JOSUA 8
8
Kuta Ai italuken ras ikernepken
1Nina TUHAN man Josua, “Baba kerina tentera e ras kam jenari laweslah nangkeng ku Ai. Ola kam mbiar janah ola aru atendu. Kubereken man bandu kemenangen ngelawan raja Ai; rayatna, kutana, ras tanehna jadi sikerajangenndu. 2Uga perbahanndu man Jeriho ras rajana bage me arus ibahanndu pe man Ai ras rajana, tapi sekali enda banci ibuatndu barang-barangna ras lembuna man sikerajangenndu. Ersikap gelah banci iserangndu kuta e rempet i pudi nari.”
3E maka ersikap Josua ras kerina tenterana berkat ku Ai. Ipilihna telu puluh ribu kalak tentera si mbisana jenari isuruhna lawes berngi-berngi. 4Iperentahkenna nina, “Cebuni lah kam i pudi kuta ah, tapi ola ndauhsa i jenari; sikaplah nerangsa katawari pe. 5Aku ras tenterangku reh ndeheri kuta e. Sanga kalak Ai reh ndarat ngelawan kami, minter kami mulih jenari kiam, bali ras si ibahan kita i bas si pemena mbarenda. 6Tentu iayakina kami seh maka ibabai kami ia ndauh i bas kuta e nari. Iakapna kami kiam nadingken ia, bagi si ibahan kita mbarenda. 7Kenca bage ndarat kam i bas inganndu cebuni nari jenari taluken kuta e. TUHAN Dibatandu si mereken kuta e man bandu. 8Kenca ibuatndu kuta e, ciluklah, sue ras si ipedahken TUHAN. Enda me perentah man bandu.” 9E maka isuruh Josua kerina lawes, jenari lawes ia ku inganna cebuni janah itimaina i je, arah Barat Ai, kelang-kelang Ai ras Betel. I bas berngi e Josua tading i bas ingan erkemah.
10Pepagina lampas erpagi-pagi, keke Josua jenari ipepulungna tenterana. Kenca e ia ras peminpin-peminpin Israel minpin tentera e ku Ai. 11Tentera si ras ia e lawes kempak dalan bengket ku bas kuta e jenari ipajekkenna kemahna arah Utara, kelang-kelangna ras Ai lit sada baluren. 12Ibuatna kira-kira lima ribu kalak jenari isuruhna cebuni arah Barat kuta, kelang-kelang Ai ras Betel. 13Tentera e iatur guna erperang, si nteremna tading i bas ingan erkemah arah Utara kuta e. Si debanna arah Barat. I bas berngi e Josua ringan i baluren e. 14Tupung idah raja Ai tentera Josua, minter iperangina kalak Israel i bas ingan si mbarenda ka, alu la meteh maka ia nandangi iserang i pudi nari. 15Josua ras tenterana mpekulah-kulah mundur jenari kiam ku daerah gurun pasir. 16Kerina dilaki si lit i bas kuta Ai enggo idilo ngayakisa, janah asum iayakina Josua, terus ia erdauhna i kuta e nari. 17Tep-tep dilaki si lit i bas kuta Ai lawes ngayaki kalak Israel, janah kuta e talang itadingken la lit ise pe si mpertahankenca.
18Kenca bage nina TUHAN man Josua, “Angkat lembingndu, pepinter ujungna kempak Ai, sabap Kubereken kuta e ku bas kuasandu.” Ibahan Josua bagi si ikataken man bana, 19janah minter kenca iangkatna tanna, tentera si cebuni ndai pedas-pedas keke, kiam ku bas kuta e jenari italukenna. Minter icilukna kuta e. 20Asum itulihken kalak Ai ku pudi, iidahna cimber nangkih ku das. Lanai lit dalanna lompat, sabap kalak Israel si ndai kiam ku taneh si mesawang genduari enggo erkusur merang ia. 21Asum idah Josua ras tenterana maka tentera si debanna ndai enggo muat kuta e, janah enggo meseng, erkusur ia kerina jenari mulai ibunuhina kalak Ai. 22Kalak Israel si i bas kuta e genduari reh ku berneh ikut i bas peperangen e. Idah kalak Ai maka ia enggo ikepung bangsa Israel, janah kerina ia mate ibunuh. La lit sada pe si pulah, la lit si tading, 23seakatan raja Ai. IA itaban jenari ibaba man Josua.
24Kerina musuh e ibunuh kalak Israel i taneh si mesawang ku ja ia enggo ndai iayak-ayak kalak Ai. Kenca bage mulihken ia ku kuta Ai e maka ibunuhna kerina kalak si lit i je.
25-26Lembing tetap ipepinter Josua kempak kuta Ai janah lalap la ipesusurna seh tep-tep kalak si lit i je enggo ibunuh. Kerina kalak kuta Ai si ibunuh i bas wari e lit sepuluh dua ribu dilaki ras diberu. 27Lembu ras barang-barang si deban si itaban i bas kuta e ibuat bangsa Israel jadi sikerajangenna, sue ras si enggo ipedahken TUHAN man Josua. 28Iciluk Josua kuta Ai janah ipelepasna runtuh. Seh sendah pe bage denga nge. 29Igantungna raja Ai i bas sada batang kayu, janah ipelepasna maitna gantung i je seh berngi. Kenca matawari sundut iperentahken Josua gelah mait raja Ai ibuat, jenari ibenterken ku dalan i pintu gerbang kuta e. Itamburina mait e alu batu si ergun-gun, si lit denga i je seh sendah.
Undang-undang ioge i Deleng Ebal
30Jenari ipajekken Josua i Deleng Ebal sada batar-batar ingan persembahen man TUHAN, Dibata Israel. 31Ibahanna e sue ras pedah si enggo ibereken Musa, suruh-suruhen TUHAN, maka kalak Israel, bagi si ikataken i bas Undang-undang Musa, “Sada batar-batar ingan persembahen ibahan i bas batu nari si langa ibar-bar alu alat-alat besi.” I babo batar-batar e ipersembahkenna persembahen tutungen man TUHAN, janah ibahanna pe persembahen persadan. 32I je, alu ipernehen bangsa Israel, ibahan Josua i babo batu sada salinen Undang-undang si enggo isuratken Musa. 33Bangsa Israel, ras peminpin-peminpin, pegawai-pegawai, ras hakim-hakimna, bage pe kalak asing si lit i tengah-tengahna, tedis arah kawes ras arah kemuhen Peti Perpadanen TUHAN, ngala ku imam-imam kalak Lewi si ngelanja Peti e. Jelma si nterem e tedis, setengah mpudiken Deleng Gerisim janah setengah nari mpudiken Deleng Ebal. Musa suruh-suruhen TUHAN e enggo mereken pedah man bana kerina guna ngelakoken si enda, adi enggo seh paksana ia ngaloken pemasu-masun. 34Jenari alu sora megang, iogeken Josua Undang-undang e kerina, subuk pasu-pasu ras sumpahna, sue ras si tersurat i bas kitap Undang-undang. 35Tep-tep perentah Musa iogeken Josua man kerina perpulungen e, subuk man diberu ras anak-anak, bage pe kalak pertandang si ringan i tengah-tengahna.
Currently Selected:
JOSUA 8: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
