JOSUA 10
10
Kalak Amori italuken
1Ibegi Adonisedek, raja Jerusalem, maka kuta Ai enggo italuken ras ihancurken Josua tuhu-tuhu. Rajana pe enggo ibunuh, bagi si enggo ibahanna man kuta Jeriho ras rajana. Enggo pe ibegina maka kalak Gibeon enggo erbahan perdamen ras bangsa Israel janah enggo ras ia tading. 2Perban e seh kal biarna penduduk Jerusalem sabap Gibeon e me sada kuta si mbelinna si lit rajana. Kuta e belinen asa kuta Ai, janah pendudukna kalak si beluh erperang. 3E maka itenahken Adonisedek me berita enda man Raja Hoham i Hebron nari, Raja Piran i Jarmut nari, Raja Japia i Lakis nari, ras man Raja Debir i Eglon nari nina, 4“Rehlah kam, sampati aku merang kuta Gibeon, sabap pendudukna enggo erbahan perdamen ras Josua ras bangsa Israel.” 5Raja Amori si lima enda: raja Jerusalem, raja Hebron, raja Jarmut, raja Lakis, raja Eglon, ipersadana gegehna; ikepungna Gibeon, jenari iserangna kuta e.
6Kalak Gibeon minter nehken berita man Josua ku ingan erkemah i Gilgal nina, “Ola min tadingken kam kami, bapa! Pedas lah kam reh, sampati kami! Selamatken kami! Kerina raja-raja kalak Amori i deleng nari enggo mpersada gegehna, lako merang kami!”
7E maka Josua ras kerina tenterana, ikut pasukenna si mbisana, berkat i Gilgal nari. 8Nina TUHAN man Josua, “Ola kam mbiar man kalak e. Enggo Kubereken man bandu kemenangen. La lit sada pe i bas ia nari si ngasup ertahan ngelawan kam.” 9Gedang-gedang berngi Josua ras tenterana erdalan i Gilgal nari ku Gibeon, jenari ibahanna sada serangen si rempet mahanca sengget kalak Amori. 10Gentar kalak Amori ibahan TUHAN ngidah tentera Israel. Nterem ia ibunuhi kalak Israel i Gibeon, jenari iayakina ia arah dalan ngincuah-ngincuah si mentasi Bet-Horon, janah terus iserangna seh ku Aseka ras Makeda i Selatan. 11Sanga kalak Amori kiam ku berneh arah dalan e i bas tentera Israel nari, idabuhken TUHAN ku ia batu si galang bagi udan baho, la erpeltep gedang-gedang dalan seh ku Aseka. Buen ibunuh batu si bagi udan e asa si ibunuh kalak Israel jine.
12I bas warina TUHAN mereken kemenangen man bangsa Israel ngelawan kalak Amori, ngerana Josua man TUHAN, i lebe-lebe kalak Israel kerina nina Josua,
“O matawari, ngadilah i babo Gibeon;
o bulan, ngadilah i babo Baluren Ayalon.”
13Matawari ngadi ras bulan pe la miser seh bangsa e enggo naluken musuh-musuhna. Si enda isuratken i bas Kitap Kalak Bujur. Matawari ngadi i tengah-tengah langit janah la sundut gedang-gedang wari. #2Sam 1:18 14La enggo pernah bage ope denga si e, janah kenca si e pe lanai enggo pernah jadi bagi si jadi i bas wari e, asum TUHAN ngikutken kata manusia. TUHAN erperang i pihak Israel!
15Kenca si enda, Josua ras tenterana mulih ku ingan erkemah i Gilgal.
Itaban Josua raja kalak Amori si lima
16Tapi raja kalak Amori si lima enggo lompat jenari cebuni ia i bas gua i Makeda. 17Lit sekalak jumpa ras ia, jenari ikatakenna man Josua inganna cebuni. 18Nina Josua, “Gulingken batu si galang ku babah gua e. Tamaken piga-piga kalak si erjaga i je, 19tapi kam ola tading i je. Teruskenlah ayaki musuhndu jenari seranglah ia i pudi nari, ola pelepas ia bengket ku bas kutana! TUHAN Dibatandu enggo mereken kemenangen man bandu ngelawan musuhndu.” 20Josua ras bangsa Israel munuhi kalak ndai, aminna gia lit sempat ndat ingan si aman i bas kutana si erbenteng janah la terbunuh.
21Kenca bage kerina tentera Josua mulihken ndahi ia alu selamat i bas ingan erkemah i Makeda.
