JOSUA 22
22
Josua nuruh suku-suku si arah Timur mulih ku Kanaan
1Kenca bage idilo Josua pulung suku Ruben, Gat, ras Manase Timur. 2Nina man bana kerina, “Enggo ilakokenndu kerina si enggo iperentahken Musa, suruh-suruhen TUHAN e, man bandu, janah enggo ipatuhindu kerina perentahku. #Bil 32:20-32; Jos 1:12-15 3Kidekah enda sekali pe la pernah itadingkenndu seninandu kalak Israel. Enggo metenget kam ngikuti perentah TUHAN Dibatandu. 4Genduari, sue ras si enggo ipadankenNa man senina-seninandu kalak Israel, TUHAN Dibatandu enggo mereken keamanen. E maka mulihlah kam ku kutandu, taneh si arah Timur Lau Jordan, taneh si ibereken Musa suruh-suruhen TUHAN e man bandu. 5I bas si e arus iingetndu gelah ipatuhindu undang-undang si ipedahken Musa man bandu: kelengilah TUHAN Dibatandu, bahanlah kai si ngena ateNa ikutken pedahNa, erkemalangenlah man baNa, janah pemuliakenlah IA alu bulat ukurndu ras tendindu.” 6-8Isuruh Josua ia kerina mulih ku kutana alu pemasu-masunna janah ipedahina pe ia kerina nina, “Mulihlah kam ku kutandu maba mbue kebayaken: lembu, pirak, emas, tembaga, besi, ras mbue paken. Kai si enggo ibuatndu i bas musuh-musuhndu nari bereken deba man senina-seninandu si sada suku.” Kenca bage berkat ia kerina mulih ku kutana.
Musa enggo mereken taneh i Timur Lau Jordan man setengah suku Manase, tapi man si setengah nari enggo ibereken Josua arah Barat Lau Jordan, radu ras suku-suku si deban.
9E maka mulih kalak Ruben, Gat, ras Manase Timur ku kutana. Itadingkenna bangsa Israel si debanna i Silo i taneh Kanaan janah mulai berkat ku tanehna Gileat, si enggo jadi sikerajangenna sue ras si enggo ipedahken TUHAN arah Musa.
Batar-batar deherken Lau Jordan
10Kenca suku Ruben, Gat, ras Manase Timur seh i Gelilot, arah bagin Barat Lau Jordan denga, ipajekkenna batar-batar galang ras mejile deherken Lau Jordan. 11E maka man bangsa Israel si debanna ikataken nina, “Nehenlah! Kalak si i bas suku Ruben, Gat, ras Manase Timur enggo majekken batar-batar i Gelilot, deherken balengta Lau Jordan arah sembelahta enda!” 12Kenca ibegi bangsa Israel si enda pulung kerina perpulungen e i Silo guna lawes erperang ngelawan suku-suku si arah Timur.
13Jenari isuruh bangsa Israel me Pinehas, anak Imam Eleasar, ndahi suku Ruben, Gat ras Manase Timur ku taneh Gileat. 14Sepuluh kalak peminpin berkat ras Pinehas, e me sekalak i bas tep-tep suku si arah Barat. Kalak enda ndai e me kepala keluarga i bas terpukna ras Pinehas. 15Reh ia ku taneh Gileat, njumpai suku Ruben, Gat ras Manase Timur. 16Ngerana ia i bas gelar kerina perpulungen TUHAN nina man kalak e, “Engkai maka ibahanndu si jahat man Dibata Israel? Kam enggo mberontak man TUHAN alu majekken batar-batar enda man bandu jine! Kam lanai ngikutken IA! #Ul 12:6 17Ma ingetndu dosanta i Peor, sanga TUHAN ngukum bangsaNa alu penakit si ngkenai nterem jelma? Genduari pe mesera denga siakap erkite-kiteken si e. Langa kin iakapndu bias dosa si ilakokenndu e? #Bil 25:1-9 18Lanai kin atendu ngikutken IA genduari? Adi isimbakndu TUHAN sendah, la banci la merawa pagi IA man kerina jelma i Israel. 19Genduari dage, adi tanehndu e la kin cocok man ingan ersembah, reh kam ku taneh TUHAN, ingan KemahNa ipajekken. Pindo deba taneh si lit i bas kami. Tapi ola kal isimbakndu TUHAN, ola kal ibahanndu kami jadi pemberontak alu kam erbahan batar-batar nambahi batar-batar TUHAN Dibatanta. 20Inget kuga Akan anak Sera la nggit ngikutken pedah TUHAN kerna barang-barang si arus ikernepken. Kerina perpulungen Israel iukum erkite-kiteken si e. La Akan ngenca mate erkite-kiteken dosana.” #Jos 7:1-26
