JOSUA 7
7
Dosa Akan
1Pedah TUHAN man Israel maka ola muat kai pe i Jeriho nari si arus ihancurken la ipatuhi. Lit sekalak dilaki Akan gelarna, la ipatuhina perentah e. E maka nembeh kal ate TUHAN man bangsa Israel. (Akan e me anak Karmi ntah pe kempu Sabdi, janah bengket ku bas terpuk Sera, sada bagin i bas suku Juda.)
2Isuruh Josua piga-piga kalak i Jeriho nari ku Ai, kuta arah Timur Betel, deher Bet-Awen, alu perentah gelah iselidikina taneh e. Kenca enggo iselidikina, 3ilaporkenna mulihken man Josua nina, “La perlu kerina kita merangi Ai. Suruh saja kira-kira dua ntah telu ribu kalak. Ola suruh kerina tentera e ku jah erperang; labo mbelin kuta e.” 4E maka kira-kira telu ribu kalak Israel erbahan serangen ku kuta e, tapi ia ipaksa mundur. 5Iayak-ayak kalak Ai ia i pintu gerbang kuta e nari seh ku Sebarim janah ibunuhina kalak Israel kira-kira telu puluh enem kalak i bas dalan ngincuah uruk e. E maka enggo bene kal ukur bangsa Israel janah mbiar pe ia.
6Icaingken Josua ras peminpin-peminpin Israel uisna erkite-kiteken lesek atena, idampeskenna bana ku taneh i lebe-lebe Peti Perpadanen TUHAN, janah ampar ia i je seh berngi. Icaburkenna abu ku takalna nuduhken atena ceda. 7Jenari nina Josua, “TUHAN Dibata! Engkai maka ibabaNdu kami ngepari Lau Jordan? Gelah mereken kami man kalak Amori? Gelah kami kernep kerina? Engkai maka kami la tading arah lepar Lau Jordan ah saja? 8Uga narilah ningku, o TUHAN, adi genduari Israel enggo mundur ibahan musuh? 9Kalak Kanaan ras kalak si deban i daerah enda tentu megi kerna si e. Nandangi ikepungna me kami, jenari ibunuhna kami sekalak-sekalak! Janah kenca si e kai nari me ibahanNdu njaga kemulianNdu?”
10Nina TUHAN man Josua, “Kekelah! Engkai maka kam ampar i babo taneh bagenda? 11Israel enggo erdosa! Enggo ilanggarna padanna ras Aku si Kusuruh gelah itepatina. Enggo ibuatna piga-piga barang si aturenna ikernepken. Itangkona barang e, erbual ia kerna si e, jenari itamakenna ras barang-barangna jine. 12Enda me sabapna maka bangsa Israel la ngasup ngelawan musuhna. Mundur ia i bas musuhna nari sabap genduari ia jine arus ikernepken! Lanai Aku nggit tading ras kam, pala ikernepkenndu kin barang-barang si enggo Kuperentahken la banci ibuatndu! 13Kekekenlah! Bersihken lah bangsa jenari suruh ia kerina ersikap ngadap Aku. Kataken man bana kerina maka pagi enggo ia sikap, sabap Aku, TUHAN Dibata bangsa Israel, ngerana ateKu man bana bagenda, ‘O Israel, ibunikenndu ras sikerajangenndu piga-piga barang si Kusuruh gelah ikernepken! La kam ngasup ngelawan musuh-musuhndu adi la iambekkenndu barang-barang e!’ 14E maka kataken man bana kerina maka pagi erpagi-pagi ibaba ia ngadap rikutken sukuna sada-sadai. Suku si Kutuduh arus reh ngadap rikutken terpukna sada-sadai. Terpuk si Kutuduh arus reh ngadap rikutken keluargana sada-sadai. Keluarga si Kupilih arus reh ngadap sekalak-sekalak. 15Kalak si Kutuduh janah terdat i bas ia barang si terlarang e, la banci la itutung radu ras keluargana ras asa kai ertana, sabap perbahanna maka mela kal iakap Israel, janah enggo ilanggarna padanKu.”
16Pepagina lampas, ibaba Josua bangsa Israel ngadap, rikutken suku-sukuna, jenari ituduh me suku Juda. 17Ibabana suku Juda ngadap, rikutken terpuk-terpukna, jenari ituduh me terpuk Sera. Kenca bage ibabana terpuk Sera ngadap, rikutken keluargana, jenari ituduh me keluarga Sabdi. 18E maka ibabana me keluarga Sabdi ngadap sekalak-sekalak, jenari ituduh me Akan anak Karmi kempu Sabdi. 19Nina Josua man bana, “Anakku, katakenlah situhuna i jenda i lebe-lebe TUHAN Dibata Israel, jenari ngakulah. Katakenlah genduari man bangku kai si enggo ibahanndu. Ola cubaken kam munikenca i bas aku nari.”
20“Payo nge,” nina erjabap, “Aku enggo erdosa man TUHAN, Dibata Israel, janah enda me kai si kulakoken. 21I bas barang-barang si irampas kami kuidah sada jubah Babilon si mejile, kira-kira dua kilo pirak, ras sada batang emas beratna lebih setengah kilo. Seh kal ateku menggana ngidahsa, e maka kubuat. Genduari enggo itanem i teruh taneh i bas kemahku, pirak itamaken arah teruh. Banci inenndu.”
22E maka isuruh Josua piga-piga kalak, minter kiam ku bas kemah e, jenari ijumpaina barang-barang si terlarang e tuhu itanemken i je, janah pirak arah teruh. 23Ibuatna barang-barang e i bas kemah e nari, jenari ibabana man Josua ras kerina kalak Israel, janah iamparkenna i lebe-lebe TUHAN. 24Josua, radu ras kerina bangsa Israel minter nangkap Akan, pirak, jubah, ras emas batangen ndai, bage pe ras anak-anakna si dilaki ras diberu, lembuna, kaledena, ras biri-birina, kemahna, ras kerina barang-barang si deban, jenari ibabana e kerina ku Baluren Kesusahen. 25Jenari nina Josua, “Engkai maka ibahanndu kesusahen e man kami? Genduari TUHAN maba kesusahen man bandu!” E maka kenca e kerina bangsa e menteri Akan alu batu seh mate. Keluargana ras kerina erta-ertana pe ibenterina jenari icilukna. 26Ipegun-gunna batu mbue i babona, si lit denga i je seh wari si sendah. Em sabapna maka ingan e igelari denga Baluren Kesusahen. Kenca si e TUHAN lanai merawa.
Currently Selected:
JOSUA 7: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