I belang-belang negeri e lanai lit ise pe si pang ncakapken si la mehuli kerna Israel.
22Kenca bage nina Josua, “Talangi babah gua e jenari baba ndarat raja si lima e man bangku.” 23E maka italangi me gua ndai, jenari raja-raja Jerusalem, Hebron, Jarmut, Lakis, ras Eglon ibaba ndarat, 24ibaba man Josua. Jenari idilo Josua kerina kalak Israel ndahi ia janah iperentahkenna man kepala-kepala pasuken si enggo lawes ras ia gelah reh ndedeh kerahung raja-raja e. E maka bage me ibahanna. 25Kenca bage nina Josua man kepala-kepala pasukenna, “Ola kam mbiar, ola aru atendu. Tetapkenlah ukurndu janah teklah sabap bagenda me ate TUHAN ibahanNa man kerina musuhndu.” 26Jenari ibunuh Josua raja-raja ndai, igantungna i das lima batang kayu, i ja maitna gantung seh ben. 27Kenca matawari sundut ibereken Josua perentah, e maka mait-mait raja ndai ipesusur janah ibenterken ku bas gua inganna cebuni ndai. Itamaken batu si galang i bas babah gua e, janah i je denga lalap.
Ikuasai Josua tole daerah kalak Amori
28I bas wari e Makeda ras rajana iserang ras italuken Josua. Ibunuhna tep-tep kalak si lit i bas kuta e; la lit sada pe itadingken nggeluh. Ibahanna man raja Makeda bagi si enggo ibahanna man raja Jeriho.
29Enggo kenca dung si enda, Josua ras tenterana lawes i Makeda nari ku Lipna, jenari iserangna kuta e. 30I bas kuta enda pe ibereken TUHAN kang kemenangen man kalak Israel. La lit sada pe ipelepasna nggeluh, tapi ibunuhna kerina kalak si lit i bas kuta e. Man rajana bali ibahanna ras kai si enggo ibahanna man raja Jeriho.
31Kenca si enda, Josua ras tenterana lawes i Lipna nari ku Lakis. Ikepungna kuta e jenari iserangna. 32Kenca peperangen e erdalan dua wari, TUHAN mereken kemenangen man bangsa Israel ngelawan Lakis. I je pe bali ka nge ibahanna ras Lipna. La lit sada pe ipelepasna nggeluh, tapi ibunuhna kerina kalak si i bas kuta e. 33Raja Horam i Geser nari reh nampati Lakis, tapi italuken Josua ia ras tenterana janah la lit sada pe itadingkenna nggeluh.
34Seterusna, Josua ras tentera berkat i Lakis nari ku Eglon. Ikepungna kuta e jenari iserangna. 35Italukenna kuta e i bas wari e kang janah ibunuhna kerina si lit i je, bali ras si enggo ilakokenna i Lakis.
36Kenca si enda, Josua ras tenterana lawes i Eglon nari nangkeng ku Hebron, iserangna kuta e 37jenari italukenna. Ibunuhna rajana ras kerina si lit i bas kuta e bage pe i bas kuta-kuta i sekelewetna. Ikernepken Josua kuta e seh getem tuhu-tuhu, bali ras si enggo ibahanna man Eglon. La lit sada pe itadingkenna nggeluh i bas kuta e.
38Kenca bage Josua ras tenterana mulihken ku Debir jenari iserangna kuta e. 39Italukenna kuta e ras rajana bage pe kerina kuta-kuta i sekelewetna. Ibunuhna kerina kalak si lit i je. Man Debir ras rajana pe bali ibahan Josua ras si enggo ibahanna man Hebron ras man Lipna ras rajana.
40Kerina taneh e ikuasai Josua. Italukenna raja-raja si ringan arah deleng-deleng, arah rebe-reben si arah Timur, ras si i bas kendit si arah Barat, bage pe taneh si la lit launa i Selatan. La lit sada pe ipelepasna nggeluh. Kerina ibunuhna. Enda me kai si ipedahken TUHAN, Dibata Israel. 41Daerah si italuken Josua e mulai i Kades-Barnea nari i Selatan seh ku Gasa deher tepi lawit, bengket kerina daerah Gosen, bage pe terus ku Gibeon i Utara. 42Kerina raja-raja enda ras tanehna italuken Josua sekali erperang saja ngenca sabap TUHAN, Dibata Israel, nampati Israel i bas peperangen e. 43Kenca si enda kerina Josua ras tenterana mulih ku inganna erkemah i Gilgal.
Currently Selected:
JOSUA 10: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
