JOSUA 23
23
Pidato perpisahen Josua
1Ndekah denga kenca si e TUHAN mereken keamanen man Israel i bas musuh-musuhna nari si lit i sekelewetna. Tupung e Josua enggo metua kal, 2e maka idilona kerina kalak Israel, pertua-pertua, peminpin-peminpin, hakim-hakim ras kepala-kepala pasuken bangsa e, jenari nina, “Genduari aku enggo metua kal. 3Enggo idahndu kai si ibahan TUHAN Dibatandu man kerina bangsa enda erkite-kiteken kam. TUHAN Dibatandu enggo erperang guna kam. 4Enggo kutetapken jadi sikerajangen suku si lit i bas kam taneh bangsa-bangsa si lit denga tading, bage pe kerna taneh kerina bangsa-bangsa si enggo kutaluken, mulai i Lau Jordan nari i Timur seh ku Lawit Tengah i Barat. 5TUHAN Dibatandu mahanca pagi kiam kerina bangsa e i adep-adepenndu nari, janah asum kam merangisa ipelawesNa bangsa e kerina. Tanehna la banci la iendesken man bandu pagi, bagi si enggo ipadanken TUHAN Dibatandu man bandu. 6E maka arus kam metenget ngikuti ras ngelakoken kerina si tersurat i bas kitap Undang-undang Musa. Ola kam nilah sitik pe i bas Undang-undang e nari, 7janah ola kam erteman ras bangsa si lit denga tading i tengah-tengahndu. Kam la banci erbelas i bas gelar dibatana, ntahpe ersumpah i bas gelarna. Nembah man dibatana e pe kam la banci, ntah pe erjimpuh nembah man bana. 8Tapi tetaplah kam setia man TUHAN, bagi kam tetap setia seh genduari. 9Enggo ipelawes TUHAN bangsa-bangsa si mbelin ras megegeh asum kam merangisa janah la lit sada pe si ngasup ngelawan kam. 10Sekalak saja pe ngasup kam ngayak-ngayak seribu kalak, sabap TUHAN Dibatandu erperang guna kam, sue ras si ipadankenNa. #Ul 3:22; 32:30 11Dage tutuslah atendu ngkelengi TUHAN Dibatandu. 12Adi la kam patuh, tapi ersada kam ras bangsa-bangsa si lit denga i tengah-tengahndu, ntahpe si empon kam ras ia, 13arus itehndu tuhu-tuhu maka bangsa e lanai ipelawes TUHAN Dibatandu tupung kam merangisa. Tapi bangsa e jadi bahaya man bandu desken siding ntah pe ragum si erbahanca mesui iakapndu, desken perligas ngeligas gurungndu. Ntah pe bali ras duri si lit i bas matandu. Si enda tetap pagi bage seh lanai lit sada pe kam tading i bas taneh si mehuli enda si enggo ibereken TUHAN Dibatandu man bandu.
14Genduari enggo seh paksana aku mate. Sekalak-sekalak kam meteh i bas ukurna ras i bas tendina maka TUHAN Dibatandu enggo mereken man bandu kerina si mehuli si enggo ipadankenNa. Kerina si ipadankenNa la lit sada pe si la seh, kerina enggo itepatiNa. 15Tapi bali ras penepatiNa tep-tep padan si ipadankenNa man bandu, bageme pe la banci lang isehkenNa ancamenNa man bandu. 16Adi la ingetndu perpadanen si ipedahken TUHAN Dibatandu man bandu, janah adi ipehaga ras isembahndu dibata-dibata si deban, tentu la banci lang minter kam keri i bas taneh si mehuli enda si enggo iberekenNa man bandu.”
Currently Selected:
JOSUA 23: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
