JOSUA 6

Kuta Jeriho italuken

1Pintu gerbang kuta Jeriho terus-terusen itutup janah ijaga gelah bangsa Israel la banci bengket. Sekalak pe la banci bengket ntah pe nadingken kuta e. 2Nina TUHAN man Josua, “Kubereken Jeriho ku bas tanndu, rikutken ras rajana ras kerina tenterana si merawa. 3Kam ras tenterandu la banci la erdalan i bas barisen ngkeleweti kuta e sekali sada wari. 4Pitu kalak imam, sekalak-sekalak maba terompet, arus erdalan arah lebe Peti Perpadanen. I bas wari si pepituken kam ras tenterandu arus erdalan ngkeleweti kuta e pitu kali janah imam-imam ngembus terompet ndai. 5Kenca bage arus iembusna erbahan sada sora si nggedang. Kenca ibegindu si e, kerina kalak si nterem la banci la minter ersurak alu sora megang, jenari tembok kuta tentu runtuh. Kenca bage kerina tentera e bengketlah terus ku bas kuta e.”

6Idilo Josua imam-imam janah ikatakenna man bana kerina, nina, “Buatlah Peti Perpadanen e, janah pitu kalak i bas kam nari erdalan arah lebe, maba terompet.” 7Jenari isuruhna tenterana mulai erdalan i bas barisen engkeleweti kuta e, alu pengawal-pengawal si ersenjata erdalan leben asa Peti Perpadanen TUHAN.

8-9E maka, sue ras kai si iperentahken Josua, pengawal-pengawal si ersenjata mulai erdalan leben asa imam-imam si ngembus terompet. Arah pudina reh imam-imam si ngelanja Peti Perpadanen, iikuti pengawal si ersenjata. Gedang-gedang dalan erkata me terompet ndai. 10Tapi enggo iperentahken Josua tenterana gelah ola ersurak, janah la banci ngerana sengkebabah pe, seh iberekenna perentah.

11E maka isuruhna me kalak ndai ngelanja Peti Perpadanen TUHAN ngkeleweti kuta e sekali. Kenca bage mulihken ka ia ku ingan erkemah janah erberngi i je.

12-13Pepagina lampas, keke Josua. Janah enda me pedua kaliken imam-imam ras tentera erbaris ngkeleweti kuta e alu uruten si seri ras wari si pemena e me: lebe pengawal si ersenjata; jenari pitu kalak imam si ngembus pitu terompet; kenca e imam-imam si ngelanja Peti Perpadanen TUHAN, pengawal-pengawal si ersenjata si arah pudi. Gedang-gedang dalan erkata me terompet ndai. 14I bas wari si peduaken e erdalan ka ia ngkeleweti kuta e sekali janah kenca si e mulih ku ingan erkemah. Bagenda me perbahanna enem wari dekahna.

15I bas wari pepituken, enggo kenca terang keke ia kerina jenari erdalan ia ngkeleweti kuta e bagi si enggona. I bas wari e me ngenca kuta e i kelewetina pitu kali. 16Enggo kenca dem pitu kali ikelewetina, ope denga iembus imam-imam terompet, iperentahken Josua tenterana ersurak, jenari nina, “Enggo ibereken TUHAN man bandu kuta e! 17Kuta e ras kerina si lit i je la banci la ihancurken tuhu-tuhu jadi sada persembahen man TUHAN. Rahap, diberu si pencarinna erlua-lua e, ras kerina keluargana ngenca itadingken, sabap ibunikenna mata-matanta. 18Tapi la banci kai pe ibuatndu si arus ihancurken, adi ibuatndu, tentu kesusahen ras cilaka ku ingan bangsa Israel erkemah. 19Kerina si ibahan i bas pirak, emas, tembaga, ntah pe besi, arus iserapken man TUHAN. Si e arus itamaken ku bas perbendeharan TUHAN.”

20Jenari iembus imam-imam me terompet e. Kenca ibegi jelma si nterem sora terompet e, minter ia ersurak kerina alu sora megang, jenari minter runtuh tembok e. E maka kerina tentera e terus lawes ku das uruk, bengket ku bas kuta e ngkuasaisa. #Heb 11:30 21Ibunuhna alu pedangna tep-tep kalak si lit i bas kuta e, dilaki ras diberu, nguda ntah metua. Lembu, biri-biri, ras kelede pe ibunuhi kalak ndai.

22Ikataken Josua man si dua kalak si jadi mata-mata mbarenda, nina, “Laweslah ku rumah diberu, si pencarinna erlua-lua e jenari baba ia ras keluargana ndarat, sue ras si enggo ipadankenndu man bana.” 23E maka lawes ia jenari ibabana Rahap ndarat, ikut pe ras bapana ras nandena, turangna, ras kerina keluargana. Ibabana ia kerina, keluargana ras budak, ku bas ingan si aman deher ingan bangsa Israel erkemah. 24Kenca bage icilukna kuta e, itutungna seh kendit kerina, radu ras asa kai si lit i je, seakatan barang-barang si ibahan i bas emas, pirak, tembaga, ras besi nari. Si e kerina ibuatna jenari itamakenna ku bas perbendeharan TUHAN. 25Tapi ipelepas Josua Rahap, diberu si pencarinna erlua-lua e nggeluh, ras kerina kade-kadena, sabap enggo ibunikenna mata-mata si dua kalak si enggo isuruh mbarenda ku Jeriho. (Kesusuren Rahap enggo ringan i Israel seh wari enda.) #Heb 11:31

26Tupung e ersumpah Josua nina,

“Ise si ncubakenca pekena kuta Jeriho

bene me anakna sintua.

Janah ise si erbahan pintu gerbang

bene me anakna si nguda.” #1Raj 16:34

27Dage, itemani TUHAN me Josua, janah mbar berita kerna ia i belang-belang negeri e.

Currently Selected:

JOSUA 6: BTX

Highlight

Compare

Copy