JOP 19
19
Kenca bage erjabap ka Jop nina,
1-2“Kuga maka lalap aku ipesega-segandu?
Getem pusuhku erkiteken ranandu.
3Enggo piga-piga kali aku isakitindu;
la kin kam mela ngidah perbahanenndu bangku?
4Di ersalah gia aku,
lit kin i je rugindu?
5Ulin akapndu kam asa aku,
janah kiniseranku enda,
akapndu jadi buktina,
maka aku ersalah tuhu-tuhu.
6Tapi arus itehndu,
maka la bujur perbahan Dibata bangku.
Enggo itogengna siding i kelewetku,
lako nangkap aku.
7Serko aku, “Kejam Dibata!”
Tapi la lit si ngaloisa.
Nderkuh aku mindo keadilen,
tapi pernderkuhku la ibegiken.
8Enggo irambeng Dibata dalanku,
igelapiNa pe,
e maka aku lanai banci mentas arah e.
9Kebayaken irampasNa kerina,
kemulianku pe icedakenNa.
10Arah apai pe aku irambasNa,
desken ngeruah batang kayu ibahanNa.
Pengarapenku iruahNa kerina,
e maka bene me aku.
11Pernembeh ate Dibata gara bangku,
janah musuhNa kal akapNa aku.
12IsuruhNa tenteraNa merang aku,
ikalina parik,
ikepungna sapo-sapongku.
13Dibata kap mahanca
maka aku itadingken senina-seninangku
janah kalak si kutandai
lanai akapna aku teman.
14Kade-kadengku ras temanku meriah,
kerina enggo nilah;
15janah kalak si gelgel jadi temuengku,
enggo ngelupaken aku genduari.
16Kudilo suruh-suruhenku,
tapi la aku ialoina;
aminna pe kupindo perkuah atena.
17Mutah ate ndeharangku nganggeh bau kesahku,
sembuyakku la nggit ndeher perban ciga atena aku.
18Anak-anak pe nokoh-nokohi aku,
adi tedis aku,
itawa-tawaina aku.
19Kandu-kandungku kal pe ciga atena aku,
kalak si kukelengi kal, enggo salih jadi imbangku.
20Kulitku nari ngenca leket bas tulanku,
narus-narus mate me aku.
21O teman-temanku, mekuah min atendu aku,
sabap enggo mekelek pengkenai tan Dibata aku.
22Engkai maka ikut-ikutndu Dibata erbahan ateku mesui?
Langa kin akapndu bias erbahan mesui pusuhku?
23Oh, isuratken min kata-katangku i bas kitap,
gelah iinget kalak pagi lalap.
24Tah iukir min i bas batu alu pahat besi,
gelah asa ndigan pe ola masap nari.
25Tapi kueteh kap maka i Surga lit penebusku,
janah kedungenna reh me IA nampati aku.
26Aminna kulitku enggo ipan penakit kerina,
kuidah me Dibata,
asum aku i bas kulangku enda denga.
27Alu matangku jine pagi IA kuidah,
janah lanai IA pagi bagi kalak man bangku.
Bene ukurku sabap nindu ngerana,
28‘Uga ndia sibahan gelah mesui atena?’
Idaramindu dalan lako nerang aku.
29Tapi genduari mbiarlah kam man pedang,
pedang si maba ukumen Dibata erkiteken dosa,
gelah itehndu maka lit kap Dibata
si ngadili manusia.”
Currently Selected:
JOP 19: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
