamakenNa aku i datas deleng batu.
4IajarkenNa bangku ende-enden si mbaru,
e me ende-enden pujin man TUHAN.
Nterem kalak ngidah dingen mbiar,
jenari tek kempak TUHAN.
5Sangap kalak si ernalem man TUHAN,
kalak si la nggit nembah man berhala-berhala,
si la ikut ras kalak si nembah man dibata-dibata si la tuhu.
6Enggo melala kal perbahanenNdu si mehuli man kami
o TUHAN Dibata kami, la lit si seri ras Kam!
Andiko lalana rencana si mehuli si enggo ibahanNdu guna kami,
la terturiken aku kerina perban lalana.
7Persembahen gelehen dingen persembahen pangan la Kam merincuh,
persembahen pengalemi dosa la ipindoNdu.
Tapi enggo iberekenNdu pinggel man bangku,
si banci megiken soraNdu. #Heb 10:5-7
8E maka ningku ngaloi, “I jenda aku;
i bas kitapNdu isuratken kerna aku.
9O Dibata ngena ateku ndalanken peratenNdu,
pengajarenNdu kubuniken i bas pusuhku.”
10O TUHAN, i bas perpulungen bangsandu kumomoken,
berita si mehuli kerna keselamaten si iberekenNdu.
IetehNdu kap e TUHAN,
maka la pernah aku ngadi ngerana kerna si e.
11I bas perpulungen bangsaNdu la pernah aku sinik,
berita keselamaten la pernah kurusiaken.
Asa lalap kumomoken,
kerna kesetianNdu, penampatNdu dingen keleng ateNdu si la ermasap-masap.
12O TUHAN, kueteh maka gelgel ateNdu keleng nandangi aku,
keleng ate dingen kesetianNdu rasa lalap ngkawali aku.
Pertoton mindo penampat
(Masmur 70:1-5)
13Kiniseran si ngkeleweti aku,
la terbeligai lalana.
Dosa-dosangku ngelis-ngelis aku,
e maka lanai aku erpengidah.
Teremna imbang-imbangku, lalan asa buk i bas takalku,
em erbahanca bene ukurku.
14O TUHAN kelini min aku, sampati min aku genduari.
15Bahanlah maka kalak si atena munuh aku,
talu dingen bene ukurna.
Janah kalak si ersurak ngenen kesusahenku,
surut dingen mela akapna.
16Tersenggetlah dingen melalah iakap
kalak si nawa-nawai aku.
17Ersuraklah dingen meriahlah
ia kap si ndarami Kam.
Kerina kalak si ngataken bujur perban enggo ikeliniNdu ia,
tetaplah ngataken, “Andiko muliana TUHAN!”
18O TUHAN, aku enda kalak si la ergegeh dingen musil,
tapi la aku ilupakenNdu.
Kam kap penampatku dingen si mulahi aku,
o Dibatangku, rehlah Kam genduari.
Currently Selected:
MASMUR 40: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
