JOSUA 20
20
Kuta-kuta benteng keterkelinen
1Kenca bage TUHAN nuruh Josua #Bil 35:6-32; Ul 4:41-43; 19:1-13 2gelah ikatakenna man bangsa Israel bagenda, “Tetapkenlah kuta benteng ingan terkelin sue ras si enggo Kuperentahken man bandu arah Musa. 3Kalak si munuh alu la sengaja banci lompat ku je nilahken kalak si erbalas atena. 4Banci ia kiam ku salah sada kuta enda, jenari lawes ku ingan runggu i bas dalan bengket ku bas kuta e, guna nuriken man peminpin-peminpin i bas kuta e, kai si enggo jadi. Kenca bage banci iberena ia bengket ku bas kuta e janah iberekenna man bana inganna tading, gelah banci ia ringan i je. 5Adi kalak si erbalas atena ndai ndarami ia ku je, penduduk kuta e la banci ngendeskenca man bana; la banci la ikawalina ia, sabap ia munuh labo alu sengaja janah labo erkite-kiteken nembeh atena. 6Banci ia ringan i bas kuta e seh ia iadili i tengah-tengah jelma si nterem janah seh kematen Imam si Mbelin tupung e. Kenca bage banci ia mulihken ku kutana, i ja nari ia enggo lompat mbarenda.”
7E maka, arah Barat Lau Jordan itetapken me kuta Kades i Galilea, i taneh deleng-deleng Naptali; Sikem, i taneh deleng-deleng Eperaim; ras Hebron, i taneh deleng-deleng daerah Juda. 8Arah Timur Lau Jordan, i bas gurun pasir si kendit si arah Timur Jeriho, itetapkenna kuta Beser i bas daerah Ruben; kuta Ramot i Gileat, i bas daerah Gat, ras kuta Golan i Basan, i bas daerah Manase. 9Enda me kuta benteng ingan terkelin si nitetapken man kerina bangsa Israel ras man kalak pertandang si ringan i tengah-tengahna. Tep-tep kalak si munuh alu la sengaja banci ndatken perlindungen i je gelah ola ia sempat ibunuh kalak si erbalas atena, ope denga ia iadili i tengah-tengah jelma si nterem.
Currently Selected:
JOSUA 20: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
