JOSUA 21
21
Kuta-kuta kalak Lewi
1Peminpin-peminpin keluarga kalak Lewi lawes njumpai Imam Eleasar, Josua, anak Nun, ras kepala-kepala keluarga i bas kerina suku-suku Israel, 2i kuta Silo i negeri Kanaan. Nina man bana kerina, “Enggo ipedahken TUHAN arah Musa maka man kami ibereken kuta-kuta jadi ingan kami tading, bage pe mbalmbal i sekelewet kuta-kuta e man ingan lembu kami.” #Bil 35:1-8 3E maka sue ras pedah TUHAN ibereken bangsa Israel tanehna man kalak Lewi piga-piga kuta ras mbalmbalna.
4Si pemena kal itetapken e me kuta-kuta si man keluarga kalak Lewi i bas terpuk Kohat. Keluarga kesusuren Imam Harun itetapken man bana sepuluh telu kuta i daerah Juda, Simeon, ras Benyamin. 5Man terpuk Kohat si deban, itetapken sepuluh kuta i daerah Eperaim, Dan, ras Manase Barat.
6Man terpuk Gerson itetapken sepuluh telu kuta i daerah Isakar, Aser, Naptali, ras Manase Timur.
7Man terpuk Merari itetapken sepuluh dua kuta i daerah Ruben, Gat, ras Sebulon.
8Alu erbahan tikam tanduk, bangsa Israel netapken kuta-kuta enda ras mbalmbal man kalak Lewi, sue ras si enggo iperentahken TUHAN arah Musa.
Kuta-kuta man terpuk Kehat
9Enda me gelar-gelar kuta i bas daerah Juda ras Simeon si ibereken 10man kesusuren Harun si lit i bas terpuk Kohat, kesusuren Lewi. Man bana me si pemenana itetapken. 11Si ibereken man bana e me kuta Arba (Arba e me kap bapa Enak), genduari igelari Hebron, i taneh deleng-deleng daerah Juda, rikut pe ras mbalmbal i sekelewetna. 12Tapi mbalmbal kuta-kuta e ras kuta-kutana enggo leben ibereken jadi sikerajangen Kalep anak Jepuna. 13Tambah Hebron (salah sada kuta benteng keterkelinen), kuta-kuta si tersurat arah teruh enda itetapken man kesusuren Imam Harun: Lipna, 14Jattir, Estemoa, 15Holon, Debir, 16Ain, Juta, ras Bet-Semes, ras mbalmbalna; dage lit siwah kuta i bas suku Juda ras Simeon nari. 17I bas daerah Benyamin nari man bana ibereken empat kuta, e me: Gibeon, Geba, 18Anatot, ras Almon, ras mbalmbalna. 19Dage lit sepuluh telu kuta kerina ras mbalmbalna, ibereken man imam-imam, kesusuren Harun.
20Man keluarga kalak Lewi si deban i bas terpuk Kohat itetapken piga-piga kuta i bas daerah Eperaim nari. 21Man bana ibereken empat kuta: Sikem ras mbalmbalna i taneh deleng-deleng Eperaim (e me kuta benteng keterkelinen), Geser, 22Kibsaim, ras Bet-Horon, ras mbalmbalna. 23I bas daerah Dan nari man bana ibereken empat kuta: Elteke, Gibeton, 24Ayalon, ras Gatrimon, ras mbalmbalna. 25I bas daerah Manase Barat nari man bana ibereken dua kuta: Taanak ras Gatrimon, ras mbalmbalna. 26Keluarga-keluarga i bas terpuk Kohat enda ngaloken sepuluh kuta kerina, ras mbalmbalna.
Kuta-kuta man terpuk Gerson ras Merari
27Terpuk Gerson, e me perpulungen si deban i bas kalak Lewi, ngaloken dua kuta i bas Manase Timur nari: Golan i Basan (e sada kuta benteng keterkelinen) ras Bestera, ras mbalmbalna. 28I bas daerah Isakar nari ialokenna empat kuta, e me: Kision, Daberat, 29Jarmut, ras En-Ganim, ras mbalmbalna. 30I bas daerah kalak Aser ialokenna empat kuta e me: Misal, Abdon, 31Helkat, ras Rehop, ras mbalmbalna. 32I bas daerah Naptali nari ialokenna telu kuta, e me: Kedes i Galilea, ras mbalmbalna (e me kuta benteng keterkelinen), Hamot Dor, ras Kartan, ras mbalmbalna. 33Jumlah kuta-kuta ras mbalmbalna si ialoken keluarga Gerson kerina lit sepuluh telu kuta.
34Kalak Lewi selebihna e me, terpuk Merari, ngaloken empat kuta i bas daerah Sebulon nari: Jokneam, Karta, 35Dimna, ras Nahalal, ras mbalmbalna. 36I bas daerah Ruben nari ialokenna empat kuta e me: Beser, Jahas, 37Kedemot, ras Mepaat, ras mbalmbalna. 38I bas suku Gat nari ialokenna empat kuta, e me: Ramot i Gileat ras mbalmbalna (e me kuta benteng keterkelinen), Mahanaim, 39Hesbon, ras Jaser, ras mbalmbalna. 40Jadi man terpuk Merari lit itetapken sepuluh dua kuta.
41-42I bas taneh bangsa Israel nari, lit empat puluh waluh kuta, rikut ras mbalmbal i sekelewetna, ibereken man kalak Lewi.
TUHAN nehken padanNa
43Jadi ibereken TUHAN kerina taneh e man Israel. Enda sue ras si enggo ipadanken TUHAN man nini-ninina maka taneh e iberekenNa man bana. Kenca ibuatna taneh e jadi sikerajangenna, i je me ia tetap ringan. 44Ibereken TUHAN keamanen man Israel i belang-belang taneh e, sue ras si enggo ipadankenNa man nini-ninina. Kerina musuhna la lit sada pe si ngasup ngelawan ia. Sabap TUHAN si mereken kemenangen man kalak Israel ngelawanca. 45Isehken TUHAN kerina padan si enggo ibahanNa man bangsa Israel.
Currently Selected:
JOSUA 21: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
