JOP 20
20
Nina ka Sopar anak Noama,
1-2Serbut kal ukurku ibanndu, o Jop.
Lanai aku sabar njabap kam perban ngilas kuakap.
3Megombang kal kam arah pengeranandu.
4Ma itehndu kin maka nai-nai nari,
tangtangna kin manusia itamaken i bas doni,
5keriahen kalak jahat labo ndekah,
janah kesenangenna kentisik saja ngenca?
6Aminna gia ia jadi meganjang la teralang,
seh maka takalna seh ku langit dingen awang-awang,
7nandangi masap me ia asa lalap,
masap alu mbau desken karap-karap.
Kalak si pernah ngidah ia, nungkuni,
“Eh, i ja ndai?”
8Lesap me ia desken nipi,
masap bagi nipi sanga berngi.
9I japa pe lanai ia teridah,
inganna ndube pe lanai tereteh.
10Kai gelgel e itangkona i bas si musil nari,
arus iganti anak-anakna man empuna nai.
11Mbestang gia dagingna genduari,
jadi abu me ia kentisik nari.
12-13Ntebu kal akapna kejahaten i bas babahna,
e maka mberat kal akapna ngutahkenca;
dage ibunikenna i teruh dilahna,
janah lalap ibulbulina.
14Tapi kenca seh i bas beltekna,
salih pangan ndai jadi racun si erbisa.
15Kebayaken si enggo itelenna,
terpaksa iutahkenna;
enggo gia seh i bas beltekna,
mulihi ka ipedarat Dibata.
16Erta-erta si isirup kalak jahat langkahna,
bali kap ras racun si erbisa;
erkiteken si e mate me ia,
desken itagut nipe si erbisa.
17Subuk minak saitun si maler desken lau belin,
tah pe tengguli ras susu si maler desken lau anak,
kidekah geluhna la banci iidahna.
18Untung si idatca terpaksa iulihkenna,
janah ulihna latih la banci inanamina.
19Sabap kalak musil itebu-tebuna jenari itundalkenna,
janah rumah bekas kalak erbahan irampasna.
20Enda erkiteken kerangapenna la lit sibarna,
janah lalap la erpuas-puas kerna kesenangenna.
21Adi man ia, la lit sitik pe ibahanna iba.
Tapi genduari enggo masap kebayakenna.
22Tupung paksana senang geluhna,
rempet ndabuh kiniseran si mberat ngkenai ia.
23Kenca ibesurina kal beltekna,
itelkasken Dibata pernembeh ateNa man bana.
24Asum ia lompat nilahken pedang waja,
badanna telpus kena panah tembaga.
25Anak panah pultak arah gurungna
i bas ujungna si erndilap nari naktaken dareh megara,
e maka seh kal ia biarna.
26Asa kai buni-bunina kernep kerina,
bage pe ia ras isi jabuna si tading denga,
keri ipan api si la manusia pegarasa.
27Langit petangkas kejahatenna,
janah doni keke nalahken ia.
28Kebayakenna melengas kerina
iombakken rawa ate Dibata.
29Bagenda me jadina man kalak si la mbiar Dibata,
si itetapken Dibata jadi kerajangenna.
Currently Selected:
JOP 20: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
