JOSUA 19
19
Daerah si itetapken man suku Simeon
1Si peduaken itetapken man keluarga suku Simeon. Daerahna seh ku taneh si itetapken man suku Juda. 2Si bengket ku je e me kap: Berseba, Seba, Molada, #1Kro 4:28-33 3Hasar Sual, Bala, Esem, 4Eltolat, Betul, Horma, 5Siklak, Bet-Markabot, Hasar Susa, 6Bet-Lebaot, ras Saruhen; sepuluh kuta kerina, rikut pe ras kuta-kuta i sekelewetna.
7Lit ka pe Ain, Rimon, Eter, ras Asan; empat kuta kerina, rikut pe ras kuta-kuta i sekelewetna. 8Enda bengket kerina kuta-kuta i sekelewet kuta-kuta enda seh ku Baalat Beer (ntahpe pe Rama), i Selatan. Enda me taneh si ialoken keluarga suku Simeon jadi sikerajangenna. 9Erkite-kiteken bagin Juda belangen asa si iperluken, sada bagin i bas daerahna e ibereken man suku Simeon.
Daerah si itetapken man suku Sebulon
10Si peteluken itetapken man keluarga suku Sebulon. Taneh si ialokenna seh ku Sarit. 11I jenari balengna terus ku Barat ku Mareal, mentas arah tepi Dabbeset ras lau si arah Timur Jokneam. 12I Sarit nari balengna e terus ku Timur ku perbalengen Kislot Tabor, kenca e ku Daberat jenari nangkeng ku Japia. 13I jenari terus ka ku Timur ku Gat Heper ras ku Etkasin, e maka melok kempak jurusen Neah i bas dalan ku Rimon. 14Arah Utara, baleng taneh e melok ku Hanaton janah ujungna i Baluren Iptahel. 15Si bengket ku je e me Kattat, rikut pe ras kuta-kuta i sekelewetna. 16Kota-kota ras kuta-kuta enda inganna i bas taneh si ialoken keluarga suku Sebulon jadi sikerajangenna.
Daerah si itetapken man suku Isakar
17Si peempatken itetapken man keluarga suku Isakar. 18Si bengket ku bas daerahna e, e me: Jesreel, Kesulot, Sunem, 19Haparaim, Sion, Anaharat, 20Rabbit, Kesion, Ebes, 21Remet, En-Hada, ras Bet-Pases. 22Balengna enda pe mentas arah tepi Tabor, Sahasuma, ras Bet-Semes, janah ujungna ngadi i Lau Jordan. Si bengket ku je lit sepuluh enem kuta rikut pe ras kuta-kuta i sekelewetna. 23Kota-kota ras kuta-kuta enda inganna i bas taneh si ialoken keluarga suku Isakar jadi sikerajangenna.
Daerah si itetapken man suku Aser
24Si pelimaken man keluarga-keluarga suku Aser. 25Si bengket ku bas daerahna e me: Helkat, Hali, Beten, Aksap, 26Allam Melek, Amat, ras Misal. Arah Barat balengna mentas arah tepi Karmel ras Sihor Libnat. 27Kenca mbelok ku Timur, balengna terus ku Bet-Dagon, mentas arah tepi Sebulon ras Baluren Iptahel janah terus ku Utara ku Betemek ras Nehiel. I jenari terus ku Kabul, 28Eberon, Rehop, Hammon, ras Kana, seh ku Sidon. 29Kenca e mbelok ku Rama, seh ku kuta si itembok e me Tirus; kenca bage mbelok ku Hosa janah ujungna ngadi i Lawit Tengah. Si bengket ku je e me kap: Mahalap, Aksip, 30Umma, Apek, ras Rehop; dage lit dua puluh dua kuta kerina, rikut pe ras kuta-kuta si lit i sekelewetna. 31Kota ras kuta-kuta e, e me i bas taneh si nibereken man keluarga kalak Aser.
Daerah si itetapken man suku Naptali
32Si peenemken itetapken man keluarga-keluarga suku Naptali. 33Balengna mulai i Helep nari seh ku kayu jati i Saananim, terus ku Adaminekep ras ku Jamnia, seh ku Lakkum, janah ujungna ngadi i Lau Jordan. 34I jenari balengna melok ku Barat ku Asnot Tabor, i jenari ku Hukkok, lewat arah tepi Sebulon i Selatan, arah tepi Aser i Barat ras arah tepi Lau Jordan i Timur. 35Kuta-kuta si itembok e me: Sidim, Ser, Ramat, Rakat, Kineret, 36Adama, Rama, Hasor, 37Kedes, Edrei, Enhasor, 38Jiron, Mikdalel, Horem, Bet-Anat, ras Bet-Semes; dage lit sepuluh siwah kuta kerina, rikut pe ras kuta-kuta i sekelewetna. 39Kota-kota ras kuta-kuta enda inganna i bas taneh si ialoken keluarga suku Naptali jadi sikerajangenna.
Daerah si itetapken man suku Dan
40Si pepituken itetapken man keluarga suku Dan. 41Si bengket ku bas daerahna e me kap: Sora, Estaol, Irsemes, 42Salbim, Ayalon, Itla, 43Elon, Timna, Ekron, 44Elteke, Gibeton, Baalat, 45Jehut, Beneberak, Gat-Rimon, 46Mejarkon, ras Rakon, bage pe daerah i sekelewet Joppa. 47Asum kalak Dan kebenen tanehna, lawes ia ku Lais jenari iserangna kuta e. Italukenna kuta e, ibunuhna pendudukna, jenari ibuatna kuta e man sikerajangenna. Iinganina kuta e jenari isambarina gelarna i bas Lais nari jadi Dan, sue ras gelar nini-ninina. #Hak 18:27-29 48Kota-kota ras kuta-kuta enda inganna i bas taneh si ialoken keluarga suku Dan jadi sikerajangenna.
Pembagin taneh e idungi
49Kenca bangsa Israel dung mbagiken taneh e, iberekenna man Josua anak Nun sada bagin taneh e jadi sikerajangenna. 50Sue ras si enggo ipedahken TUHAN, iberekenna man bana taneh si ipindo Josua, e me kap Timnat Sera, inganna i deleng-deleng bagin Eperaim. Ipantekina mulihken kuta e jenari i je me ia ringan.
51Imam Eleasar, Josua anak Nun, ras kepala-kepala keluarga i bas suku-suku Israel netapken bagin-bagin taneh enda alu erbahan tikam tanduk i Silo guna nungkun sura-sura TUHAN, i bas dalan bengket ku bas Kemah Perjumpan ras TUHAN. Alu bage enggo dung pembagin taneh e.
Currently Selected:
JOSUA 19: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