21Ngaloi suku Ruben, Gat ras Manase Timur kepala-kepala keluarga suku-suku si arah Barat nina, 22“Dibata si meganjangna kap Dibata si tuhu-tuhu! IA kap TUHAN! Dibata si meganjangna kap Dibata si tuhu-tuhu! IA kap TUHAN! ItehNa kai si ibahan kami enda, janah ate kami maka kam pe metehsa ka! Adi ngelawan kin kami man TUHAN, adi lanai kin kami tek man TUHAN olanai pelepas kami nggeluh! 23Adi isimbak kami kin TUHAN janah adi ibahan kami kin batar-batar guna diri kami jine man ingan nutung persembahen ntah pe gelah ipake guna persembahen buah gandum ntah pe persembahen persadan, TUHAN jine lah si ngukum kami. 24Labo e tujun kami! Ipajekken kami batar-batar e, sabap mbiar kami maka pagin kesusurenndu ngerana man kesusuren kami, nina, ‘La kap lit hubungenndu ras TUHAN Dibata Israel? 25IbahanNa Lau Jordan jadi baleng kami ras kam kalak Ruben ras Gat. Labo lit baginndu i bas TUHAN.’ Jenari banci jadi ilarang kesusurenndu pagi kesusuren kami ersembah man TUHAN. 26E maka ipajekken kami sada batar-batar, labo man ingan nutung persembahen ntah pe man ingan persembahen, 27tapi gelah jadi sada tanda man kami ras kam, bage pe man kerina kesusurenta si reh, maka kami pe tuhu-tuhu nge ersembah man TUHAN i lebe-lebe KemahNa si Badia rikut pe ras persembahen-persembahen persadan. Enda ibahan kami njaga gelah ola pagi ikataken kesusurenndu, maka kesusuren kami labo lit urusenna ras TUHAN. 28Si e iukurken kami, gelah kune si enda terjadi, kesusuren kami banci ngerana nina, ‘Nehenlah! Nini-nini kami erbahan sada batar-batar TUHAN. Batar-batar e labo guna nutung persembahen ntah guna persembahen gelehen, tapi jadi sada tanda man kami ras kam.’ 29Dage, labo ate kami ngelawan TUHAN ntah pe nundalken IA genduari, alu majekken sada batar-batar man ingan nutung persembahen ntah pe persembahen buah gandum ntahpe persembahen gelehen. Labo kami nggit majekken batar-batar si deban lain asa batar-batar TUHAN Dibatanta si pajek i lebe-lebe Kemah PerjumpanNa.” 30Imam Pinehas ras peminpin-peminpin perpulungen si sepuluh kalak si ras ia, kepala-kepala keluarga i bas suku-suku si arah Barat, megi kai si ikataken suku Ruben, Gat, ras Manase Timur, janah payo iakapna. 31Pinehas anak Imam Eleasar ngerana nina, “Genduari enggo ieteh kami maka TUHAN ras kita kap, sabap labo kepe atendu ngelawan man baNa. Erkite-kiteken si e enggo ipulahindu bangsa Israel i bas ukumen TUHAN nari.”
32Kenca bage Pinehas ras peminpin-peminpin e lawes nadingken kalak Ruben ras Gat i taneh Gileat janah mulih ia ku Kanaan, ku bangsa Israel, jenari nuri-nuri ia man bangsa e. 33Payo iakap kalak Israel jenari ipujina Dibata. Lanai icakapkenna kerna lawes erperang guna ngkernepken taneh ingan tading kalak Ruben ras Gat.
34Nina kalak Ruben ras Gat, “Batar-batar enda jadi sada saksi man banta kerina maka TUHAN kap Dibata.” E maka ibahanna gelar batar-batar e “Saksi”.
Currently Selected:
JOSUA 22: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
