JOSUA 9
9
Josua itipu kalak Gibeon
1Kemenangen Israel enggo tereteh man kerina raja-raja si arah Barat Lau Jordan, i uruk-uruk, i berneh, ras kerina i gedang-gedang kendit tepi Lawit Tengah, seh ku Libanon i Utara. Si enda kerina e me kap raja-raja kalak Heti, Amori, Kanaan, Peris, Hewi ras Jebusi. 2Pulung ia kerina jenari ipersadana gegehna merangi Josua ras bangsa Israel.
3Tapi enggo ibegi penduduk Gibeon, e me kap kalak Hewi, kai si enggo ibahan Josua man Jeriho ras Ai. 4E maka irencanakenna nipu Josua. Ibuatna bekalna jenari itamakenna ku das kaledena tare guni si merigat-rigat ras kulit ingan lau anggur si enggo irangkap-rangkapi. 5Ipakena paken si merigat-rigat ras sepatu buruk si enggo itempel-tempel. Roti si ibabana enggo kerah-kerah janah dawanen. 6Jenari lawes ia ku ingan bangsa Israel erkemah i Gilgal. Ikatakenna man Josua ras kalak Israel nina, “Enggo kami reh i bas negeri si ndauh nari. Ate kami gelah ibahanndu sada perpadanen ras kami.”
7Tapi nina bangsa Israel man bana, “Engkai ka maka kami erbahan perpadanen ras kam? Banci jadi inganndu tading deher-deher enda nge.” #Kel 23:32; 34:12; Ul 7:2
8Nina man Josua, “Suruh-suruhenndu kap kami.”
Isungkun Josua ia nina, “Ise kin kam? I ja nari kam?” 9Kenca bage ituriken kalak ndai me turi-turin enda man bana nina, “O bapa, kami reh i negeri si ndauh nari kal, sabap enggo ibegi kami kerna TUHAN Dibatandu. Enggo ibegi kami kerna kai si ibahanNa i Mesir. 10Janah kai si ibahanNa man raja kalak Amori duana arah Timur Lau Jordan: Raja Sihon i Hesbon nari ras Raja Og i Basan nari, si ringan i Astarot. #Bil 21:21-35 11Peminpin kami ras kerina jelma si ringan i negeri kami nuruh gelah ibuat kami bekal guna perdalanen si ndauh njumpai kam. Kami isuruh gelah jadi suruh-suruhenndu ras mindo man bandu erbahan perpadanen ras kami. 12Nehenlah roti si ibaba kami. Asum kami berkat i rumah kami nari, asum ibenaken kami perdalanen kami njumpai kam, roti si ibaba kami e melas-melas denga. Tapi nehen lah! Genduari enggo kerah ras dawanen. 13Asum ingan lau anggur enda iisi kami, mbaru denga kal kerina, tapi nehenlah! Genduari enggo merigat! Uis kami ras sepatu kami enggo jadi male i bas perdalanen si ndauh e.”
14Ialoken bangsa Israel pangan i bas ia nari, tapi la isungkunina TUHAN kerna si e. 15Ibahan Josua sada perpadanen tandana ia erteman ras kalak Gibeon janah ipelepasna ia nggeluh. Peminpin perpulungen Israel erpadan tuhu-tuhu maka perpadanen e itepatina.
16Telu wari kenca perpadanen e ibahan, enggo tereteh man kalak Israel maka kepeken kalak ndai ndeher kal nge inganna. 17E maka berkat bangsa Israel janah kenca telu wari seh ia i kuta ingan kalak ndai tading: Gibeon, Kepira, Beerot, ras Kiryat Jearim. 18Tapi la banci ibunuh kalak Israel ia, sabap peminpin enggo erbahan sumpah ras ia i bas gelar TUHAN, Dibata Israel. Kerina bangsa e jungut-jungut man peminpin e kerna si enda, 19tapi nina ngaloi, “Enggo kami ersumpah ras ia i bas gelar TUHAN Dibata Israel. E maka genduari la banci ugapa pe ia ibahan kami. 20La banci la ipelepas kami ia nggeluh erkite-kiteken perpadanen kami. Adi la bage ibahan kami, tentu iukum Dibata kita. 21Pelepaslah ia nggeluh, tapi arus ia erdahin, naka ranting ras ngelegi lau man banta.” Enda me si iusulken peminpin-peminpin e.
22Iperentahken Josua gelah penduduk Gibeon ibaba man bana, jenari isungkunina ia nina, “Engkai maka itipundu kami janah ikatakenndu man kami maka kam i bas ingan si ndauh nari, tapi i jenda nge kepe kam ringan? 23Erkite-kiteken ibahanndu si enda, kam enggo iukum Dibata. Bangsandu la banci la tetap jadi budak, naka ranting ras ngangkat lau guna rumah Dibatangku.”
24Ngaloi ia nina, “Ibahan kami si e, Bapa, erkite-kiteken enggo tereteh man kami maka tuhu-tuhu enggo ipedahken TUHAN Dibatandu man Musa, suruh-suruhenNa, guna mereken kerina taneh enda man bandu ras munuh kalak si ringan i je asum kam mengketisa. Ibahan kami si enda erkite-kiteken mbiar kami man bandu. Mbiar kami bene kesah kami. 25Genduari kami lit i bas kuasandu. Bahanlah man kami kai iakapndu payo.” 26E maka bagenda me ibahan Josua: ikawalina kalak ndai janah la iberena bangsa Israel munuhsa. 27Tapi ibahanna kalak ndai jadi budak, naka ranting ras ngangkat lau man bangsa Israel ras man batar-batar TUHAN. Seh wari si sendah dahin enda terus ilakokenna i bas ingan si enggo ipilih TUHAN lako ersembah man baNa.
Currently Selected:
JOSUA 9: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
